ޑިމޮކްރެޓްސްއާއި އެމްޑީޕީގައިވެސް މިވަގުތު އަމަލީ މަސައްކަތް ކުރާކަށް ނެތިން- ނަޝީދު

ޑިމޮކްރެޓްސްއާއި އެމްޑީޕީގައިވެސް މިވަގުތު އަމަލީ މަސައްކަތް ކުރާކަށް ނެތިން ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވެ ޕޯސްޓެއް ކުރައްވާފައި މިވަނީ ފަހުން އުފެއްދެވި ދަ ޑިމޮކްރެޓްސްގެ ލީޑަރޝިޕްގެ އިސްބޭފުޅުންތަކެއް އަލުން އެމްޑީޕިއަށް ސޮއިކުރައްވާފައި ވަނިކޮށެވެ.

ރައީސް ނަޝީދުގެ ސިޔާސީ ކުރިމަގު އޮތީ ކޮންޕާޓީއެއްގައިތޫ ސުވާލުއުފެދިފައި ވަނިކޮށް, މިއަދު ވިދާޅުވީ އެމްޑީޕީއަކީ އެމަނިކުފާނުގެ ދަރިއެއްފަދަ ޕާޓީއެއް ކަމަށެވެ. އެޕާޓީ ވަރުގަދަވެ އޮތުން އެއީ އަބަދުވެސް އެދިވަޑައިގަންނަވާނެ ކަމެއްކަމަށް ވިދާޅުވިއެވެ. އަދި އެމަނިކުފާނު އިސްވެ ހުންނަވާ ފަހުން އުފެއްދެވި ދަ ޑިމޮކްރެޓްސް އަކީ ޚާއްޞަ ގޮތެއްގައި ޒުވާނުންނަށް ސިޔާސީ މަސައްކަތުގައި ބައިވެރިވުމަށް ފުރުޞަތެއް ކަމަށް ވިދާޅުވިއެވެ. އެކަމަކު އެއިން އެއްވެސް ޕާޓީއެއްގައި އަމަލީ ގޮތުން މިވަގުތު ނޫޅުއްވާނެ ކަމަށް ވިދާޅުވިއެވެ.

" މީގެން އެއްވެސް ޕާޓީއެއްގައި އަމަލީ މަސައްކަތް ކުރާކަށް މިވަގުތު އަޅުގަނޑު ނެތިން" ނަޝީދު ވިދާޅުވިއެވެ.

އެކަމަކު އެމަނިކުފާނު ޔަގީންކަން ދެއްވީ ސިޔާސީ މަސައްކަތްތަކުން މުޅިން ދުރަށް ވަޑައިނުގަންނަވާ ކަމެވެ. ވިދާޅުވީ ރާއްޖޭގެ ސިޔާސީ ހަރަކާތުން މުޅިން ދުރުވާކަށްވެސް ނެތިން ކަމަށެވެ.

ރައީސް ނަޝީދު ވިދާޅުވީ އެމަނިކުފާނުގެ ހަޔާތުގެ ބޮޑުބައި ހޭދަކުރެއްވީ ދިވެހިރާއްޖޭގައި ގިނަޕާޓީ އެކުލެވޭ ނިޒާމެއް ގާއިމް ކުރުމުގެ މަސައްކަތުގައި ކަމަށެވެ. ގައުމެއްގެ ތަރައްޤީއަށް, ރައްޔިތުންގެ ތަނަވަސްކަމަށް އެންމެ ބޭނުން އެއް ވަސީލަތަކީ ވާދަވެރި ސިޔާސީ ހަރަކާތް ކަމަށް އެމަނިކުފާނު ވިދާޅުވިއެވެ. ވާދަވެރި ސިޔާސީ ހަރަކާތުގެ ސަބަބުން ސަރުކާރުގެ އާމްދަނީ އިތުރުވެ, އާމްދަނީން ކުރެވުނު އުމްރާނީ މަސައްކަތްތަކާއި, ރައްޔިތުންނަށް ހޯދައިދެވުނު އިޖްތިމާއީ ރައްކާތެރިކަން ކުރީގެ ރައީސް ނަޝީދު ފާހަގަކުރެއްވިއެވެ.

ރާއްޖޭގެ ސިޔާސީ މަސައްކަތްތަކުން މިވަގުތު ދުރުވެވަޑައިގެން ނަޝީދު މިވަގުތު ދިރިއުޅުއްވަނީ ދެކުނު އެފްރިކާގައެވެ. އެމަނިކުފާނު ރާއްޖޭގައި ނެތްނަމަވެސް 2028 ވަނަ އަހަރަށް އެމަނިކުފާނު ރައީސްކަމަށް ގެނައުމުގެ ކެމްޕެއިނެއް ސޯޝަލް މީޑިޔާގައި އެމަނިކުފާނުގެ ބައެއް ސަޕޯޓަރުން ކުރިއަށް ގެންދެއެވެ.