އެސްޓަންވިލާ އަތުންވެސް ބަލިވެ ސިޓީ ގަދަ ފަހަކުން ވެސް ބޭރު,ބޮޑު މޮޅާކާއެކު އާސެނަލް އިން ފަރަގު ކުޑަކޮށްފި
އިނގިރޭސި ޕްރިމިއަރ ލީގުގައި މެންޗެސްޓަރ ސިޓީ އެސްޓަންވިލާ އަތުންވެސް ބަލިވެ ތާވަލްގެ ގަދަ ފަހަކުން ބޭރުވެއްޖެއެވެ. ސިޓީއަށް ދިމާވެފައިވާ 'ކްރައިސިސް' އިން ސަލާމަތް ނުވެ އުޅެނިކޮށް އާސެނަލްއިން ކްރިސްޓަލް ޕެލަސް ބަލިކޮށް ވަނީ ތާވަލްގެ ތިން ވަނަ އަށް ޖެހިލާ, ދެވަނައިގައި އޮތް ޗެލްސީ އާ ދެމެދު އޮތް ޕޮއިންޓްގެ ފަރަގު ކުޑަކޮށްފައެވެ.
އެންމެފަހުގެ ޗެމްޕިއަން މެންޗެސްޓަރ ސިޓީ, ލީގު ތާވަލް ގެ ހަވަނަ އަށް ސޮއްސާލާފައިވާއިރު ހޮނިހިރު ދުވަހު އެސްޓަންވިލާ އަތުން ސިޓީ ބަލިވީ 1-2 ންނެވެ. އެސްޓަންވިލާގެ ދަނޑުގައި ކުޅުނު މެޗުގައި ފުރަތަމަ ދެ ގޯލްވެސް ކާމިޔާބުކުރީ އެސްޓަން ވިލާއިންނެވެ.
އެސްޓަން ވިލާގެ ފުރަތަމަ ގޯލް 16 ވަނަ މިނިޓްގައި ޖޯން ޑުރާން ކާމިޔާބުކުރިއިރު 65ވަނަ މިނިޓްގައި ދެވަނަ ގޯލް ކާޏިޔާބުކުރީ މޯގަން ރޮޖާސްއެވެ. ސިޓީއަށް ސުން ކަނޑުވާދިނީ މެޗުގެ ފުރިހަމަވަގުތު ހަމަވެ, އިތުރު ވަގުތުގެ ތިންވަނަ މިނިޓްގައެވެ. ސިޓިގެ ހަމައެކަނި ގޯލް ފިލް ފޯޑެން ކާމިޔާބުކުރިއިރު ފުރަތަމަ ހާފުގައި ގޯލާ އަމާޒުކޮށް ފޯޑެން ފޮނުވާލި ބޯޅަ އެސްޓަން ވިލާގެ ކީޕަރު އެމީ މާޓިނޭޒް ވަނީ ދިފާއުކޮށްފައެވެ.
ސިޒަންގައި ސިޓީ އެންމެ ފަހުން ކުޅުނު 12 މެޗުގެ ތެރެއިން 9 މެޗުން ބަލިވެފައިވާއިރު ޕްރިމިއަރ ލީގު ތާވަލްގެ ހަ ވަނައިގައި ސިޓީ އޮތީ 27 ޕޮއިންޓާއެކުއެވެ. 28 ޕޮއިންޓާއެކު އެސްޓާންވިލާ ތާވަލްގެ ފަސްވަނަ އަށް ޖެހިލިއިރު, ތާވަލްގެ އެއްވަނަ މަޤާމްގައި 36 ޕޮއިންޓާއެކު އާސެނަލް އޮތީ ދެ މެޗު މަދުން ކުޅެގެންނެވެ.
އާދިއްތަ ދުވަހު އާސެނަލް އާއި ކްރިސްޓަލް ޕެލަސް ކުޅުނު މެޗުން ކްރިސްޓަލް ޕެލަސްގެ މައްޗަށް އާސެނަލް ކުރި ހޯދީ 5-1 ގެ ނަތީޖާއަކުންނެވެ. މުޅި މެޗު ޑޮމިނޭޓްކޮށް އާސެނަލްއިންއިން ވަނީ މޮޅު ކުޅުމެއް ދައްކާފައެވެ. މެޗުގެ އެންމެ ހަ ވަނަ މިނިޓްގައި އާސެނަލްއަށް ލީޑު ނަގައިދިނީ ގެބްރިއެލް ޖީސަސްއެވެ. 11 ވަނަ މިނިޓްގައި ޕެލަސްގެ ހަމައެކަނި ގޯލް އިސްމައިލާ ސަރް ކާމިޔާކޮށް ނަތީޖާ އެއްވަރު ކުރިއެވެ. ނަމަވެސް އޭގެ ތިންމިނިޓް ފަހުން ތޯމަސް ޕާޓޭ ތަނަވަސްކޮށްދިން ފުރުޞަތެއްގައި އާސެނަލް އަށް ދެވަނަ ފަހަރުވެސް ލީޑު ނަގައިދިނީ ގެބްރިއެލް ޖީސަސްއެވެ.
އާސެނަލްގެ ތިންވަނަ ގޯލް 38 ވަނަ މިނިޓްގައި ކައި ހަވާޓްސް ފަސޭހަކަމާއެކު ކާމިޔާބުކުރިއިރު 60 ވަނަ މިނިޓްގައި ހަތަރުވަނަ ގޯލް ކާމިޔާބުކޮށް ލީޑު ފުޅާކޮށްދިނީ ގެބްރިއެލް މާޓިނެލީ އެވެ. އޭނާއަށް ފުރުޞަތު ތަނަވަސްކޮށްދިނީ ޑެކްލަން ރައިސްއެވެ. އަދި އާސެނަލްގެ 5 ވަނަ ގޯލް 80 ވަނަ މިނިޓްގައި ރައިސް ކާމިޔާބު ކުރިއިރު އޭނާއަށް އެހީތެރިވީ ރިކާޑޯ ކަލަފިއޯރީއެވެ.
މި ނަތީޖާ އާއެކު އާސެނަލް އަށް ތާވަލްގެ ތިންވަނަ މަޤާމް ލިބެނީ 33 ޕޮއިންޓައެކުއެވެ. ދެވަނައިގައި 34 ޕޮއިންޓާއެކު އޮތް ޗެލްސީ އާދިއްތަދުވަހު ކުޅޭނީ އެވަރޓަން އާ ދެކޮޅަށެވެ.
ހޮނިހިރު ދުވަހު ކުޅުނު އިތުރު މެޗުތަކަށް ބަލާއިރު ނޮޓިންގހަމް ޕޮރެސްޓް އިން ބްރެންޓްފޯޑް ބަލިކުރީ 2-0 ންނެވެ. ނިއުކާސަލް ޔުނައިޓަޑްއިން އިޕްސްވިޗްޓައުން ގެ މައްޗަށް 4-0 ން ކުރިހޯދިއިރު ވެސްޓްހެމް ޔުނައިޓަޑް އާއި ބްރައިޓަން ބައްސަލުކުރި މެޗު ނިމުނީ 1-1 ން އެއްވަރުވެގެންނެވެ.
ރިއެކްޝަންސް
