ކެލިފޯނިއާ އަލިފާން: 24 މީހަކު މަރުވެ 16 މީހުން ގެއްލިއްޖެ, ސަންޓާ އަނާގެ ބާރު ގަދަވަނީ
ފެސިފިކް ޕަލިސޭޑްގައި ރޯވި އަލިފާންގަނޑު ލޮސް އެންޖެލިސްގެ ބޮޑު ސަރަޙައްދަކަށް ފެތުރި 24 މީހަކު މަރުވެއްޖެ އެވެ. ހަފުތާގެ މެދުތެރޭގައި އެސަރަޙައްދުގެ ވައި 'ސަންޓާ އަނާ' ގެ ބާރުގަދަވެ އަލިފާންގަނޑު އިތުރަށް ފެތުރޭނެ ކަމަށް އެމެރިކާގެ މޫސުމާބެހޭ ގައުމީ ހިދުމަތުން ވަނީ އިންޒާރުދީފައެވެ.
އަލިފާނުގައި މިހާތަނަށް އެތައްހާސް ބައެއްގެ ގެދޮރު ގެއްލިފައިވާއިރު, 16 މީހަކު ވަނީ ވީނުވީއެއް ނޭނގި ގެއްލިފައެވެ. އިދާރާތާތަކުން ބުނާގޮތުގައި މި އަދަދު މިއަށްވުރެ މަތިވެގެންދާނެ ކަމަށްވަނީ އަންދާޒާ ކުރެވިފައެވެ.
މޫސުމާބެހޭ ހިދުމަތުން މިހާރު ލޮސް އެންޖެލިސް ކައުންޓީ ހިމެނޭ ކެލިފޯނިއާ ސިޓީގައި ރަތް ދިދައިގެ އިންޒާރު ވަނީ ނެރެފައެވެ. މިހާރުވެސް އެސަރަހައްދުގެ ވައި އާންމު ހިސާބުތަކުގައި ހުރީ ގަޑިއަކު 80 ކިލޯމީޓަރުގައެވެ. ފަރުބަދަމަތީ ހިސާބުތަކުގައި ގަޑިއަކު 112 ކިލޯމީޓަށް ވައި ހުރިއިރު, މާދާމާ ސަންޓާ އަނާގެ ބާރުމިން އިހުނަށްވުރެ ގަދަވާނެ ކަމަށްވަނީ އިންޒާރުދީފައެވެ.
"މި ސަރަޙައްދުގެ މާހައުލުގަ ތެތްކަން އެއްވެސް މިންވަރަކަށް ނެތް. ސަންޓާ އަނާގެ ބާރު ދަނީ ގަދަވަމުން. އަލިފާން އިތުރަށް ފެތުރި ނާޒުކު ހާލަތަކަށް ހިނގައިދާނެ" ހޮނިހިރު ދުވަހުގެ ރޭ އާންމުންނާ ބައްދަލުކޮށް މީޓިއޮރޮލޮޖިސްޓް ރިޗް ތޮމްޕްސަން ވިދާޅުވިއެވެ.
ލޮސް އެންޖެލިސް ކައުންޓީގެ ފަޔަރ ޗީފް, އެންތަނީ ސީ. މެރޯން ވިދާޅުވީ އިތުރު 70 ފެން ޓްރަކް މިހާރު ވަނީ އަލިފާން ނިއްވުމުގެ މަސައްކަތަށް އިތުރު ކުރެވިފައި ކަމުގައެވެ. ވައިގަދަވެގެން އިތުރަށް ލިބިދާނެ ގެއްލުމަށް މިދަނީ ތައްޔާރުވަމުން ކަމުގައި ވެސް އޭނާ ވިދާޅުވިއެވެ.
ވާރޭ ނުވެހި އަށް މަސްދުވަސް ވެފައިވާ ކެލިފޯނިއާ ސިޓީގެ ހުރިހާ ހިސާބެއްގެ ހަނަފަސްކަން އިތުރުވެފައިވާއިރު މުޅި މާހައުލު ވަނީ ވަރަށްބޮޑަށް ހިކިފައެވެ. ތިން ސަރަހައްދެއްގައި ރޯވެފައިވާ އަލިފާންގަނޑު މިހާރުވެސް އަނދަމުން ދާއިރު މުޅިއެކު 40,000 އޭކަރުގެ ސަރަޙައްދެއް ވަނީ އަނދައިގެން ގޮސްފައެވެ.
ރިއެކްޝަންސް
