ފައްޔާޒު ދެއްކެވި ވާހަކަ ތަހުގީގުކުރަން ގޮވާލާ ކުއްލި މައްސަލައެއް ހުށަހަޅައިފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަށް ހަދަން ޖެހޭނީ ކުރީގެ ރައީސް މުހައްމަދު އަމީނަށް ހެދިގޮތަށް ކަމަށް ވިދާޅުވެ, އެމްޑީޕީގެ ޗެއަރޕަސަން ފައްޔާޒު އިސްމާއީލް ދެއްކެވި ވާހަކައަކީ ޓެރަރިޒަމްގެ އަމަލެއް ކަމަށް ބުނެ, އެކަން ތަހުގީގުކުރަން ގޮވާލާ ރައްޔިތުންގެ މަޖިލިހަށް ކުއްލި މައްސަލައެއް ހުށަހަޅައިފިއެވެ. މައްސަލަ ހުށަހެޅުއްވީ މިލަންދޫ ދާއިރާގެ މެމްބަރު ހަސަން މުފީދެވެ. ޕީއެންސީގެ ސުޕަރ މެޖޯރިޓީ އޮތް މަޖިލިހުން މައްސަލަ ބަލައިގަނެ ވަނީ ބަހުސްކުރަން ފަށާފައެވެ.

މެމްބަރު ހަސަން މުފީދު ހުށަހެޅުއްވި ކުއްލި މައްސަލާގައި ފައްޔާޒުގެ ނަމެއް ނުގެންނަވައެވެ. މައްސަލައިގައި ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ހަދަންޖެހޭނީ އަމީނަށް ހެދިގޮތްކަމުގައި ބުނެ, ޓެރެރިޒަމްގެ އަމަލެއް ކުރުމަށް ހިތްވަރުދީ މޯލްޑިވިއަން ޑިމޮކްރެޓިކް ޕާޓީ އެމްޑީޕީން އެކިއެކި ޕޯޑިއަމްތަކުގައި ވާހަކަދައްކާފައިވާތީ އެކަން ތަހުގީގު ކުރުމަށް ތަހުގީގީ އިދާރާތަކަށް ގޮވާލާ ކަމަށެވެ. މައްސަލައިގައި ފާހަގަކުރައްވާފައިވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަކީ ޤާނޫނު އަސާސީގައި ބަޔާންކޮށްފައިވާ ގޮތުގެ މަތީން ދިވެހިރައްޔިތުންގެ ތަނަވަސް އަޣްލަބިއްޔަތަކުން އިންތިޚާބުކުރެވިފައިވާ ދިވެހިރާއްޖޭގެ ރައީސުލްޖުމްހޫރިއްޔާ ކަމަށެވެ. އަދި ރައީސުލްޖުމްހޫރިއްޔާގެ މަޤާމްގެ ދައުރު ނިމޭނެ ހާލަތް ޤާނޫނު އަސާސީގައި ސާފްކޮށް ބަޔާންކޮށްފައިވާ ކަމަށާއި, އެފަދަ ހާލަތެއް ނެތީސް ޤާނޫނު އަސާސީގައި ކަނޑައެޅި ބަޔާންކޮށްފައިވާ ގޮތާ ހިލާފަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ހަދަން ޖެހޭނީ އަމީނަށް ހެދިގޮތްކަމުގައި ބުނެ, ޓެރަރިޒަމްގެ އަމަލެއް ކުރުމަށް ޕޯޑިއަމްތަކުގައި އެމްޑީޕީން ހިތްވަރު ދެމުންދާ ކަމަށް ބުނެފައިވެއެވެ.

ޓެރަރިޒަމް މަނާކުރުމުގެ ޤާނޫނުގައި ސީދާ ގޮތުން އަދި ނުސީދާ ގޮތުންވެސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށް ބަޔާންކޮށްފައިވާ ކަމަށާއި, އެވާހަކަތަކަކީ (ފައްޔާޒު ދެއްކެވި) ވަކި ސިޔާސީ ފިކުރެއް ކުރިއެރުވުމަށް އަދި ޢާއްމުންގެ ބައެއްގެ މެދުގައި ބިރުވެރިކަން އުފެއްދުމަށް އަދި އެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމުގެ މަޤްސަދުގައި ޓެރަރިޒަމްގެ އަމަލެއް ކުރުމަށް ހިތްވަރުދީ ދައްކާފައިވާ ވާހަކަތަކެއް ކަމަށްވެސް މައްސަލައިގައި ބުނެފައިވެއެވެ.

ކުއްލި މައްސަލަ ހުށަހެޅުއްވީ އެ ވާހަކަތަކަކީ ޓެރަރިޒަމްގެ މަނާކުރުމުގެ ޤާނޫނުގެ ދަށުން ކުށެއް ކަމަށްވާތީ އެކަން ސަރުކާރުގެ ސަމާލުކަމަށް ގެނައުމަށާއި, ތަހުގީގުކޮށް ފިޔަވަޅު އެޅުމަށް ކަމާބެހޭ އިދާރާތަކަށް ގޮވާލުމަށް ކަމަށް ހަސަން މުފީދު ހުށަހެޅުއްވި މައްސަލައިގައި ބުނެފައިވެއެވެ.

މައްސަލައަސް ބަހުސް ކުރައްވަމުން ޕީއެންސީގެ ބައެއް މެމްބަރުން ވަނީ ފައްޔާޒު ހައްޔަރު ކުރުމަށްވެސް ގޮވާލައްވާފައެވެ.

އެފަދައިން ފައްޔާޒު ވާހަކަދެއްކެވީ އިއްޔެ އެޕާޓީން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުންނެވެ. ފައްޔާޒު އެވާހަކަ ދެއްކެވީ ކުޅުދުއްފުށީގައި އެމްޑީޕީން ބޭއްވި ޖަލްސާއެއްގައި މީހަކު ކުރީގެ ރައީސް އަމީން އާއި ގުޅުވާ ދެއްކި ވާހަކައެއް ދިފާއު ކުރައްވަމުންނެވެ. ފައްޔާޒު ވިދާޅުވީ ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދޮގޮތް ކަމަށެވެ.

ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުالله ވެސް ވަނީ ފައްޔާޒު ދެއްކެވި ވާހަކައަކީ ޓެރަރިޒަމްގެ އަމަލެއް ކަމަށް ވިދާޅުވެފައެވެ. އެކްސްގައި ކުރެއްވި ޕޯސްޓެއްގައި އަބްދުއްރަހީމް ވިދާޅުވީ އެއީ ސީދާ ޓެރަރިޒަމްއަށް ހިތްވަރު ދިނުމުގެ އަމަލެއް ކަމަށެވެ. އެކަން މުއައްސަސާތަކުން ސީރިއަންކޮށް ބަލަން ޖެހޭނެ ކަމަށެވެ.