މަތިންދާބޯޓް ވެއްޓި 179 މީހަކު މަރުވުން: ދެކުނު ކޮރެއާގެ ތާރީޙްގައި ހިނގި ވައިގެ އެންމެ ނުރައްކާތެރި ހާދިސާ
މުއާން ކައުންޓީ, ދެކުނު ކޮރެއާ, 29 ޑިސެމްބަރު (ރޮއިޓާސް) – އާދިއްތަ ދުވަހު ދެކުނު ކޮރެއާގައި މަތިންދާ ބޯޓެއް ވެއްޓި ހިނގި ނުރައްކާތެރި ހާދިސާގައި 179 މީހަކު މަރުވެފައިކަމަށް ރިޕޯޓްތައް ބުނެފިއެވެ. މިއީ އެޤައުމުގެ ތާރީޚްގައި ވެސް ހިނގި ވައިގެ އެންމެ ނުރައްކާތެރި ހާދިސާއެވެ.
މަތިންދާބޯޓު ޖައްސަން އުޅުމުގެ ތެރޭގައި ބޯޓުގެ ބަނޑުފުށް ވަރަށް ބާރަށް ރަންވޭގައި ކޭއްތި ބޯޓުގައި ވަނީ ހުޅުހިފާފައެވެ. ބޯޓު ގޮވީ މުއާން އިންޓަނޭޝަނަލް އެއަރޕޯޓްގެ ފެންސްގައި ޖެހިފައެވެ.
ޖެޖޫ އެއަރގެ ފްލައިޓް 7C2216 ދަތުރުކުރީ ތައިލެންޑްގެ ވެރިރަށް ބެންގްކޮކް އިން 175 ފަސިންޖަރުންނާއި ހަ ކްރޫ މެމްބަރުންނާއި އެކުއެވެ. މި ހާދިސާގައި ސަލާމަތްވި ދެ ކްރޫ މެމްބަރުންނަށް ލިބިފައިވާ ޒަޚަމްތަކަށް ދަނީ ފަރުވާ ދެމުންމެވެ.
ބޮއިންގ 800-737 މަރުކާގެ ބޯޓު ވެއްޓެނިކޮށް ނަގާފައިވާ ވީޑިއޯއަކުން ފެންނަ ގޮތުގައި ބޯޓު ތިރިއަށްގޮސް ރަންވޭގައި ޖެހުނުއިރުވެސް ބޯޓުގެ ލޭންޑިން ގިއަރު ފެންނާކަށް ނެތެވެ. ހާދިސާގައި ބޯޓު އެއްކޮށްހެން ފުނޑުފުނޑުވި އިރު ކިރިޔާވެސް ބޯޓުގެ ބައެއްހެން ހީވާގޮތަށްވެސް އިނީ ބޯޓުގެ އެންމެ ފަހަތުބައެވެ.
ހާދިސާގައި ސަލާމަތްވި ދެ ކްރޫ މެމްބަރުން ސަލާމަތްކޮށްފައިވަނީ ރޯވެ އަނދަމުންދިޔަ ބޯޓުގެ އެންމެ ފަހަތުބައިންނެވެ. މުއާން އެއަރޕޯޓްގެ ފަޔަރ ޗީފް, ލީ ޖަންގ ހިއުން ނޫސްވެރިންގެ ބައްދަލުވުމުގައި ދިވާޅުވި ގޮތުގައި ސަލާމަތް ކުރެވުނު ދެމީހުން ވަގުތުން ވަނީ ހޮސްޕިޓަލްއަށް ގެންގޮސް ފަރުވާ ދޭން ފަށާފައެވެ. އިދާރާތައް ގުޅިގެން މިހާރުދަނީ ބުރައިގެން ގޮސްފައިވާ ބޯޓުގެ ބައިތަކުގެ ތެރެއިން މަރުވެފައިވާ މީހުންގެ ހަށިތައް އެއްކުރުމުގެ މަސައްކަތް ކުރަމުންނެވެ.
"ތަޙްޤީގް ކުރިއަށް ދޭ އެބަ މިހާރު ބޯޓު ވެއްޓެން މެދުވެރިވި ހާދިސާ އާ ގުޅޭގޮތުން. ދޫންޏެއްގައި ޖެހުނީތޯ ނުވަތަ މޫސުމުގެ ސަބަބުންތޯވެސް އެނގޭނީ ތަޙްޤީގް ނިމުނީމަ" ލީ ވިދާޅުވިއެވެ. އެއަރޕޯޓް އޮތޯރިޓީސްއާ ޙަވާލާދީ ޔޮންހަޕް ނިއުސް އެޖެންސީން ބުނެފައިވާ ގޮތުގައި ދޫންޏެއް ބޯޓުގައި ޖެހި ލޭންޑިން ގިއަރ ހަލާވުމަކީ ހާދިސާ ހިނގަން މެދުވެރިވި ސަބަބެއް ކަމުގައި ވެދާވެއެވެ.
މިއީ 1997 ގެ ފަހުން މަތިންދާ ބޯއްޓެއް ވެއްޓި ދެކުނު ކޮރެއާގައި ހިނގި އެންމެ ހިތާމަވެރި ހާދިސާއެވެ. އެ އަހަރު ދެކުނު ކޮރެއާގެ ބޯޓެއް ގުއާމް އަށް ވެއްޓި ވަނީ 200 މީހުން މަރުވެފައެވެ. އަދި އޭގެ ފަހުން 2002 ވަނަ އަހަރު އެއަރ ޗައިނާގެ ބޯޓެއް ސައުތު ކޮރެއާއަށް ވެއްޓި ހިނގި ހާދިސާއެއްގައި 129 މަރުވި ކަމަށް އެގައުމުގެ ޓްރާންސްޕޯޓް މިނިސްޓްރީގެ ޑާޓާ ތަކުން ދައްކައެވެ.
ރިއެކްޝަންސް
