ވިއްސާރަވެ, މޫސުން ގޯސްވާނެ ކަމުގެ އެލާޓާއެކު ސިފައިންނާއި ފުލުހުން ތައްޔާރީ ހާލަތަށް!
މިރެއިން ފެށިގެން މިމަހުގެ 18 ގެ ނިޔަލަށް ވިއްސާރަކުރާނެ
ވިއްސާރަވެ, މޫސުން ގޯސްވާނެ ކަމުގެ އެލާޓާއެކު ސިފައިންނާއި ފުލުހުން ތައްޔާރީ ހާލަތަށް އައިސްފައެވެ. ކުރިއަށް އޮތް ހަ ދުވަހުވެސް މޫސުން ގޯސްވާނެ ކަމަށް މޫސުމާބެހޭ އިދާރާއިން އަންދާޒާކޮށް ސަމާލު ނެރުމާ ގުޅިގެން އެކަމުގެ ސަބަބުން ލިބޭ ގެއްލުންތައް ކުޑަކުރުމުގެ މަސައްކަތްތަކަށް ސިފައިންނާއި ފުލުހުން ތައްޔާރީ ހާލަތަކަށް އައިސްފައިވާކަން އިއުލާނުކުރެއްވީ މިއަދު ބޭއްވި ނޫސްވެރިންގެ ބައްދަލުވުމުގެވެ.
ސިފައިންނާއި ފުލުހުންގެ ތައްޔާރީ ހާލަތަކަށް އައިސްފައިވާކަން އިއުލާނުކުރެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ އާއި ކޮމިޝަނަރ އޮފް ޕޮލިސް އަލީ ޝުޖާއު އެވެ. އެދެމުއަސްސަސާއިން ވެސް ބުނީ ވިއްސާރަވެ މޫސުން ގޯސްވެ ލިބޭ ގެއްލުންތައް ކުޑަކުރުމަށް ރައްޔިތުންނަށް އެހީތެރިވުމަށް ސިފައިންނާއި ފުލުހުން ސައްވީސް ގަޑިއިރު ޚިދުމަތުގައި ތިއްބަވާނެ ކަމަށެވެ. ސިފައިންނާއި ފުލުހުން ޤާއިމްވެ ތިބޭ ރަށްރަށުގައިވެސް އަދި ފުލުހުން ޤާއިމްވެ ނެތް ރަށްރަށުގައިވެސް އެރީޖަނެއްގެ ފުލުހުންގެ އިދާރާއިން އެހީތެރިކަން ފޯރުކޮށްދޭނެ ކަމަށް ވިދާޅުވިއެވެ. އެކަންކަމަށް ފުލުހުންނާއި ސިފައިންނަށް މިހާރު އިރުޝާދުދީ ތައްޔާރީ ހާލަތަށް ގެނެސްފައިވާ ކަމަށް ވިދާޅުވިއެވެ.
ޢާއްމުކޮށް ފެންބޮޑުވާ ރަށްރަށުގައި ފެންހިންދުމުގެ މަސައްކަތުގެ އިތުރުންވެސް ރައްޔިތުންނަށް އެހީތެރިވުމަށް ސިފައިންނާއި ފުލުހުން ހަރަކާތްތެރިވާނެ ކަމަށް ކޮމިޝަނަރ އޮފް ޕޮލިސް ވިދާޅުވުއެވެ. މުއައްސަސާގެ ހުރިހާ މުވައްޒަފުން ނެރެން ޖެހުނު ނަމަވެސް ސައުވީސް ގަޑިަިއިރު ރައްޔިތުންނަށް އެހީތެރިވުމުގައި ދެމިތިބެނެ ކަމުގެ ޔަގީންކަންވެސް ކޮމިޝަނަރ ދެއްވިއެވެ.
މިރެއިން ފެށިގެން މިމަހުގެ 18 ވަނަ ދުވަހުގެ ނިޔަލަށް ވިއްސާރަ ކުރާނެ ކަމަށް މޫސުމާބެހޭ އިދާރާއިން ވަނީ ސަމާލު ނެރެފައެވެ.
ވިއްސާރަވެ ފެންބޮޑުވާނެ ކަމަށް މޫސުމާބެހޭ އިދާރާއިން ސަމާލު ނެރުމާ ގުޅިގެން ޢާއްމުކޮށް ފެންބޮޑުވާ ސަރަހައްދުތަކުގައި މިހާރުވެސް ވަނީ ވެލިބަސްތާ ޖަހާފައެވެ. ސިފައިންނާއި ފުލުހުންވެސް ބުނީ ރައްޔިތުންނަށް ދަތިކަން ދިމާވެ ގެއްލުންވަމުންދާ ހާލަތުގައި އެރައްޔިތުންނާއެކު އެހީތެރިވުމުގައި ސިފައިންނާއި ފުލުހުން ދެމިތިބޭނެ ކަމަށެވެ. ގެއްލުންތައް ކުޑަކުރުމަށް ކުރާ މަސައްކަތުގައި ބައެއްފަހަރު ރައްޔިތުންނަށް އުނދަގޫވާނެ ފަދަ ނިންމުންތައްވެސް ނިންމަން ޖެހޭ ކަމަށާއި, އެފަދަ ކަންކަމުގައިވެސް ރައްޔިތުންގެ އެއްބާރުލުން ދެއްވުމަށް ކޮމިޝަނަރ އޮފް ޕޮލިސް އެދިވަޑައިގެންނެވިއެވެ. އެގޮތުން ފެންބޮޑުވާ ސަރަހައްދުތަކުގައި ވެހިކަލް ދުއްވުން ފަދަ ކަންކަން މަނާކުރަން ޖެހޭނެ ކަމަށާއި, އެފަދަ ކަންކަމުގައި އެއްބާރުލުންދީ ގުޅިގެން މަސައްކަތްކުރުމަށް އިލްތިމާސް ކުރެއްވިއެވެ.
މޫސުން ގޯސްވެ ލިބޭ ގެއްލުންތައް ކުޑަކުރުމަށް ދުރާލާ ފިޔަވަޅުތައް އެޅުމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ވެސް ވަނީ އިލްތިމާސްކުރައްވާފައެވެ. ސިފައިންނާއި ފުލުހުންނާއެކު ނޫސްވެރިންގެ ބައްދަލުވުމުގައި އެންޑީއެމްއޭގެ ޗީގް އެގްޒެކްޓިވް އޮފިސަރ ހިސާން ހުސައިންވެސް ބައިވެރިވެވަޑައިގެން ސަމާލުކަން ދޭންވީ ކަންކަން ފާހަގަކުރެއްވިއެވެ.
މާލޭގެ އިތުރުން ޢާއްމުކޮށް ފެންބޮޑުވާ 72 ރަށަކަށް ޕަންޕާއި ފެންހިންދާނެ ނިޒާމް ފޯރުކޮށްދީފައިވާ ކަމަށް އެންޑީއެމްއޭ އިން ބުންޏެވެ. މޫސުންގޯސްވެ ފެންބޮޑުވެދާނެކަމަށް ދުރާލާ ސަމާލުކަން ދިނުމަށް އެންޑީއެމްއޭއިން ފާހަގަކުރެއްވި ކަންކަމަކީ:
- ރަށު ފެންވަރުގަޔާއި ފަރުދީ ފެންވަރުގައި އަޅަންޖެހޭ ފިޔަވަޅުތައް އެޅުން
- މޫސުމާބެހޭ އިދާރާއިން ނެރުއްވާ ނިއުސްބެލްޓިންގައިވާ ގޮތުގެ މަތީން އަމަލުކުރެއްވުން
- ސަލާމަތީ ބާރުތަކުން ދޭ އިރުޝާދުތަކަށް ތަބާވުން
- ކުރިންވެސް ބޭނުންކުރި ވެލިބަސްތާތައްވެސް ބޭނުންކޮށްގެން ގެޔަށް ފެން ނުވަންނާނެ ގޮތަށް ރައްކާތެރިކަމުގެ ފިޔަވަޅުތައް އެޅުން
- ފެންބޮޑުވެފައިވާ ވަގުތުތަކުގައި ބަރު އުޅަނދު ނުދުއްވުން
- ފެންބޮޑުވާ ކަމަށް ފާހަގަކުރެވޭ ސަރަހައްދު ތަކުގައި ސައިކަލް ފަދަ ތަކެތި ޕާރކް ނުކުރުން
- ޢާއްމުކޮށް ފެންބޮޑުވާ ސަރަހައްދުތަކުގައި ހުންނަ ފިހާރަ, ކެފޭ, ގުދަން ތައް ހުންނަ ސަރަހައްދުތަކުގެ ވެރިފަރާތްތަކުން ސަމާލުވެ ފިޔަވަޅު އެޅުން
- ރޭގަނޑު ވިޔަފާރިތައް ބަންދުކޮށްފަ ހުންނަ ވަގުތުވެސް ފެންވަދެދާނެކަމަށް ބެލެވޭ ތަންތަނުގައި ފިޔަވަޅުތައް އެޅުން
- ވައިގަދަވުމުގެ ސަބަބުން ދިމާވެދާނެ ހާލަތްތަކަށްވެސް ތައްޔާރުވުން
- އުދަ އަރައިގެން ލިބިދާނެ ގެއްލުންތަކަށްވެސް ސަމާލުކަން ދިނުން,ދަނޑުވެރިންވެސް ޚާއްޞަ ފިޔަވަޅުތައް އެޅުންމޫސުން ގޯސްވެ ލިބޭ ގެއްލުންތައް ކުޑަކުރުމަށް އެހީތެރިވުމަށް ރައީސުލްޖުމްހޫރިއްޔާގެ އިރުޝާދުގެ ދަށުން ޖޮއިންޓް އޮޕަރޭޝަނެއް މިހާރު ވަނީ ފަށާފައެވެ. އޮޕަރޭޝަން 24 ގަޑިއިރު ކުރިއަށް ގެންދާނެއެވެ. މުސުމާބެހޭ އިދާރާއިން ވަނީ ވިއްސާރަވުމުގެ އިތުރުން ވައިގަދަވެ, އުދަ އަރާނެކަމަށްވެސް ސަމާލު ނެރެފައެވެ. ފެންބޮޑުވެ އެއްވެސް އެހީތެރިމަކަށް އެދި ނުވަތަ ގެއްލުމެއް ރިޕޯރޓްކުރަން ބޭނުންނަމަ އެންޑީއެމްއޭގެ ނަމްބަރު 115 އަށް ގުޅުމަށް ވަނީ އެދިފައެވެ.
ރިއެކްޝަންސް
