ފަލަޞްޘީނުގައި އުފާވެރި ކަމުގެ ކަރުނަ, އިޒްރާއިލް ޖަލުތަކުގައި ތިބި ފަލަޞްޠީނުގެ 90 މީހަކު މިނިވަންކޮށްފި.
އަންހެނުންނާއި ކުޑަކުދިން ހިމެނޭހެން އިޒްރާއިލްގެ ޖަލުތަކުގައި ތިބި 90 މީހަކު އިޒްރާއިލްއިން ދޫކޮށްލައިފިއެވެ. އެމީހުން މިނިވަންކުރުމާއި އެކު އާއިލާތައް ހިމެނޭހެން ފަލަޞްޠީނުގެ އެތައްހާސް ރައްޔިތުންނެއްނެތް މަގުތައް މަތީގައި ވަނީ އުފާފާޅުކޮށްފައެވެ. އާއިލާތަކާ އަލުން ބައްދަލުވުމުން އެމީހުންގެ ދިޔައީ އުފަލުން ރޮމުންނެވެ.
ރެޑް ކޮރޮސްގެ ބަސްތަކުގައި އެމީހުން ހުޅަނގު އައްސޭރިއަށް ގެނައިއިރުވެސް އެސަރަހައްދު ވަނީ ފުރިބާރުވެފައެވެ. އިޒްރާއިލް އާއި ހަމާސްގެ ހަމަލާތައް މެދުކަނޑާލުމުގެ އެއްބަސްވުމުގެ ދަށުން އިއްޔެ ވަނީ ހަމާސްގެ އަތްދަށުގައި ތިބި އިޒްރާއިލްގެ ތިން ރަހީނަކުވެސް މިނިވަންކޮށްފައެވެ.
ހިފާފައިވާ ހުޅަނގު އައްސޭރީގެ ރާމަالله އަށް 90 މީހުންނާއި އަދި ރެޑް ކްރޮސްގެ ބަސްތައް މަޑުކުރީ ފަލަޞްޘީނުގެ ގަޑިން ދަންވަރު 1 ޖެހި އިރުއެވެ. އުފާފާޅުކުރުން އިޒްރާއިލް މަނާކޮށްފައި ވީނަމަވެސް އެއްވެފައިވާ އެތައްހާސް މީހުން ދިޔައީ އިޒްރާއިލްގެ ބަހަށް ބެލުމެއްނެތި އުފާފާޅުކުރަމުންނެވެ.
އާއިލާގެ މީހުން ކޮނޑަށްލައިގެން އުފަލުން ހަޅޭއްލަވަމުން, ރޮމުން ދިޔަ ވަގުތު ކޮޅަކީ ހަޤީގަތުގައިވެސް ވަރަށް ޖަޒުބާތީ ވަގުތުކޮޅެކެވެ. އެއްވެފައިވާ ބައެއްމީހުން ތިބީ ފަތަޙް, ހަމާސް އަދި އިސްލާމިކް ޖިހާދުފަދަ ފަލަޞްޠީނުގެ މިނިވަންކަމަށް މަސައްކަތްކުރާ ބައެއް ޖަމާއަތްތަކުގެ ދިދަތައްވެސް ހިފައިގެންނެވެ.
މިނިވަންކުރި ފަލަޞްޠީނުގެ މީހުންގެ ތެރޭގައި ހިމެނެނީ 69 އަންހެނަކާއި, ފުރާވަރު އުމުރުގެ 21 ފިރިހެން ކުދިންނެވެ. ބައެއްކުދިންނަށް ވާނީ 12 ވަރަކަށް އަހަރެވެ. އޭގެ ތެރޭގައި ގިނައީ ހިފާފައިވާ ހުޅަނގު އައްސޭރި އަދި ޤުދުސްއިން މީގެ ކުރިން ހައްޔަރުކޮށްފައިވާ މީހުންނެވެ.
ފަލަޞްޠީނުގެ ރައްޔިތުން މިނިވަންކުރުމުގެ ހަތް ގަޑިއިރު ކުރިން ޣައްޒާއިން މިނިވަންކުރި މީހުންގެތެރޭގައި ހިމެނެނީ 40 އަހަރުން ދަށުގެ ތިން އަންހެނެކެވެ.
އިޒްރާއިލްއިން މިނިވަންކުރި މީހުންގެ ތެރޭގައި 2024 މާޗު ގައި ހައްޔަރުކުރި ބުޝްރާ އަލް-ތަވިލް ކިޔާ ފަލަޞްޠިނުގެ ނޫސްވެރިއަކުވެސް ހިމެނެއެވެ. އޭނާގެ ބައްޕަ ވެސް މީގެ ކުރިން އިޒްރާއިލްއިން ހައްޔަރުކޮށް އަދިވެސް ހުރީ އިޒްރާއިލްގެ ހައްޔަރުގައެވެ.
އެއްބަސްވުމުގެ ދަށުން މިނިވަންކުރުމަށް ހަމަޖެހިފައިވާ ފަލަޞްޠީނުގެ ރައްޔިތުންގެ އަދަދު މުޅިން ސާފު ނުވިނަމަވެސް އެ އަދަދު 2000 އާ ގާތްކުރާނެ ކަމަށް ބެލެވެއެވެ. އެއްބަސްވުމުގެ ފުރަތަމަ މަރުހަލާގައި ހަމާސްގެ ދަށުގައި ތިބި ރަހީނުންގެ ތެރެއިން 33 މީހަކު 42 ދުވަހުގެ ތެރޭގައި މިނިވަން ކުރުމަށް ވަނީ ހަމަޖެހިފައެވެ.
ރިއެކްޝަންސް
