ސްޓެލްކޯ ވެސް ވިއްސާރައަށް ޓާސްކްފޯހެއް އެކުލަވާލައިފި
ކުރިއަށް އޮތް ފަސް ދުވަހު ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް މޫސުމާބެހޭ އިދާރާއިން ބުނުމުން ފެންބޮޑުވުން ކޮންޓްރޯލް ކުރުމަށް ދުރާލާ ފިޔަވަޅު އަޅަން ނިންމާ ސްޓެލްކޯއިންވެސް ޓާސްކްފޯހެއް އެކުލަވާލައިފިއެވެ.
ސްޓްލެކޯއިން މިއަދު ބުނީ މިމަހުގެ 18 ވަނަ ދުވަހުގެ ނިޔަލަށް ރާއްޖޭގެ ބޮޑުބަޔަކަށް ވިއްސާރަކުރާނެކަމަށް ލަފާކޮށް މޫސުމާއި ބެހޭ އިދާރާއިން ނެރެފައިވާ ބަޔާނާއި ގުޅިގެން، ފެންބޮޑުވުން ކޮންޓްރޯލްކުރުމަށް ދުރާލައި ފިޔަވަޅުއެޅުމަށް ނިންމައި، ސްޓެލްކޯގެ މެނޭޖްމަންޓްއިން ޚާއްސަ ޓާސްކްފޯހެއް އެކުލަވާލާފައިވާ ކަމަށެވެ. މި ޙާލަތުގައި އެންމެ އިސްކަމެއް ދޭނީ ސްޓެލްކޯއިން ޚިދުމަތްދޭ ރަށްރަށުގައި ހުރި ސްޓެލްކޯގެ ކްރިޓިކަލް އިންފްރާސްޓްރަކްޗަރ ރައްކާތެރި ކުރެވޭނެ އިންތިޒާމުތައް ހަމަޖެއްސުމަށް ކަމަށް އެކުންފުނިން ބުންޏެވެ. މީގެއިތުރުން ރައްޔިތުންނަށް ދެމުންގެންދާ ޔުޓިލިޓީ ޚިދުމަތްތައް މެދުކެނޑުމެއްނެތި ފޯރުކޮށްދިނުމަށް އިސްކަން ދެއްވާނެ ކަމަށް ސްޓެލްކޯއިން ބުންޏެވެ. މީގެއިތުރުން އެހެން ފަހަރުތަކެކޭވެސް އެއްގޮތަށް، ވިއްސާރައިގެ ސަބަބުން ލިބޭ ގެއްލުން ކުޑަކުރުމަށް ރައްޔިތުން ބޭނުންވާ އެހީތެރިކަން ފޯރުކޮށްދިނުމަށް ސްޓެލްކޯއިން ޚިދުމަތްދޭ ހުރިހާ ރަށެއްގައިވެސް ސްޓެލްކޯގެ މުވައްޒަފުން ތައްޔާރަށް ތިބޭނެ ކަމަށްވެސް އެކުންފުނިން ބުންޏެވެ.
ކުރިއަށް އޮތް ފަސް ދުވަހު ވިއްސާރަވުމާއެކު, ވައިގަދަވެ އުދައަރާނެ ކަމަށް މުސުމާބެހޭ އިދާރާއިން ސަމާލު ނެރެފައިވާތީ ސިފައިންނާއި ފުލުހުންނާއި, ނޭޝަނަލް ޑިޒާސްޓަރ މެނޭޖްމަންޓް ސެންޓަރު ހިމެނޭ ގޮތަށް ޚާއްޞަ އޮޕަރޭޝަނެއް ވަނީ ފަށާފައެވެ. އެއީ ގެއްލުންތައް ކުޑަކުރުމަށް ދުރާލާ ފިޔަވަޅުތައް އެޅުމާއެކު ރައްޔިތުންނަށް އެހީތެރިވުމަށެވެ.
ރިއެކްޝަންސް
