ސައުދީ ކަދުރު ލިބިއްޖެ, ބަހަން ފަށަނީ އަންނަ ހޯމަ ދުވަހު
ސަޢޫދީ އަރަބިއްޔާ ސަރުކާރުން ހަދިޔާކުރާ ކަދުރު ލިބި, އަންނަ ހޯމަ ދުވަހު ބަހަން ފަށަން އިސްލާމިކް މިނިސްޓްރީން ތައްޔާރުވެއްޖެއެވެ. ސަޢޫދީ ސަރުކާރުން ދިވެހިރާއްޖެއަށް ހަދިޔާކުރީ 50 ޓަނު ކަދުރެވެ.
ކަދުރު ބަހާނީ އަންނަ ހޯމަ ދުވަހުން ފެށިގެން ފެބްރުއަރީ މަހުގެ ހަވަނަ ދުވަހުގެ ނިޔަލަށް ކަމަށް އިސްލާމިކް މިނިސްޓްރީން ވިދާޅުވިއެވެ. ކަދުރު ބެހުމަށް މިނިސްޓްރީން ކަނޑައަޅުއްވާފައިވަނީ ކޮންމެ ގޭބީސީއަކަށް ޕެކެޓެކެވެ. ކަދުރު ލިބުނީ ކޮންމެ 100 ގޭބީސީ އަކަށް 25 ޕެކެޓްގެ މަގުން ކަމަށް މިނިސްޓްރީން ވިދާޅުވިއެވެ.
ކަދުރު ބަހަނީ ކަރަންޓް މީޓަރަށް ބަލައިގެންނެވެ. ކަދުރު ބެހުމުގެ ކަންކަން ރަށްރަށުގައި ކުރިއަށްގެންދާނީ ރަށު ކައުންސިލްތަކާއި ސިޓީ ކައުންސިލްތައް މެދުވެރިކޮށެވެ. މާލެއާއި ހުޅުމާލެ އަދި ވިލިމާލޭގެ ރައްޔިތުންނަށް ކަދުރު ބެހުމުގެ ކަންކަން ކުރިއަށް ގެންދާނީ އިސްލާމިކް މިނިސްޓްރީންނެވެ. އެކަން އިންތިޒާމް ކުރަނީ އިސްލާމީ މަރުކަޒުގައެވެ. އެކަމަށް ކަނޑައަޅާފައިވާ ވަގުތަކީ ހެނދުނު 09:30-13:00 އަށެވެ.
ގޭބީސީ ތަކުގެ އިތުރުން ޖަމްއިއްޔާ ޖަމާއަތްތަކުގެ ތެރެއިން ރަމަޟާންމަހުގެ އިފްތާރު ޕްރޮގްރާމަށް ނުވަތަ ރޯދަވީއްލުމުގެ އިންތިޒާމް ހަމަޖައްސައިދޭ ޖަމްއިއްޔާތަކަށް ވެސް ކަދުރު ދޭން މިނިސްޓްރީން ވަނި ނިންމާފައެވެ. އެފަދަ ޖަމްއިއްޔާތަކުން މިނިސްޓްރީގައި ނަން ނޯޓް ކުރުމުގެ ފުރުޞަތު ވަނީ ހުޅުވާލާފައެވެ.
ރިއެކްޝަންސް
