ޝީޝާ މަނާކުރުމާއި ހަކުރުގެ ސަބްސިޑީ ކަނޑާލުމުގެ ވިސްނުމެއް ނެތް: ރައީސް
ރާއްޖޭގައި ޝީޝާ މަނާކުރުމުގެ ވިސްނުމެއް ނެތް ކަމަށާއި، އަދި ހަކުރުން ޓެކްސް ނެގުމުގެ އިތުރުން އެ ބާވަތަށް ދޭ ސަބްސިޑީ ކަނޑާލުމުގެ ވިސްނުމެއް ވެސް ސަރުކާރުން ނުގެންގުޅޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ރައީސް މިހެން ވިދާޅުވީ، އަންނަ މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބަށް އަމާޒުކޮށްގެން ޕީއެންސީން ކުރިއަށްގެންދާ "ދަ ގްރޭޓާ އައްޑޫ" ކެމްޕެއިން އިފުތިތާހުކުރުމަށް ހެންވޭރު އާޓިފިޝަލް ބީޗުގައި ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ސިއްހަތަށް ބޮޑެތި ގެއްލުންތަކެއް ދޭ ވޭޕް މަނާކުރުމަށާއި، ދުންފަތުގެ އިސްތިއުމާލުކުރުމުގެ އާދަތަކުން އާންމުން ދުރުކުރުމަށް ސަރުކާރުން މިހާތަނަށް ހަރުދަނާ ފިޔަވަޅުތަކެއް އަޅާފައިވާކަން ރައީސް ފާހަގަކުރެއްވި އެވެ. ނަމަވެސް، އިތުރު އެއްޗެއް މަނާކުރުމަކީ މިވަގުތު ސަރުކާރުގެ ސިޔާސަތެއް ނޫން ކަމަށް އެމަނިކުފާނު ވިދާޅުވި އެވެ.
"އަޅުގަނޑުމެން ނޫޅެން ޝީޝާ ބުއިން ބޭން ކުރާކަށް. ހަކުރުގެ ސަބްސިޑީ ކަނޑާލާކަށް. މި ކަހަލަ ކަންކަން ކުރާކަށް ނޫޅެން،" ރައީސް ވިދާޅުވި އެވެ.
ރައީސް މުއިއްޒު އިތުރަށް ވިދާޅުވި ގޮތުގައި، ސަރުކާރުގެ މައިގަނޑު އަމާޒަކީ މުޖުތަމައުގައި ހުރި ނުބައި އާދަތަކާއި ސިއްހަތަށް ގެއްލުންދެނިވި ކަންކަމުން އާންމުން ދުރުކުރުމަށްޓަކައި ހޭލުންތެރިކަން އިތުރުކުރުމެވެ. މިފަދަ ކަންކަމުން ދުރުހެލިވުމަށް އާންމުންނަށް ބާރުއަޅައި ހިތްވަރު ދިނުމަކީ ސަރުކާރުން ވަރަށް ބޮޑު އިސްކަމެއްދޭ ކަމެއްކަން އެމަނިކުފާނު ފާހަގަކުރެއްވި އެވެ.
މީގެ އިތުރުން، ސަރުކާރުން ބޭނުންވަނީ ހަށިގަނޑަށް ފައިދާހުރި މޭވާ އާއި ތަރުކާރީގެ ބާވަތްތައް އަގުހެޔޮކޮށް ރާއްޖޭގެ ބާޒާރުން ލިބޭނެ އިންތިޒާމު ހަމަޖެއްސުން ކަމަށް ރައީސް ވިދާޅުވި އެވެ. އަދި އެފަދަ ތަކެތި ރާއްޖޭގައި އުފެއްދޭނެ މަގުތައް ފަހިކޮށްދިނުމަކީ ވެސް ސަރުކާރުގެ މުހިންމު ވިސްނުމެއް ކަމަށް ރައީސުލްޖުމްހޫރިއްޔާ ވިދާޅުވި އެވެ.
ރިއެކްޝަންސް
