ސުންނާފަތިކޮށްލާފައިވާ ޣައްޒާގެ އިމާރާތްތަކުގެ ދަށުން މަރުވެފައިވާ އެތައްސަތޭކަ ހަށިތައް ހޯދައިފި
ހަމަލާތައް ހުއްޓާލިކަން އިއުލާންކުރި ފަހުން ޣައްޒާގެ އެންމެ މުހިއްމު މަސައްކަތަކީ ސުންނާފަތިވެފައިވާ އިމާރާތްތަކުގެ ދަށުން މަރުވެފައިވާ މީހުންގެ ހަށިތައް ހޯދުމެވެ. އަދި ދިރިހުރި މީހެއް އިމާރާތްތަކުގެ ތެރޭގައި ތާށިވެފައި ވޭތޯ އަތްފުނާއެޅުމެވެ.
މީހުން ސަލާމަތް ކުރުމުގައި ހަރަކާތްތެރިވާ ފަރާތްތަކުން މިހާތަނަށް ވަނީ މަރުވެފައިވާ އެތައް ހަށިގަނޑެއް ހޯދާފައެވެ. ދެކުނު ޣައްޒާގެ ރަފަޙްއިން އެކަނިވެސް 137 މީހެއްގެ ހަށިގަނޑު ވަނީ ފެނިފައެވެ.
ފަލަޞްޠީނުގެ އޮފިޝަލުން އަންދާޒާކުރާ ގޮތުގައި އިމާރާތްތަކުގެ ދަށުގައި 10,000 ށްވުރެ ގިނަ މީހުން ވަޅުލެވިފައިވާނެއެވެ. ފަލަޞްޠީނުގެ ސިވިލް އިމަޖެންސީ ސަރވިސްގެ ތަރުޖަމާނު މަޙްމޫދު ބަޞަލް ވިދާޅުވި ގޮތުގައި 15 މަސްދުވަހުގެ ޤަތުލް އާންމުގައި ޣައްޒާ ވަނީ ހިޔާލަށްވެސް ނުގެނެވޭ ވަރަށް ސުންނާފަތިކޮށްލާފައެވެ.
މަދަނީ ދިފާއުން ޤަބޫލުކުރާގޮތުގައި ގިނަ ހަށިތަކެއް ވީރާނާވެ ވެއްޔާއެކުވެ މިހާރު ވަޅުލަންވެސް ލިބޭނީ ހަމައެކަނީ ކަނިކޮޅުތަކެވެ. އަދި 2840 ހަށިގަނޑު އެއްކޮށް ވީރާނާވެފައިވާ ކަމަށާއި އެހަށިތަކުގެ ނިޝާނެއްވެސް ފެންނަން ނެތްކަމަށް ބަސަލް ވަނީ އަލްޖަޒީރާ އަށް މައުލޫމާތު ދީފައެވެ.
އިޒްރާއިލްއިން ޣައްޒާގައި ހިންގި ގަތުލްއާންމު 467 ދުވަސް ފާއިތުވީ ފަހުން ހަމަލާތައް މެދުކަނޑާލިއިރު 47,000 ށްވުރެ ގިނަ މީހުން ޣައްޒާގައި ވަނީ ޝަހީދުކޮށްލާފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި ޒަޚަމް ވީ މީހުންގެ އަދަދު ވަނީ ލައްކައަކަށްވުރެ މައްޗަށް ގޮސްފައެވެ.
ވިއްސިވިލާލި ވެފައިވާ އެތައްހާސް ބައެއް މިހާރުވަނީ އެމީހުން ގެދޮރަށް އަނބުރާ ދާންފަށާފައެވެ. ނަމަވެސް ގެއެއް ސިފަ ނުވާވަރަށް އިމާރާތްތައް ވަނީ ސުންނާފަތި ކޮށްލާފައެވެ.
"ލިބިފައިވާ އުމްރާނީ ގެއްލުމުގެ ނިސްބަތަކީ ހަމަ ބޮޑު ޝޮކެއް. އެންމެންވެސް ތިބީ އެމީހުންގެ ގެދޮރު ހުރިގޮތް ފެނިފަ ހަމަ ޝޮކެއްގަ. މުޅިން ފަނާކޮށްލާފަ" ހަނގުރާމައިގައި އޭނާގެ ބޭބެ އަކާއި ބޭބެގެ ފިރިހެން ދަރިފުޅު ގެއްލުމުގެ ހިތާމައިގައި ހުރި މުޙައްމަދު ގޮމާ ރޮއިޓާސްއަށް ބުނެފައި ވެއެވެ.
އދ ން އަންދާޒާކުރާ ގޮތުގައި ޣައްޒާ އާރާސްތުކޮށް ކުރީގެ ހާލަތަށް މީހުން ދިރިއުޅޭ ގެތަށް ގެނައުން އެކަނިވެސް 2040 ހާ ހަމައަށް ނުނިމޭނެއެވެ. އަދި ކުރީގެ ހާލަތަށް ޣައްޒާ ދިއުމަށް އެތައް ދިހަ އަހަރެއް ހޭދަވާނެކަމަށް ވެސް އދ ން ލަފާކުރެއެވެ. އދ ން މީގެ ތިން މަސްކުރިން ނެރެފައިވާ ރިޕޯޓް ދައްކާގޮތުން ހަނގުރާމައިގެ ގެއްލުންތަކުގެ ސަބަބުން ޣައްޒާގެ ތަރައްޤީ މިވަނީ 69 އަހަރު ފަހަތަށް ގޮސްފައެވެ.
ރިއެކްޝަންސް
