މާދަމާއިން ފެށިގެން މަސްވެރިންނަށް 48 ގަޑިއިރުގެ ތެރޭގައި ފައިސާ ލިބޭނެ
މަސްވެރިންގެ ބެކްލޮގެއް މިހާރު ނޯންނާނެ
މާދަމާއިން ފެށިގެން މަސްވެރިންނަށް 48 ގަޑިއިރުގެ ތެރޭގައި ފައިސާ ލިބޭނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނުގެ ރިޔާސީ ވައުދާ އެއްގޮތަށް މަސް ކިރުވާތާ 48 ގަޑިއިރުގެ ތެރޭގައި ފައިސާ ދޭން މާދަމާ ފައްޓަވާނެކަން އިއުލާނުކުރެއްވީ މިއަދު ހެނދުނު ކ.ގާފަރުގައި އެރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ ބޭންކް އޮފް މޯލްޑިވްސް (ބީ.އެމް.އެލް)ގައި އެކައުންޓް ހުޅުވާފައިވާ މަސްދޯނިތަކަށް، މާދަމާ އިން ފަށައިގެން، މަސް ކިރުވާތާ 48 ގަޑިއިރުގެ ތެރޭގައި ފައިސާ ޖަމާވާނެ ކަމަށެވެ.
މިސަރުކާރު ހަވާލުވިއިރު މަސްވެރިންނަށް ނުދީ ހުރި ފައިސާއާއެކު، ސަރުކާރުން މަސައްކަތް ކުރެއްވީ އެފައިސާ ހަލާސްކޮށް، ވައުދާ އެއްގޮތަށް ފައިސާ ދެއްވަން ފެއްޓެވުނަށެވެ. މިއަދު މަސްވެރިންނަށް 38 މިލިއަން ރުފިޔާ ވަނީ ދޫކޮށްފައެވެ. އެއީ ކުރީ ސަރުކާރުން ނުދައްކާހުރި ފައިސާކަމަށް ރައީސް ވިދާޅުވިއެވެ.ރައީސުލްޖުމްހޫރިއްޔާ ވިދާޅުވީ ފާއިތުވެދިޔަ 14 ދުވަހުގެ ތެރޭގައި މަސްވެރިންނަށް ދައްކަން ޖެހިފައި އޮތް 38 މިލިއަން ރުފިޔާ، މިއަދު ހެނދުނުގެ ވަގުތެއްގައި ދައްކައި ޚަލާސް ކުރެވިފައިވާކަމަށެވެ. ބީ.އެމް.އެލްގައި އެކައުންޓް ހުޅުވާފައިވާ 196 ބޭފުޅަކަށް 32.4 މިލިއަން ރުފިޔާ، އަދި، އެމް.އައި.ބީގައި އެކައުންޓް ހުޅުވާފައިވާ 20 އޮޑިވެރިއަކަށް 5.6 މިލިއަން ރުފިޔާ ޖަމާކޮށްފައިވާ ކަމަށް ވިދާޅުވިއެވެ. މިއާއެކު މަސްވެރިންނަށް ދޭންޖެހޭ ފައިސާގެ ބެކްލޮގް ނިމުނީ ކަމަށާ، ކުރިއަށް އޮތް ތަނުގައި އެފަދަ ބެކްލޮގެއް ކުރިމަތި ނުވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
ރައީސުލްޖުމްހޫރިއްޔާ ވަނީ، މަސްވެރިންނަށް ކުރިމަތިވެފައިވާ ތެލުގެ ދަތިކަމަށްވެސް ޙައްލު ހޯއްދަވައި ދެއްވައި، އެކަންވެސް އިޢުލާންކުރައްވާފައެވެ. އެގޮތުން، މި އަހަރު މަސްވެރިންގެ ދުވަސް ކަމުގައި ވާ ޑިސެމްބަރ 10 ވަނަ ދުވަހުން ފަށައިގެން، 4 ރަށެއްގައި ހުންނަ އެސް.ޓީ.އޯ ނުވަތަ އެފް.އެސް.އެމް ސައިޓްތަކުން "އެސްޓީއޯ ރޭޓް"ގައި މަސްވެރިންނަށް ތެޔޮ ލިބޭނެކަމުގެ ޔަޤީންކަން، ދެއްވިއެވެ. އެއީ ކ. ހިންމަފުށި، ގއ. ކޫއްޑޫ، ޅ.ފެލިވަރު އަދި ސ. ހުޅުމީދޫއެވެ. އަދި ގއ. ކޫއްޑޫ، އަދި ޅ.ފެލިވަރު ސަރަޙައްދުގައި ހަރަކާތްތެރިވާ މިފްކޯގެ ބޯޓުފަހަރުންވެސް "އެސްޓީއޯ ރޭޓް"ގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސެވުމަށް އެސް.ޓީ.އޯއިން މަސައްކަތް ކުރައްވަމުން ގެންދަވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސް މުއިއްޒު ވިދާޅުވީ މިސަރުކާރުން މަސްވެރި ސިނާއަތަށް ވަރަށްބޮޑު އިސްކަމެއް ދެއްވާ ކަމަށާއި، މަސްވެރިންގެ ކަންކަން މަސްވެރިންގެ އަތްމައްޗަށް ދޫކޮށްލާ، ފުރުޞަތުތައް ފަހިކޮށްދެއްވާނެ ކަމަށެވެ. މާދަމާއަކީ މިއަހަރުހެ މަސްވެރިންގެ ދުވަހެވެ.
ރިއެކްޝަންސް
