ބަދަލުހިފުމެއް ނެތް, ހަމަޖެހުން ގާއިމް ކުރުމާއެކު ފޯކަސް ތަރައްޤީއަށް!
މިދިޔަ 14 މަސްދުވަހު ވެސް އޮތީ ހަމަޖެހުން
ބަދަލުހިފުމެއް ނުގެންގުޅުއްވާނެ ކަމަށާއި, ހަމަޖެހުން ގާއިމް ކުރުމާއެކު ފޯކަސް އޮތީ ތަރައްޤީއަށް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ ހުވަދުއަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ގއ.މާމެންދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ އަދުގެ ސަރުކާރުގެ ސިޔާސަތު ބައްޓަންކުރައްވާފައި ވަނީ ތަރައްޤީ ގެނެސްދިނުމާއެކުއެކީގައި ޤައުމުގައި ހަމަޖެހުން އޭގެ ފުރިހަމަ މާނައިގައި ޤާއިމުވެފައި އޮތުމުގެ މައްޗަށް ކަމަށެވެ. މިދިޔަ 14 ވަރަކަށް މަސްދުވަހަށް ބަލާއިރު މި ދިވެހިރާއްޖޭގައިވެސް އެ ހަމަޖެހުން ޤާއިމު ކުރެވިފައި ވާ ކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ބަދަލުހިފުމުގެ ރޫޙުގައި އެއްވެސް ކަމެއް ހިނގާފައި ނުވާ ކަމަށެވެ.
ބަދަލު ހިއްޕެވުމުގެ ރޫޙުގައި އެއްވެސް ކަމެއް ނުކުރައްވާނެ ކަމުގެ ސާބިތު ޔަޤީންކަން ދެއްވަމުން ރައީސުލްޖުމްހޫރިއްޔާ ވިދާޅުވީ، ސިޔާސީ ވާދަވެރިކަމުގެ ތެރެއިން ބަޔަކަށް އަނިޔާކޮށް، ސިޔާސީ ވިސްނުމުގެ ތެރެއިން ބަޔަކު ހައްޔަރުކުރުމަކީ އެ މަނިކުފާނު ޤަބޫލުފުޅުކުރައްވާ ކަމެއް ނޫން ކަމަށެވެ. ކުރިއަށް އޮތް ތަނުގައިވެސް ބަޔަކަށް ސިޔާސީ އަނިޔާއެއް ނުދެއްވާނެ ކަމަށާ، ބަދަލު ހިއްޕެވުމެއްވެސް ނޯންނާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. ސަބަބަކީ، ހަމަޖެހުން އޭގެ ޙަޤީޤީ މާނައިގައި މި ޤައުމުގައި އޮތުމަށް އެދިވަޑައިގަތުން ކަމުގައިވެސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ރައްޔިތުންނަށްޓަކައި ތަރައްޤީ ގެނެސްދޭ ނަމަ، އެކަމުގެ ފުރިހަމަ ނަފާ، އެ ރައްޔިތުންނަށް ލިބެން އޮތީ ޤައުމުގައި ހަމަޖެހުން އޮވެގެން ކަމަށެވެ. ޤައުމުގައި ހަމަޖެހުން ޤާއިމުކޮށް، ޤައުމު ކުރިއަށް ގެންދިއުމުގައި ހުރިހާ ރައްޔިތުންވެސް އެއްބާރުލުން ދެއްވުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ. ރައީސުލްޖުމްހޫރިއްޔާ ވިދާޅުވީ ކޮންމެ މީހަކަށްވެސް މުހިންމީ މި ޤައުމަކީ ހަމަޖެހުން ޤާއިމުވެފައި އޮތް ޤައުމަކަށް ވުން ކަމަށެވެ.
ރިއެކްޝަންސް
