އާ އަހަރު ރައީސުލްޖުމްހޫރިއްޔާ ވަޑައިގެންނެވި ފުރަތަމަ ރަށަކަށް ކ.ގުޅި
ރައްޔިތުން އެދިއެދި ތިބި ތަރައްޤީ ގެނެސްދޭނެ ކަމުގެ ޔަގީންކަން ދެއްވި
އާ އަހަރު ރައީސުލްޖުމްހޫރިއްޔާ ވަޑައިގެންނެވި ފުރަތަމަ ރަށަކަށް ކ.ގުޅި ވެއްޖެއެވެ. އެމަނިކުފާނު ގުޅިއަށް ވަޑައިގެންނެވީ މިއަދު ހަވީރު އެވެ.
ގުޅިއަށް ވަޑައިގެން އެރަށުގެ ކައުންސިލްގެ އިތުރުން ރައްޔިތުންނާ އެމަނިކުފާނު ވަނީ ބައްދަލުކުރައްވާފައެވެ. ގުޅި ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ ވިދާޅުވީ އެމަނިކުފާނު ވަޑައިގެންނެވީ ރައްޔިތުން އެދިއެދި ތިބި ތަރައްޤީ ގެނެސްދެއްވާނެ ކަމުގެ ޔަގީންކަން ދެއްވަން ކަމަށެވެ. އެގޮތުން ރައްޔިތުން އެންމެ ބޮޑަށް އެދެމުން އަންނަ ބިން ހިއްކުމުގެ މަޝްރޫއު އެމްޓީސީސީން މިހާރު އެފަށަނީ ކަމަށާއި, ދެން މަސައްކަތް ހުއްޓާނީ ރައްޔިތުން އެދޭ ގޮތަށް މަސައްކަތް މުޅިން ނިންމުމަށްފަހު ކަމަށް ވިދާޅުވިއެވެ. މީގެއިތުރުން ބަނދަރުގެ މައްސަލައަށްވެސް ހައްލު ހޯއްދަވައިދެއްވާނެ ކަމުގެ ޔަގީންކަން ދެއްވިއެވެ. އެއީ އާ ބަނދަރެއް ހަދައިގެންތޯ ނުވަތަ މިހާރު އޮތް ބަނދަރު ބޮޑުކޮށްގެންތޯ ނިންމާނީ ކައުންސިލާއި, ކޮންސްޓްރަކްޝަން މިނިސްޓްރީ މަޝްވަރާކޮށްގެން ކަމަށް ވިދާޅުވިއެވެ. ރައީސް ދެއްވި ޔަގީންކަމަކީ އެނިންމުން ވާނީ ރައްޔިތުން އެދޭ ނިންމުމަށް ކަމަށެވެ.
މިދިޔަ ދައުރުގެ ފަހުކޮޅު ގުޅި ބިންހިއްކުމުގެ މަޝްރޫއުގައި ސޮއިކުރި ނަމަވެސް އެމަޝްރޫއު މިދިޔަ އަހަރު ކުރިއަށް ނުގެންދެވުނީ މިދިޔަ ސަރުކާރުގައި ފާސްކުރި ބަޖެޓުން އެޖާގަ ނުދޭތީ ކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ މި ދަތުރުފުޅަކީ، 2024ވަނަ އަހަރު އަތޮޅުތަކާ ރަށްތަކާ ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް ފަށްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރެއިން މިއަހަރު ކުރައްވާ އެންމެ ފުރަތަމަ ދަތުރުފުޅެވެ. އެގޮތުން، މި ދަތުރުފުޅުތަކުގައި ރަށްރަށުގެ ރައްޔިތުންގެ ހާލުއަހުވާލު ބައްލަވައި، ރައްޔިތުން އެންމެ އެދޭ ކަންކަން އޮޅުންފިލުއްވައި، ތަރައްޤީގެ މަޝްރޫޢުތައް ތަރުތީބުކުރާނޭގޮތާއިމެދު އެމަނިކުފާނު މަޝްވަރާކުރައްވާނެ ކަމަށް ރައީސް އޮފީހުން ވިދާޅުވިއެވެ.
ރިއެކްޝަންސް
