ޣައްޒާ އުފަލާ މޮޅިވެރިކަމުގައި: ރައްޔިތުން އެނބުރި ވަޒަނަށް! އިންސާނީ އެހީގެ ޓްރަކްތައް ޣައްޒާ އަށް ވަންނަނީ
ހަމަލާތައް މެދުކަނޑާލިތާ ދެވަނަ ދުވަސް: ފަލަޞްޠީނުގެ ރައްޔިތުން އެނބުރިގޮސް ވަންނާނެ ގެދޮރެއް ނެތް!
ހަމާސް އާއި އިޒްރާއިލް އާ ދެމެދު ވެވިފައި އެއްބަސްވުމާ އެއްގޮތަށް އިޒްރާއިލްގެ ޖަލުތަކުގައި ތިބި ފަލަޞްޠީނުގެ 90 މީހަކު ރޭ ދަންވަރު މިވަނީ މިނިވަންކޮށްފައެވެ. އަހުލުވެރިންނާ އަލުން ބައްދަލުވީ ވަގުތު އިޒްރާއިލްއިން ހިފާފައިވާ ހުޅަނގު އައްސޭރީގައިވަނީ އިންތިހާއަށް އުފާފާޅުކޮށްފައެވެ. ރެޑް ކްރޮސްގެ ބަސްތަކުގައި އެމީހުން ގެންގޮސްފައިވަނި ހުޅަނގު އައްސޭރީގެ ރާމަالله އަށެވެ.
އެއްބަސްވުމާ އެއްގޮތަށް އިންސާނީ އެހީގެ ޓްރަކްތައް ޣައްޒާއަށް މިވަނީ ވަންނަންފަށާފައެވެ. އިޒްރާއިލްގެ ކޮންޓްރޯލްގެ ދަށުގައި އޮންނަ ކަރެމް ޝަލޮމް ކޮރޮސިންގ އިން އިއްޔެ ޣައްޒާއަށް 200 ޓްރަކް ވަދެފައި ވާކަން ރޮއިޓާސްއިން ވަނީ ކަށަވަރުކޮށްދީފައެވެ. އެއްބަސްވުމުގެ ދަށުން ދުވާލަކު 600 އެހީގެ ޓްރަކް ޣައްޒާ އަށް އެތެރެވާނެއެވެ. އިއްޔެވެސް ބާކީ 400 ޓްރަކް ޣައްޒާއަށް ވަނުމަށް ކިއޫގައި އޮތް ކަމަށް ރޮއިޓާސް އިންވަނީ ބުނެފައެވެ
އަލްޖަޒީރާއިން އާންމުކޮށްފައިވާ ވީޑިއޯތަކުން ފެންނަ ގޮތުން ބައެއް ޓްރަކް ޣައްޒާގެ ދެކުނުގައި މަޑުކުރިއިރު އަނެއްބައި ޓްރަކްތަކުގެ މިސްރާބު ހުރީ ހަނގުރާމައިގައި އެންމެ ބޮޑަށް ހާލުގައި ޖެއްސި އުތުރު ޣައްޒާއަށެވެ.
މި ޓްރަކްތަކުގައި މައިގަނޑު ގޮތެއްގައި ހުރީ ބޭކަރީތަކަށް ބޭނުނަވާ ފުށާއި ހޮސްޕިޓަލްތަކުގެ ޙިދުމަތް އަލުންފެށުމަށް ބޭނުންވާ ތެލެވެ. ތެޔޮ ހުސްވެ ޣައްޒާގެ ބޭނުންކުރެވޭ ހާލަތުގައި ހުރި ހޮސްޕިޓަލްތައްވެސް ވަނީ ބަންދުކޮށްފައެވެ.
ހަމަލާތައް ހުއްޓާލިކަން އިއުލާން ކުރުމާއެކު ޣައްޒާގައި އެތައް ފަހަރެއްގެ މަތިން ވިއްސިވިހާލިވެފައިވާ އެތައްހާސް ރައްޔިތުން ދަނީ އެމީހުންގެ ވަޒަނަށް އެނބުރި ދިއުމަށް ދަތުރު ފަށާފައެވެ. ނަމަވެސް އެމީހުންގެ ގެތަކުގެ ބަދަލުގައި މިއަދު ފެންނަންހުރީ ގާފުނި ތަކެވެ. އެމީހުން މިއަދު ކުރަމުންދާ މަސައްކަތަކީ އެ ގާފުނިތަކުގެ ދަށުން މަރުވެފައި ނުވަތަ ދިރިހުރި އިންސާނެއްގެ ހަށިގަނޑު ނަމަވެސް ފެނޭތޯ ބެލުމެވެ.
ސުންނާފަތިވެފައިވާ ގެތަކުގެ ދަށުން މަރުވެފައިވާ މީހުންގެ ހަށިތައް ނަގާ, އެމީހުންގެ ޖަނާޒާ ބޭއްވުމަކީ ދެވަނަ ދުވަހު ޣައްޒާގެ ރައްޔިތުންގެ އެންމެ މުޙއްމު މަސައްކަތެވެ. އޭގެ ތެރޭގައި ޤަތުލްއާންމުގެ ތެރޭގައި މަގުތަކުގައާއި މީހުން އުޅޭ ސަރަޙައްދު ތަކުގައި ވަގުތީ ގޮތުން ވަޅުލި ހަށިތައް އަލުން ނަގާ އެކަމިށް ކަނޑައެޅިފައިވާ ސަރަޙައްދުތަކަށް ފުރުހަމަ އިހްތިރާމާއެކު ބަދަލުކުރުންވެސް ހިމެނެއެވެ.
ބައެއް ތަޖުރިބާކާރުން ޤަބޫލުކުރާ ގޮތުގައި ޣައްޒާގައި އުފެދިފައިވާ 42 މިލިއަން ޓަނުގެ މިގާފުނިތައް އެއްކޮށް ސާފުކުރަން 10 އަހަރަށްވުރެ ގިނަ މުއްދަތެއް ނަގާނެއެވެ.
15 މަސްދުހަށް ދިގު ދެމިގެންދިޔަ ހަމަލާތައް ވަގުތީގޮތުން ހުއްޓާލިއިރު އެމީހުންގެ ނަފްސުތައް ވަނީ ބަލިކަށިވެ އަރާމަކަށް ބޭނުންވެފައެވެ. އެހީގެ ޓްރަކްތަކުގެ އިންތިޒާރުގައި ކާނާއާއި ބޭސް ލިބޭތޯ އެމީހުން މިއަދުވެސް ތިބީ ޝުކުރުވެރިކަމާއެކުއެވެ.
ރެޑް ކްރެސެންޓްގެ އެހީގައި ޣައްޒާގެ އެކި ސަރަޙައްދުތަކުގައި ދަނީ ވަގުތީ ބޯހިޔާވަހިކަން ޤާއިމްކުރަމުންނެވެ. ޣައްޒާގެ 70 އިންސައްތަ ގެތައް ހަނގުރާމައިގައި ވަނީ ބިމާ ހަމަވެފައެވެ. އެހެންކަމުން އެނބުރި ވަންނާނެ ގެދޮރުނެތް ފަރާތްތަކަށް 30 ވަގުތީ ބޯހިޔާވަހިކަން ރެޑްކްރެސެންޓްއިން މިހާތަނަށް ވަނީ ހަދައިދީފައެވެ.
ޣައްޒާގެ އާބާދީގެ 2.4 މިލިއަން މީހުންގެ ތެރެއިން 90 އިންސައްތަ މީހުން ވަނީ ޣައްޒާގެ އެކި ސަރަޙައްދުތަކުގައި ވިއްސި ވިހާލިވެފައެވެ. ފިނި މޫސުމުގެ ގަދަ ފިނިން ރައްކާތެރިވާނެގޮތެއް ގިނަ މީހުންނަށް އަމުދުން ނުވެސް ނެތެވެ.
ޔުނިސެފްގެ ފަރާތުން އަލްޖަޒީރާ އާ ވާހަކަ ދެއްކި ރޮސާލިއާ ބޮލެން ވިދާޅުވި ގޮތުގައި އިންސާނީ އެހީގެ ތަކެތީގެ އިތުރުން ވިޔަފާރީގެ ބޭނުމަށް ޣައްޒާއަށް ތަކެތި އެތެރެކުރަންވެސް ޖާގަ ދޭންޖެހެއެވެ. އެއީ ޣައްޒާއަކީ އިޤްތިޞާދީ ހަރަކާތްތައް ގިނަ ތަނެއް ކަމަށާއި އެމީހުން އަމިއްލަ ފައިމައްޗަށް ތެދުވަން ފުރުޞަތު ދޭންޖެހޭ ކަމަށެވެ. އަދި ޣައްޒާ އަލުން އާރާސްތުކުރުމަށްޓަކައި ޣައްޒާގެ ރައްޔިތުން ބާރުވެރި ނުކުރުވާ, ހަމައެކަނި އިންސާނީ އެހީއަށް ބަރޯސާވާން ދޫކޮށްލުމަކީ ދުނިޔެއިން ޣައްޒާގެ ރައްޔިތުންނަށް ކުރާ ބޭއިންސާފެއް ކަމަށްވެސް ރޮސާލިއާ ވިދާޅުވިއެވެ.
ރިއެކްޝަންސް
