މާފަންނު ސަހަރާގައި ބަހައްޓާފައިހުރި ސްޓޯމް ވޯޓަރ ޕަންޕް ސްޓޭޝަނަށް ގެނެސްފައިވަނީ ވަގުތީ ހައްލެއް!
މާފަންނު ސަހަރާގައި ބަހައްޓާފައިހުރި ސްޓޯމް ވޯޓަރ ޕަންޕް ސްޓޭޝަން އަލުން އޮޕަރޭޝަނަށް ގެނެސްފިއެވެ. މާފަންނު ސަހަރާގައި ބަހައްޓާފައިވާ ސްޓޯމް ވޯޓަރ ޕަންޕް ސްޓޭޝަނަށް ލިބިފައިވާ ގެއްލުން، ދެނެގަނެ ވަގުތީ ހައްލަކާއެކު އޮޕަރޭޝަނަށް ގެނައީ އާރް.ޑީ.ސީއާއި ސްޓެލްކޯގެ އެހީތެރިކަމާއެކު ކަމަށް ކޮންސްޓްރަކްޝަން މިނިސްޓްރީން ވިދާޅުވިއެވެ.
މިނިސްޓްރީން ޢާއްމުކުރި ބަޔާނެއްގައިވާ ގޮތުން އެޕަމްޕް މަސައްކަތް ނުކުރާކަން ފާހަގަވީ ވިއްސާރައިގެ ސަބަބުން މާލެ ސިޓީގައި ފެންބޮޑުވާ ކޮންމެ ފަހަރަކު މާލޭގެ އެކިސަރަހައްދުތަކުގައި ގާއިމްކޮށްފައިވާ ޕަމްޕް ސްޓޭޝަންތައް އިންސްޕެކްޓްކޮށް, ސްޓޭޝަންތައް ރަނގަޅަށް މަސައްކަތް ކުރޭތޯ ބެލުމަށް ކުރަމުން އަންނަ މަސައްކަތްތަކުގެ ތެރެއިންނެވެ.
މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. އަބްދުﷲ މުއްޠަލިބް އެކްސްގައި ކުރެއްވި ޓްވީޓެއްގައި ވިދާޅުވީ މާލޭ ސިޓީ ކައުންސިލުން މާފަންނު ސަހަރާ ކޮނުމުގެ މަސައްކަތް ކުރުމުގައި ޒިންމާދާރުކަން ކުޑަ ގޮތެއްގައި ޢަމަލުކޮށްފައިވާ ކަމަށެވެ. މާފަންނު ސަހަރާގެ ޕަމްޕް ސްޓޭޝަނަށް މައްސަލަ ދިމާވީ އެމަސައްކަތުގެ ތެރެއިން ކަމަށް ވިދާޅުވިއެވެ. މާލޭގެ އުތުރު ހުޅަނގު ސަރަޙައްދަށް ޚިދުމަތް ދެމުން އައި ސްޓޯމް ވޯޓަރ ޕަންޕް ސްޓޭޝަން މިނިސްޓްރީއަށް އެންގުމަކާއި ނުލައި ނަގަން މަސައްކަތްކުރުމުގެ ތެރޭގައި ގެއްލުންތަކެއްވެފައިވާ ކަމަށް މިނިސްޓަރ ވިދާޅުވިއެވެ. މިކަމުގެ ސަބަބުން މިވޭތުވެދިޔަ ދުވަސްތަކުގައި އެސަރަޙައްދުގައި ފެންބޮޑުވުމުގެ މައްސަލަ ކުރިމަތިވެފައިވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ މިނިސްޓްރީގެ ޓީމުން ޕަންޕް ސްޓޭޝަންތައް ގަވާއިދުން ބަލަމުންދާ ކަމަށާއި، އެލް.އެސް-10 ޕަންޕް ސްޓޭޝަން ވޭތުވެދިޔަ ހަފްތާގައިވެސް ރަނގަޅަށް މަސައްކަތްކުރަމުންދިޔަކަމަށެވެ. އަދި ޕަންޕިންގ ސްޓޭޝަން އެޅުމަށް އެ ސަރަޙައްދު ކޮނެ، އެތަނުން ނަގަންޖެހޭ ކަށިތައް ނަގާ ނިމިފައިވާތީ، އިތުރަށް އެ ސަރަޙައްދު ކޮނުމުގެ ބޭނުމެއް ނެތްކަން މިނިސްޓަރ ފާހަގަކުރެއްވިއެވެ.
ނަމަވެސް މާލެ ސިޓީގެ މޭޔަރު ވަނީ މިނިސްޓަރ މުއްޠަލިބުގެ ވާހަގަ ދޮގުކުރައްވާފައެވެ. މޭޔަރު ވިދާޅުވީ އެކަން މިނިސްޓްރީގެ ސަމާލުކަމަށް ގެންނެވި ކަމަށެވެ, އަދި ޕަމްޕް ސްޓޭޝަން މައްސަލަޖެހި މަސައްކަތް ނުކުރާތީ އެކަން ހައްލުކުކޮށްދެއްވުމަށްވެސް އެދުނު ކަމަށް ވިދާޅުވިއެވެ.
ރިއެކްޝަންސް
