ރާއްޖޭގެ ކުދި އަދި މެދު ފަންތީގެ ކުންފުނިތަކަށް މިހަފްތާގައި 500 މިލިއަނަށްވުރެ ގިނަ ރުފިޔާ ދޫކުރާނެ- ރައީސް
ރޯދައިގެ ކުރިން ފައިސާގެ ބޮޑުބައެއް ދޭން މަސައްކަތް ކުރާނެ
ރާއްޖޭގެ ކުދި އަދި މެދު ފަންތީގެ ކުންފުނިތަކަށް މިހަފްތާގައި 500 މިލިއަނަށްވުރެ ގިނަ ރުފިޔާ ދޫކުރާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިޔަގީންކަން ދެއްވީ ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި ހޯނޑެއްދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ކުދި އަދި މެންދުފަންތީގެ ކުންފުނިތަކަށް ދޫކުރާ ފައިސާ އަކީ އެކުންފުނިތައް ލައްވާ ސަރުކާރުން މަސައްކަތް ކުރުވުމަށްފަހު ނުދީ ހުރި ފައިސާގެ ތެރެއިން ބައެކެވެ. އޭގެތެރޭގައި ސަރުކާރުގެ ކުންފުނިތައް ކަމަށްވާ ފެނަކަ, އާރުޑީސީ, އެމްޓިސީސީ, ވެމްކޯ ފަދަ ކުންފުނިތަކުން މަސައްކަތް ކުރުވި ރާއްޖޭގެ ރަށްރަށުގެ ކުދި ކުންފުނިތައްވެސް ހިމެނެއެވެ.
ރައީސުލްޖުމްހޫރިއްޔާ ވިދާޅުވީ މިހާތަނަށްވެސް އައީ ބޭރުގެ ދަރަނި ދައްކަމުން, އެތެރޭގެ އެކިކަހަލަ ދަރަނިތައްވެސް ދައްކަމުންކަމަށެވެ. އެގޮތުން މިހިނގާ ހަފްތާތެރޭގައިވެސް ސަރުކާރުން ކޮށްފަހުރި މަސައްކަތްތަކަށް ފިނޭންސް މިނިސްޓްރީން 500 އަށްވިރެ ގިނަ މިލިއަން ރުފިޔާ ދިވެހި އެކިއެކި ކުންފުނިތަކަށް ދޫކުރައްވާނެ ކަމަށް ވިދާޅުވިއެވެ.
ކުރީ ސަރުކާރުގެ ދުވަސްވަރު ފެނަކަ, އާރުޑީސީ, އެމްޓިސީސީ, ވެމްކޯ ފަދަ ކުންފުނިތަކުން ރަށްރަށުގެ އާދައިގެ ކުދި ކުންފުނިތައް ލައްވާ މަސައްކަތް ކުރުވުމަށްފަހު ފައިސާގެ ބޮޑު އަދަދެއް ނުދެވި ހުރިކަން ރައީސް ފާހަގަކުރެއްވިއެވެ. އެހެންދިމާވީ އެކުންފުނިތައް މިސްމެނޭޖްކޮށްފަ އޮތްލެއް ބޮޑުކަމުން ކަމަށާއި, ނަމަވެސް އޭގެވެސް ބޮޑުއިންސައްތައެއް ރޯދަމަސް އަންނަން ވާއިރަށް ދީ ނިންމޭތޯ ބައްލަވާ ކަމަށް ރައީސް ވިދާޅުވިއެވެ.
" މަސައްކަތް މިކުރަނީ ގައުމު ދަރަނިވެރިވިޔަ ނުދީ, އެއްވެސް ވަރަކަށް ފައިސާ ޗާޕްނުކޮށް, ފައިސާގެ އަގު ހިފަހައްޓައިގެން ރައްޔިތުންނަށް ދޭންހުރި ފައިސާ ދެމުން, ރާއްޖެއިން ބޭރަށް ދައްކަންޖެހޭ ފައިސާވެސް ދައްކަމުން ތަރައްޤީގެ ކަންކަން ގެނެސްދެމުން" ރައީސް ވިދާޅުވިއެވެ.
ރިއެކްޝަންސް
