ދޮޅުމަހެއްހާ ދުވަހުގެ ތެރޭގައި ނިއުރޭޑިއަންޓްގެ ޓީމް އެކުލަވާލެވޭނެ- މުބީން
ދޮޅުމަހެއްހާ ދުވަހުގެ ތެރޭގައި ނިއުރޭޑިއަންޓްގެ ޓީމް އެކުލަވާލެވޭނެ ކަމަށް އެކްލަބާ ހަވާލުވި އާ ޗެއަރމަން އަހުމަދު މުބީން ވިދާޅުވެއްޖެއެވެ. ކްލަބްގެ މަސައްކަތްތަކުގެ މައުލޫމާތު ހިއްސާކުރަން މިއަދު ބޭއްވި ނޫސްވެރިންގެ ބައްދަލުވުމުގައި މުބީން ވިދާޅުވީ މިހާރު ކޯޗެއް ހޯދުމުގެ މަސައްކަތުގައިވެސް ތިން ކޯޗެއް ޝޯޓްލިސްޓް ކުރެވިފައިވާ ކަމަށެވެ.
ޓީމަށް ކުޅުންތެރިން ހޯދަން މުޅިރާއްޖެއަށްވެސް ހުޅުވާލާނެ ކަމަށް މުބީން ވިދާޅުވިއެވެ. އޭނާ ވިދާޅުވީ ނިއުރޭޑިއަންޓަކީ އާދައިގެ ކްލަބެއްނޫން ކަމަށާއި, ނިއުރޭޑިއަންޓް މިހާރު އޮތް ހާލަތުގައި ބާއްވައިގެން ފުޓްބޯޅަ ކުރިނާރާނެ ކަމަށެވެ. ނިއުރޭޑިއަންޓާ ހަވާލުވެ މަސައްކަތް ފެށީ އެސަބަބަށްޓަކާ ކަމަށް ވިދާޅުވިއެވެ.
" އަޅުގަނޑުމެންގެ އުއްމީދަކަށް ވަނީ ކުރިއަށް މިއޮތް ގާތްގަނޑަކަށް ދޮޅުމަހެއްހާ ދުވަހުގެ ތެރޭގައި ޓީމެއް އެކުލަވާލެވި ޓީމްގެ ޕްރެކްޓިސް ފެށުމުގެ އިންތިޒާމްތައް ހަމަޖެއްސޭތޯ. އެމަސައްކަތް މިހާރު ކުރަމުން މިއަންނަނީ." މުބީން ވިދާޅުވިއެވެ.
މީގެއިތުރުން ނިއުރޭޑިއަންޓްގެ އެކަޑަމީވެސް ޖެނުއަރީ މަހުގެ މެދުތެރޭގައި ފެށޭނެ ކަމަށް އޭނާ ވިދާޅުވިއެވެ. އެގޮތުން ފުރަތަމަ އެކަޑަމީ ފަށާނީ ހުޅުމާލޭގައި ކަމަށް ވިދާޅުވިއެވެ. އޭގެފަހުން ބޮޑަތި އާބާދީތަކުގައި އެކަޑަމީތައް ފަށާނެ ކަމަށާއި, އެމަސައްކަތް ކުރާނީ ކައުންސިލްތަކާއި, ޖަމްއިއްޔާތަކާ ގުޅިގެން ދެފަރާތަށް ފައިދާވާނެ ގޮތަށް ކަމަށް މުބީން ވިދާޅުވިއެވެ. އޭނާ ވިދާޅުވީ މުޅިރާއްޖެއަށް ނިއުރޭޑިއަންޓް ފެތުރިގެންދާނެ ކަމަށެވެ.
ނިއުރޭޑިއަންޓް ކުރީގެ ހާލަތަށް ގެންދިއުމަށް ކުރާ މަސައްކަތުގައި ވަރަށްގިނަ ވިޔަފާރިތަކާއި, އަމިއްލަ ފަރާތްތަކުގެ އެހީ ލިބެމުންދާކަންވެސް އޭނާ ފާހަގަކުރެއްވިއެވެ.
ރިއެކްޝަންސް
