މަސްތުވާތަކެތި ވިއްކާ, މަނީ ލޯންޑަރ ކުރަމުންދިޔަ ބޮޑު ނެޓްވޯކެއް ފުވައްމުލަކު ސިޓީން އަތުލައިގެންފި
ޑްރަގް ވިއްކާ, މަނީ ލޯންޑަރ ކުރަމުންދިޔަ ބޮޑު ނެޓްވޯކެއް ފުވައްމުލަކު ސިޓީން އަތުލައިގެންފިއެވެ. ދިވެހި ފުލުހުންގެ ޚިދުމަތުން މިއަދު ޢާއްމުކުރި ބަޔާނެއްގައި ބުނީ އެނެޓްވޯކް އަތުލައިގަތީ މިއަހަރުގެ ޖެނުއަރީ 14 ވަނަ ދުވަހުން ފެށިގެން ފުވައްމުލައް ސިޓީގައި ކުރިއަށްގެންދާ ޖޮއިންޓް އޮޕަރޭޝަނެއްގައި ކަމަށެވެ.
'އޮޕަރޭޝަން ވެށިރައްކަލް' ގެ ނަމުގައި ކުރިއަށްގެންދާ އޮޕަރޭޝަންގައި މިހާތަނަށް ފުލުހުން ވަނީ އިސްކޮށް ހަރަކާތްތެރިވާ ދެމީހަކު ހައްޔަރުކޮށްފައެވެ. އެއީ ފުވައްމުލަކު ދޫޑިގަން ކަރަންކާވިލާ އަހުމަދު ނިއުޝާދު (34) އާއި ފުވައްމުލަކު ދޫޑިގަން ޒަމާނީގެ ޙަސަން އާޒިމް (29) އެވެ. ކޯޓް އަމުރެއްގެ ދަށުން އެދެމީހުން ހައްޔަރުކުރީ އިއްޔެއެވެ.
ފުލުހުން ބުނީ މީގެތެރެއިން ނިއުޝާދުގެ ބޭންކް އެކައުންޓު މެދުވެރިކޮށް މިދިޔަ ފަސް އަހަރުގެ ތެރޭގައި 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ. އަދި ހަސަން އާޒިމްގެ އެކައުންޓް މެދުވެރިކޮށް މިދިޔަ ދެ އަހަރުގެ ތެރޭގައި 7 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ފުލުހުން ބުންޏެވެ.
މިއޮޕަރޭޝަންގެ ދަށުން މިހާތަނަށް 4048 ހޮޓްސްޕޮޓް ބަލާ ފާސްކޮށް, 1147 މީހުން ހުއްޓުވާ ސުވާލުކޮށް ބަލާ ފާސްކޮށް, 58 މީހުން ހައްޔަރުކޮށްފައިވާ ކަމަށް ފުލުހުން ބުންޏެވެ. ހައްޔަރުކުރި މީހުންގެ މައްޗަށް ތުހުމަތުކުރެވޭ 75 މައްސަލައެއް ތަހުގީގުކޮށް, 65 މައްސަލައެއްގެ ތަހުގީގު ނިންމާ ޕީޖީއަށް ފޮނުވާފައިވާ ކަމަށް ފުލުހުން ބުންޏެވެ.
މަސްތުވާތަކެތީގެ ވިޔަފާރިކޮށް މަނީ ލޯންޑަރ ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތު ކުރެވޭ ފަރާތްތަކާއި, އެމީހުންނަށް އެހީތެރިވާ ފަރާތްތައް ދެނެގަނެވިފައިވާ ކަމަށްވެސް ފުލުހުން ބުންޏެވެ. ފުލުހުންގެ އޮޕަރޭޝަންގައި މިހާތަނަށް 21 މީހަކާއި 2 މީހެއްގެ އެކައުންޓް ކޯޓް އަމުރެއްގެ ދަށުން ވަނީ ހިފަހައްޓާފައެވެ. ފުލުހުން ބުނީ އެފަރާތްތަކުގެ މައްޗަށް ތުހުމަތު ކުރެވޭ މަނީލޯންޑަރިންގެ މައްސަލަ ތަހުގީގުކުރަމުންދާ ކަމަށެވެ.
ފުލުހުން ވަނީ މިއޮޕަރޭޝަންގައި ފުވައްމުލައް ސިޓީގެ ރައްޔިތުންގެ ފަރާތުން ލިބޭ އެއްބާރުލުން ފާހަގަކޮށްފައެވެ.
ރިއެކްޝަންސް
