ހޯނޑެއްދޫގެ ފެނާއި ނަރުދަމާގެ ޚިދުމަތް ރައީސުލްޖުމްހޫރިއްޔާ އިފްތިތާހުކޮށްދެއްވައިފި
ހޯނޑެއްދޫގައި އޭޓީއެމް ބެހެއްޓުމުގެ އެއްބަސްވުމުގައިވެސް ވަނީ ސޮއިކޮށްފަ
ހޯނޑެއްދޫގެ ފެނާއި ނަރުދަމާގެ ޚިދުމަތް ރައީސުލްޖުމްހޫރިއްޔާ އިފްތިތާހުކޮށްދެއްވައިފިއެވެ. ރައީސުލްޖުމްހޫރިއްޔާ ހޯޑެއްދޫގެ ފެނާއި ނަރުދަމާގެ ޚިދުމަތް އިފްތިތާހުކޮށްދެއްވީ ހުވަދު އަތޮޅުގެ ނުވަ ރަށަކަށް މިއަދު ފެއްޓެވި ދަތުރުފުޅުގައި އެންމެ ފުރަތަމަ އެރަށަށް ވަޑައިގެންނެވެ.
ހޯނޑެއްދޫ ފެނާއި ނަރުދަމާގެ ޚިދުމަތް ޤާއިމް ކުރުމުގެ މަސައްކަތް ފެށީ މިދިޔަ ސަރުކާރުގައި 2022 ވަނަ އަހަރުއެވެ. ނަމަވެސް މަސައްކަތް ނިންމާ ޚިދުމަތްދޭން ފެށީ މިސަރުކާރުގައެވެ. ހޯޑެއްދޫގެ ނަރުދަމާގެ ޚިދުމަތް ޤާއިމް ކުރީ 5 ޕަމްޕު ސްޓޭޝަން ޤާއިމް ކޮށްގެންނެވެ. ސީ އައުޓްފޯލް އަޅާ މުޅި ރަށުގައި ފެނާއި ނަރުދަމާގެ ވިއުގަ ވަނީ އަޅާފައެވެ. ގެތަކަށް މިހާރު ވަނީ ކަނެކްޝަން ގުޅާފައެވެ.
ފެނުގެ ޚިދުމަތް ދެނީ ދުވާލަކު 75 ޓަނުގެ ފެން އުފެއްދުމެ ކެޕޭސިޓީއާއެކުއެވެ. ފެން ރައްކާކުރަން ދެ ޓޭންކް ވަނީ ބަހައްޓާފައެވެ.
މިއީ އިންޑިޔާގެ އެގްޒިމް ބޭންކްގެ ލައިން އޮފް ކްރެޑިޓްގެ ދަށުން ކުރިއަށްގެންދިޔަ މަޝްރޫއެކެވެ. އެގްޒިމް ބެންކްގެ ލޯނުގައި 34 ރަށެއްގެ މަސައްކަތް ފެށިއެވެ. ބައެއް ރަށްތަކުގެ މަސައްކަތް ވަނީ ނިމިފައެވެ.
ރައީސުލްޖުމްހޫރިއްޔާ ހޯނޑެއްދޫއަށް ކުރެއްވި ދަތުރުފުޅުގެ ތެރެއިން އެރަށުގައި އޭޓީއެމް ބެހެއްޓުމުގެ އެއްބަސްވުމުގައި ރަށު ކައުންސިލާއި ބޭންކް އޮފް މޯލްޑިވްސްއާ ދެމެދު ވަނީ ސޮއިކޮށްފައެވެ.
ރިއެކްޝަންސް
