ބ. އަތޮޅުން ފެށިގެން ތ. އަތޮޅަށް އޮރެންޖު ސަމާލު
ފާއިތުވި ދެތިންދުވަހުން ފެށިގެން ރާއްޖެއަށް މޫސުން ގޯސްވެފައިވާއިރު ބ. އަތޮޅުން ފެށިގެން ތ. އަތޮޅާ ހަމައަށް އޮރެންޖް ސަމާލު ނެރެފިއެވެ. މޫސުމާ ބެހޭ ޤައުމީ އިދާރާއިން މެންދުރު ފަހު ތިނަކުން އިރުއޮށްސި ހަތެއް ޖެހުމާއަހަމަށް ނެރެފައިވާ ސަމާލުގައި ބުނެފައިވާ ގޮތުން އުތުރުގެ ބައެއް ރަށް ރަށް ހިމެނޭހެން މެދުރާއްޖެ ތެރެއަށް ބޯކޮށް ވާރޭވެހި ކަނޑުތައް ގަދަވާނެއެވެ.
ވައިގެ ބާރުމިން އާންމުގޮތެއްގައި 45 މޭލަށް ހުރިއިރު އޮރެންޖް ސަމާލު ނެރެފައިވާ ސަރަޙައްދުތަަކަށް ވިލާގަނޑުގައި 50-60 މޭލަށް ވައިގަދަވާނެކަމަށް ލަފާކުރެެވެއެވެ.
އާއަހަރު ފެށުމާ ދިމާކޮށް އިރުވައި މޫސުމުގެ ހަޅައިގެ ވިއްސާރަ އާއެކު އަވައްޓެރި ސްރީ ލަންކާ ކައިރީގައި އުފެދިފައިވާ ކޮޅިގަނޑުގެ އަސަރު ވަރަށް ބޮޑަށް ރާއްޖެއަށް ދަނީ ކުރަމުންނެވެ.
ފާއިތުވި 24 ގަޑިއިރު އުދަ އެރުމުގެ ސަބަނުން ހަ ރަށެއްގައި ފެންބޮޑުވެ ސިފައިން ދަނީ ހަރަކާތްތެރި ވަމުންނެވެ. އެންމެ ބޮޑަށް ފެންބޮޑުވެގެން ރިފޯޓްކޮށްފައިވަނީ ނ, ނަރުދޫގެ އިތުރުން, ރ. އިނގުރައިދޫ, ދ, ކުޑަހުވަދޫ, ފ. ނިލަންދޫ, ފ. މަގޫދޫ އަދި ދ. މީދޫއިންނެވެ.
ބުދަ ދުވަހުން ފެށިގެން ރާއްޖޭގެ އެކި ސަރަޙައްދުތަށް މޫސުން ގޯސްވެ ބައެއް ސަރަޙައްދުތައް ރީނދޫ ސަމާލު އޮތުމަށްފަހު ބޮޑު ސަރަޙައްދަކަށް އޮރެންޖް ސަމާލު ނެރެފައިވާއިރު މުޅި ރާއްޖެއަށްހެން މިހާރުވެސް މުސުން ގޯހެވެ.
މިހާރު ކުރަމުންދާ ވިއްސާރަ މިހަފުތާ ބަންދަށް ދިގުދެމިގެން ދާނެކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައިވާއިރު މޫސުމް ރަނގަޅުވާނެ ކަމަށް ބެލެވެނީ ހޮނިހިރު ދުވަހުގެ ފަހުންނެވެ.
އޮރެންޖް ސަމާލަކީ ދަތުރުކުރުމަށް ނުރައްކާތެރި ސަމާލެއް ކަމުން ކަނޑު ދަތުރުކުރާ ފަރާތްތަކުން ރައްކާތެރިކަން ހިޔާރުކުރުމަށް އިލްތިމާސްކުރަމެވެ.
ރިއެކްޝަންސް
