އައްޑޫ ސިޓީގެ އެމްޑީޕީގެ އިސް ބޭފުޅުންތަކެއް ސަރުކާރު ހިންގާ ޕީއެންސީއާ ގުޅިއްޖެ
އައްޑޫ ސިޓީއަށް ނިސްބަތްވާ، އިދިކޮޅު އެމްޑީޕީގެ އިސް މަޤާމުތަކެއް ފުރުއްވާފައިވާ ގިނަ އަދަދެއްގެ ބޭފުޅުންތަކެއް ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އާ ރޭ ގުޅިވަޑައިގެންފިއެވެ.
މި ބޭފުޅުން ކޮންގްރެސް ޕާޓީއާ ގުޅިވަޑައިގަތީ، "ދަ ގްރޭޓަރ އައްޑޫ ވިޝަން" ގެ ތަފްސީލު ލޯންޗުކުރުމަށް ރޭ މާލޭގެ އާޓިފިޝަލް ބީޗުގައި ބޭއްވި ޚާއްސަ ހަފްލާގައެވެ. މި ހަފްލާގައި އެ ބޭފުޅުން ވަނީ ޕާޓީއާ ގުޅުނުކަމުގެ އިޤްރާރާއި މެންބަރޝިޕް ފޯމުތައް، ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުޙައްމަދު މުޢިއްޒުއާ ހަވާލުކުރައްވާފައެވެ.
ރޭގެ ހަފްލާގައި ޕީއެންސީއާ ގުޅިވަޑައިގެންނެވި އައްޑޫ ސިޓީގެ އެމްޑީޕީގެ އިސް ބޭފުޅުންގެ ތެރޭގައި ހިމެނެނީ:
- އަޙްމަދު އަދްޙަމް - އައްޑޫ ސިޓީގެ އެމްޑީޕީގެ ކުރީގެ ރައީސް
- އަބްދުﷲ ސަޢީދު - އެމްޑީޕީގެ ފޭދޫ ދާއިރާގެ ކުރީގެ ރައީސް
- މުޙައްމަދު ސަޢީދު (ދަގޭ) - އެމްޑީޕީގެ ފޭދޫ ދާއިރާގެ ކުރީގެ ނައިބު ރައީސް
- އަޙްމަދު މިރުޒާލް - ފޭދޫ ދާއިރާގެ އެމްޑީޕީގެ ކުރީގެ ކައުންސިލަރު އަދި އެލްޖީއޭގެ ކުރީގެ މެންބަރު
- ފާތިމަތު ޝިޔާމާ - ލަންކާގައި އެމްޑީޕީގެ ހަރަކާތްތަކުގައި އިސްކޮށް އުޅުއްވި ބޭފުޅެއް
- ޙައްވާ ޒާހިރާ - އައްޑޫ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީގައި ތިންވަނަ ދައުރެއް ފުރިހަމަކުރައްވަމުންދާ މެންބަރެއް
މި ބޭފުޅުން ސަރުކާރާ ގުޅިވަޑައިގެންފައިވަނީ އައްޑޫ ސިޓީގެ ތަރައްޤީއަށް ސަރުކާރުން ގެންގުޅުއްވާ ތަޞައްވުރަށް ތާއީދުކުރުމުގެ ގޮތުންނެވެ. ރޭގެ މި ހަފްލާގައި ރައީސުލްޖުމްހޫރިއްޔާގެ އިތުރުން ދައުލަތުގެ އިސް ބޭފުޅުންނާއި އައްޑޫ ސިޓީގެ ގިނަ އަދަދެއްގެ ރައްޔިތުން ބައިވެރިވިއެވެ.
ރިއެކްޝަންސް
