މަސްތުގެ ހާލަތުގައި ހުރެ ފުލުހުންނަށް ބިރުދައްކާ އިންޒާރުދިން މީހަކު ކޯޓުން ދޫކޮށްލައިފި
މަސްތުގެ ހާލަތުގައި ހުރެ ފުލުހުންނަށް ބިރުދައްކާ އިންޒާރުދިން މީހަކު ކޯޓުން ދޫކޮށްލައިފިއެވެ. ދިވެހި ފުލުހުންގެ ޚިދުމަތުން ބުނީ އެފަދަ މައްސަލައެއްގައި ހއ.ހޯރަފުށިން ހައްޔަރުކުރި މީހަކު ކޯޓަށް ގެންދިއުމުން ކޯޓުން ދޫކޮށްލާފައިވާ ކަމަށެވެ.
ފުލުހުން ބުނީ 30 އަހަރުގެ މީހާ ހައްޔަރުކުރީ މަސްތުގެ ހާލަތުގައި ހުރެ ފުލުހުންނަށް ބިރުދައްކާ އިންޒާރުދީ, ހަޑިހުތުރު ބަހުން މުއާމަލާތްކުރި ކަމުގެ ތުހުމަތުގައި ކަމަށެވެ. އޭނާ ހައްޔަރުކުރީ މިދިޔަ ނޮވެމްބަރު މަހުގެ 27 ވަނަ ދުވަހުއެވެ. ކޯޓަށް މުއްދަތު ޖަހަން ގެންދިއުމުން, ކޯޓުން ދޫކޮށްލީ ޖެހިގެން އައި ދުވަހުއެވެ. ކޯޓުން އޭނާ ދޫކޮށްލީ ޝަރުތު ކުރުމަށްފަހު ކަމަށް ފުލުހުން ބުންޏެވެ.
މިމައްސަލައާ ގުޅިގެން ބަންދުގައިހުރި އިރު އެމީހާއަށް އަނިޔާކުރިކަމުގެ ތުހުމަތުތަކެއް ދަނީ ކުރަމުންނެވެ. ނަމަވެސް ފުލުހުން ބުނީ އެފަދަ ޝަކުވާއެއް އެއިދާރާއަށް ހުށަހެޅިފައި ނުވާ ކަމަށެވެ. އެފަދަ ޝަކުވާއެއް އޮތްނަމަ އުސޫލުގެ ތެރެއިން ހުށަހެޅައިގެން ބެލުމަށް ހިތްވަރުދޭ ކަމަށް ފުލުހުން މީޑިޔާތަކަށް ފޮނުވި މެސެޖްގައި ބުނެފައި ވެއެވެ.
ފުލުހުން ބުނީ އެފަދަ ތަހުގީގުތަކަށް ފުލުހުންގެ މުއައްސަސާއިން ފުރިހަމަ އެއްބާރުލުން ދޭނެ ކަމަށެވެ.
ރިއެކްޝަންސް
