އޭދަފުށްޓާއި ގުރައިދޫ ކްއާޓާ ފައިނަލަށް
ދެޓީމްވެސް ވަނީ ގްރޫޕްގެ އެއްވަނަ ހޯދާފަ
ނައިންޓީ ޕްލަސް ގޯލްޑްކަޕްގެ ކްއާޓާ ފައިނަލުން އޭދަފުށްޓާއި ކ.ގުރައިދޫ ޖާގަ ޔަގީން ކޮށްފިއެވެ. ދެޓީމްވެސް ކްއާޓާ ފައިނަލް ޔަގީން ކުރީ ދެޓީމް ހިމެނޭ ގްރޫޕްގެ އެއްވަނަ ޓީމްގެ ގޮތުގައެވެ.
ގުރައިދޫ ކްއާޓާ ފައިނަލަށް ދަތުރުކުރީ ދެ މެޗުންވެސް މޮޅުވެ ހަ ޕޮއިންޓާއެކުއެވެ. ފުރަތަމަ މެޗުގައި ތިމަރަފުށި 1-0 ން ބަލިކޮށް, ފަހު މެޗުގައި ރޭ ހަމަ އެނަތީޖާއިން ފުވައްމުލައް ސިޓީ ބަލިކުރިއެވެ. މިއާއެކު ފުވައްމުލަކާއި ތިމަރަފުށި ޕޮއިންޓާއި ގޯލްގެ ތަފާތުންވެސް އެއްވަރުވިއެވެ. އެދެޓިމް ވާދަކުރި މެޗު 1-1 ން އެއްވަރުވެފައި ވާތީ, އެދެޓީމްވެސް އޮތީ ޕޮއިންޓަކާއެކު ފައިދާ ގޯލެއް ނެތިއެވެ. އެހެންކަމުން އެދެޓީމްގެ ތެރެއިން ކްއާޓާ ފައިނަލްގެ ޖާގަ ލިބޭ ޓީމެއް ކަނޑައަޅަން ޖެހޭނީ ގުރުއަތު ލައިގެންނެވެ. ތިން ޓީމް ހިމެނޭ ކޮންމެ ގްރޫޕަކުން ދެޓީމް ކްއާޓާ ފައިނަލަށް ދަތުރުކުރާނެ އެވެ.
އޭދަފުށި ކްއާޓާ ފައިނަލަށް ދަތުރުކުރީ މޮޅުވާން މަޖުބޫރު މެޗުގައި 4-1 ން ހއ.ދިއްދޫ ބަލިކޮށްގެންނެވެ. އެނަތީޖާއާއެކު އޭދަފުށްޓާއި, ދިއްދޫގެ އިތުރުން މާފުށްޓަށްވެސް ލިބުނީ ތިން ޕޮއިންޓެވެ. އޭދަފުށްޓަށް ގްރޫޕްގެ އެއްވަނަ ލިބެނީ ގޯލްގެ ތަފާތުންނެވެ. އަދި ދިއްދޫ ކަޓާ މާފުށްޓަށް ދެވަނަ ލިބެނީވެސް ގޯލްގެ ތަފާތުންނެވެ.
ދިއްދޫ އަތުން އޭދަފުށި މޮޅުވި މެޗުގައި ލީޑް ނަގައިދިނީ އަލީ ނަސީމް އެވެ. ދެވަނަ ލަނޑު ޖެހީ ޖައުޝަން މުޙައްމަދެވެ. ފަހު ދެ ލަނޑު ޖެހީ މުޙައްމަދު ފާސިރު އެވެ. އޭދަފުށިން ހަތަރު ލަނޑު ޖެހިފަހުން ދިއްދޫގެ ހަމައެކަނި ލަނޑު ޖެހީ ހުސައިން ޒިމްޔާން އެވެ.
ރިއެކްޝަންސް
