ފަހަތުން އަރާ ރިއަލް މެޑްރިޑް ބަލިކޮށް ސުޕަކަޕްގެ ރަސްކަން ބާސެލޯނާއަށް
އެންމެ ފަހުގެ ޗެމްޕިއަން ރިއަލް މެޑްރިޑް 5-2 ން ބަލިކޮށް ބާސެލޯނާއިން 15 ވަނަ ފަހަރަށް ސްޕެނިޝް ސުޕަކަޕް ކާމިޔާބުކޮށްފިއެވެ. އެންމެ ގިނަ ސްޕަކަޕް ހޯދި ކްލަބްގެ ލަގަބާއިއެކު ބާސެލޯނާއިން ސުޕަކަޕްގެ ރަސްކަން ދިފާއުކޮށްފައިވާއިރު ރިއަލް މެޑްރިޑް އަށް މި ތަށި ކާމިޔާބު ކުރެވުނީ 13 ފަހަރުއެވެ.
ސައުދީ އެރޭބިއާގެ ކިންގް ޢަބްދުالله ސްޓޭޑިއަމްގައި އާދިއްތަ ދުވަހު ކުޅުނު މެޗުގެ ފަސްވަނަ މިނިޓްގައި ރެއާލުން ވަނީ ލީޑު ނަގާފައެވެ. ކީލިއަން އެމްބާޕޭ ރެއާލަށް ލީޑު ނަގައިދިނީ ވިނީޝިއުސް ޖޭއާރު ތަނަވަސްކޮށްދިން ފުރުޞަތެއްގައެވެ.
ބާސެލޯނާއަށް ނަތީޖާ އެއްވަރުކޮށްދިނީ 22 ވަނަ މިނިޓްގައި ޒުވާން ކުޅުންތެރިޔާ ލަމީން ޔަމާލްއެވެ. ބާސާގެ ފުރަތަމަ ގޯލް ޖެހުމުގައި އެހީތެރިވި ރޮބާޓް ލެވަންޑޮސްކީ ވަނީ މެޗުގެ 36 ވަނަ މިނިޓްގައި ބާސެލޯނާ އަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދީފައެވެ.
ބާސެލޯނާއިން ފުރަތަމަ ހާފު ނިންމާލީ 4-1 ގެ ލީޑެއްގައި އޮވެގެންނެވެ. 39 ވަނަ މިނިޓްގައި ހޫލުސް ކޫންޑޭ ތަނަވަސްކޮށްދިން ބޯޅަ ބޮލުންޖަހާ ގޯލްގެ ތެރެއަށް ފޮނުވާލައިގެން ތިންވަނަ ގޯލް ކާމިޔާބުކޮށްދިނީ ރަފީނިއާއެވެ. ހަތަރުވަނަ ގޯލް ޖެހުމުގައި ރަފީނިއާ އެހީތެރިވީ އިރު ފުރަތަމަ ހާފުގެ އިތުރު ވަގުތުގައި މި ގޯލް ކާމިޔާބުކޮށްދިނީ އަލެހަންދްރޯ ބަލްޑޭ އެވެ.
މެޗުގައި ރަފީނިއާ ވަނީ ދެ ގޯލް ކާމިޔާބު ކޮށް ތިންވަނަ ގޯލް ޖެހުމުގައި އެހީތެރިވެފައެވެ. މެޗުގައި ބާސެލޯނާގެ ފަސްވަނަ ގޯލް އޭނާ ކާމިޔާބުކުރީ 48 ވަނަ މިނިޓްގައި މާކް ކަސާޑޯ ތަނަވަސްކޮށްދިން ފުރުޞަތެއްގައެވެ.
މެޗުގެ ފަހު ހާފުގެ ބޮޑު ބައެއްގައި ބާސެލޯނާ ކުޅުނީ ކުޅުންތެރިއަކު މަދުކޮށެވެ. 56 ވަނަ މިނިޓްގައި ބާސެލޯނާގެ ކީޕަރު ވޮޖްޝިއޭ ޝެޒްނީ އެމްބާޕޭއަށް ކުރި ފައުލަކާ ގުޅިގެން ވަނީ ރަތްކާޑެއް ދައްކާފައެވެ. ރެއާލުން އެމީހުންގެ ދެވަނަ ގޯލް ކާމިޔާބުކުރީ މި ފައުލާ ގުޅިގެން ލިބުނު ހިލޭ ޖެހުމުގައި މެޗުގެ 60 ވަނަ މިނިޓްގައި ރޮޑްރީގޯ ގޮއެސް އެވެ.
ދެވަނަ ހާފުގައި ރެއާލްގެ ކުޅުން ރަނގަޅުކޮށް އިތުރު ގޯލެއް ޖެހޭތޯ މަސައްކަތް ކުރި ނަމަވެސް 10 ކުޅުންތެރިންނާއެކު ކުޅެމުން ދިޔަ ބާސެލޯނާގެ މައްޗަށް ކުރިހޯދުމުގައި ވަނީ ނާކާމިޔާބު ވެފައެވެ.
ރިއެކްޝަންސް
