ހަމާސްއިން މިއަދު ދޫކޮށްލާ 3 އަސީރުންގެ ނަން ހާމަކޮށްފި
އިޒްރާއިލްއިން ޣައްޒާގައި 10 މީހަކު ޝަހީދުކޮށްލައިފި
ހަމާސް އާއި އިޒްރާއިލް އާ ދެމެދު ވެފައިވާ އެއްބަސްވުމުގެ ދަށުން ފުރަތަމަ ދުވަހު މިނިވަންކުރާ 3 އަސީރުންގެ ނަން އިއުލާން ކޮށްފިއެވެ. މިކަން އިއުލާންކުރީ ހަމާސްގެ ހަތިޔާރު އެޅި ފިޔައިގެ ތަރުޖަމާނެވެ.
މިއަދު މިނިވަންކުރާ ތިން އަސީރުންގެ ބަދަލުގައި ފަލަޞްތީނުގެ 95 މީހަކު މިނިވަންކުރާނެއެވެ. އެއްބަސްވުމުގެ ފުރަތަމަ މަރުޙަލާ ނިމޭއިރު 33 އަސީރުންގެ މިނިވަން ކުރުމަށް ވަނީ ހަމަޖެހިފައެވެ. ބަދަލުގައި އިޒްރާއިލްގެ ޖަލުތަކުގައިތިބި އެތައްސަތޭކަ ޤައިދީން މިނިވަން ކުރުމަށްވެސް ވަނީ ހަމަޖެހިފައެވެ.
މިއަދު ހެދުނު ޣައްޒާގެ ގަޑިން 08:30 ގައި ހަމަލާތައް ހުއްޓާލުމުގެ ސުންގަޑި ފެށުންފަހުންވެސް އިޒްރާއިލްއިން ވަނީ ޣައްޒާގައި ހަމަލާތަކެއްދީ އާންމުންގެ 10 މީހަކު ޝަހިދުކޮށްލާފައެވެ. ސުންގަޑި ކައިރިވާން މަދު ވަގުތުކޮޅަކަށް ވެފައިވަނިކޮށް އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައިވަނީ މިނިވަންކުރުމަށް ހަމަޖެހިފައިވާ އަސިރުންގެ ލިސްޓް ނުލިބެނީސް ހަމަލާތައް ހުއްޓާނުލުމަށް އަސްކަރިއްޔާ އަށް އަމުރުކޮށްފައިވާ ކަމަށެވެ.
ނަމަވެސް އަސީރުންގެ ލިސްޓް ފޮނުވުމަކީ ހަމަލާތައް މެދުކަނޑާލުމަށް ކޮށްފައިވާ ޝަރުތެއް ނޫނެވެ. އެއްބަސްވުމުގައި އޮތީ އެދުވަހަކަށް ކަނޑައެޅިފައިވާ އަސީރުން މިނިވަން ކުރުމެވެ. އިދާރީ ސަބަބަކާ ހުރެ ލިސްޓް ނުލިބުން ހުއްޖަތަކަށް ހަދާ ހަމަލާތައް ކުރިއަށް ގެންގޮސް އިޒްރާއިލްއިން 10 މީހުން ޝަހީދުކޮށްލުމަކީ އެއްބަސްވުމާ ޚިލާފްވުމެވެ.
އިޒްރާއިންއިން 7 އޮކްތޯބަރު 2023 ން ފެށިގެން ޣައްޒާގައި ހިންގަމުން ގެންދާ ޤަތުލްއާންމުގައި މިހާތަނަށް 46,899 މީހަކު ވަނީ ޝަހީދުކޮށްލާފައި ކަމުގައި ފަލަޞްތީނުގެ ރަސްމީ ހިސާބުތަކުން ދައްކައެވެ. ނަމަވެސް އަމިއްލަ ބައެއް ޖަމާއަތްތަކުން ޤަބޫލު ކުރާ ގޮތުގައި މިއަދަދު މިހާރު ލައްކައަކާ ގާތްކުރާނެއެވެ.
ރިއެކްޝަންސް
