ފުލުހުންގެ ވެރިޔާ އާއި ނައިބު ހިމެނޭހެން ފާއިތުވި 24 ގަޑިއިރުގެ ތެރޭގައި ޣައްޒާގައި 70 އަށްވުރެ ގިނަ މަރު
މިއަދު އިރުއެރުމުގެފަހުން މިހާތަނަށް 17 މީހަކު ޣައްޒާގައި ޝަހީދުކޮށްލާފައިވާއިރު, ފާއިތުވެ ދިޔަ 24 ގަޑިއިރުގެ ތެރޭގައި 70 މީހަކު ޣައްޒާގައި ޝަހީދުކޮށްލައިފިއެވެ. ފަލަޞްޠީނުގެ ނޫސްތަކުން ބުނި ގޮތުގައި ފާއިތުވި 24 ގަޑިއިރުގެ ތެރޭގައި އިޒްރާއިލްއިން ވަނީ ޣައްޒާގެ އެކި ސަރަޙައްދުތަކުގައި ނުރައްކާތެރި 34 ހަމަލާއެއް ދީފައެވެ.
ވައިގެ މަގުން ދީފައިވާ މިހަމަލާ ތަކުގައި މުޅިންވެސް މަރުވެފައިވަނީ އާންމުންގެ މީހުން ކަމުގައި ޣައްޒާގެ ސަރުކާރުގެ މީޑިއާ އޮފިސަރާ ޙަވާލާދީ އަލްޖަޒީރާގައި ރިޕޯޓްކޮށްފައިވެއެވެ. ޝަހީދުކޮށްލިމީހުންގެ ތެރޭގައި ޣައްޒާގެ ފުލުހުންގެ ވެރިޔާ އާއި ނައިބު ވެސް ހިމެނެއެވެ.
ގިނަ ހަމަލާތަކެއް ރަފަޙްގެ އަލަ-މަވާސީގެ 'ހިއުމެނިޓޭރިއަން ޒޯނަށް' އަރާފައިވާއިރު އުތުރު ޣައްޒާގެ ޖަބާލިއާ ރެފިއުޖީ ކޭމްޕް ހިމެނޭ ސަރަޙައްދަށް ވެސް ހުއްޓުމެއްނެތި އިޒްރާއިލްއިން ދަނީ ބޮމުގެ ހަމަލާތައް ދެމުންނެވެ.
މީހެ އިތުރުން ޣައްޒާ ސިޓީގެ ރެމަލް, ޝުޖާޔާ އަވަށް އަދި މެދުތެރޭ ޣައްޒާގެ އަޒް-ޒަވައިދާ ޓައުންއަށް އަށް ފާއިތުވި 24 ގަޑިއިރުގެ ތެރޭގައި އިޒްރާއިލްގެ ވައިގެ ހަމަލާތައް އަމާޒުވެފައިވެއެވެ.
ހަމަލާތަކާ ގުޅިގެން އދ ގެ އެޖެންސީ އޮން ޕަލަޞްޠީނިއަން ރެފިއުޖީސް (އަންރްވާ)ގެ ވެރިޔާ ފިލިއްޕޭ ލަޒާރިނީ ވަނީ ދެކުނު ޣައްޒާގެ އަލް-މަވާސީ ރެފިއުޖީ ކޭމްޕަށް ދިން ހަމަލާތަކަކީ އިޒްރާއިލްއިން ހަނގުރާމަ ހުއްޓާލަން ބޭނުންނުވާކަމުގެ އިޝާރާތެއްގެ ގޮތުގައި ސިފަކޮށްފައެވެ.
"އަހަރު ފެށުމާ ދިމާކޮށް އަލަ-މަވާސީއަށް ވަރުގަދަ ހަމަލާތަކެއް ދީ އެތައްބަޔަކު މަރާލައިފި. 'ރައްކާތެރި ސަރަޙައްދެއްގެ' ގޮތުގައި މަވާސީ ކަނޑައަޅާފައި އޮތްއިރު އިޒްރާއިލް އިން އެތަނަށް އެވަރުގެ ހަމަލާތަކެއް ދިނުމުގެ މާނައަކީ ކޮބާކަން އެބައެނގޭ. ހަނގުރާމަ ހުއްޓާނުލާ ކުރިއަށްދާ ކޮންމެ ދުވަހަކީ އެތައް ހަލާކެއް ކުރިމަތި ކުރުވާ ދުވަހެއް" ލަޒާރިނީ ބުނެފައި ވެއެވެ.
އިޒްރާއިލްއިން ބުރާސްފަތި ދުވަހު ވަނީ ޣައްޒާގެ ފޮޓޯ ނޫސްވެރިޔާ ޙަސަން އަލް-ޤިޝޯއީ ވެސް ޝަހީދުކޮށްލާފައެވެ. 7 އޮކްޓޯބަރު 2023 ން ފެށިގެން އިޒްރާއިލްން ވަނީ 217 ނޫސްވެރިއަކު ޣައްޒާގައި ޝަހީދުކޮށްލާފައެވެ.
ރިއެކްޝަންސް
