ނަހަމަ ގޮތުގައި ފައިސާ ހޯދަމުންދިޔަ އިމިގްރޭޝަން އޮފިސަރުންތަކެއްގެ މައްސަލަ ފުލުހުން ތަހުގީގު ކުރަނީ
ނަހަމަ ގޮތުގައި ފައިސާ ހޯދަމުންދިޔަ އިމިގްރޭޝަން އޮފިސަރުންތަކެއްގެ މައްސަލަ ތަހުގީގު ކުރަމުންދާ ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެ އެވެ. މިރޭ ކުރެއްވި ޕޯސްޓެއްގައި މިނިސްޓަރ އިހުސާން ވިދާޅުވީ ބިދޭސީންނާ ގުޅުންހުރި ބައެއް ކަންކަންކޮށް, ނަހަމަ ގޮތުގައި ފައިސާ ހޯދަމުންދާކަމަށް ތުހުމަތުކުރެވޭ އިމިގްރޭޝަންގެ ފަސް އޮފިސަރެއްގެ މައްސަލަ ބަލަމުންދާކަމަށެވެ.
ބަލަމުންދަނީ ޤާނޫނާ ޤަވާއިދާ ހިލާފަށް ބިދޭސީންނާ ގުޅުންހުރި ބައެއް ކަންކަން ކުރަމުންދިޔަ އޮފިސަރުންތަކެއްގެ މައްސަލަ ކަމަށް ވަޒީރު ވިދާޅުވިއެވެ. އަދި އެމީހުން އެކި ފަރާތްތަކުގެ އަތުން ނަހަމަ ގޮތުގައި ފައިސާ ހޯދަމުންދާ ކަމަށްވެސް ވަނީ ތުހުމަތުކޮށްފައެވެ. އެމައްސަލަތައް ބަލަމުންދަނީ ފުލުހުން މެދުވެރިކޮށެވެ. ވަޒީރު ވިދާޅުވީ ޔުނިފޯމް އެޅި މުއައްސަސާތަކުގައި ތިބެ އެޔުނީފޯރމްގެ ހުރިމަތް ކަނޑަށް ޖާގައެއް ނުދެއްވާނެ ކަމަށެވެ.
" ޔުނިފޯރމުއެޅި މުއައްސަސާތަކުގެ ތެރޭގައިތިބެ ޔުނިފޯރމުގެ ހުރުމަތްކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރު ގެއްލުވަމުންދާ ފަރާތްތަކާ ދޭތެރޭ ޤާނޫނީގޮތުން އެޅޭ އެއްމެ ހަރުކަށިފިޔަވަޅު އެޅުމަކީ ރައީސުލްޖުމްހޫރިއްޔާ އަޅުގަނޑަށް އަންގަވާފައިވާކަމެއް." ވަޒީރު ވިދާޅުވިއެވެ.
ވަޒީެރު ވިދާޅުވީ މިފަދަ ކަންކަމަކީ މިސަރުކާރުން އެއްވެސް ވަރަކަށް ތަހައްމަލު ކުރާނެ ކަންކަމެއްނޫން ކަމަށެވެ. މި މައްސަލާގައި މިހާރު ވާނީ މި ތުހުމަތު ކުރެވޭ ފަރާތްތަކުން ބޭނުންކުރާ އިލެކްޓްރޯނިކް ސާމާނު ހިފެހެއްޓި ދިރިއުޅޭ ތަންތަން ބަލައި ފާސްކުރެވިފައި ކަމަށް ވަޒީރު ވިދާޅުވިއެވެ. މިމައްސަލައިގެ އިތުރު ތަފްސީލުތައް ތަހުޤީގު ކުރިއަށްދާވަރަކުން ފުލުހުނާއި ކަމާއިބެހޭ އެހެން އިދާރާތައް ގުޅިގެން ހާމަކުރަމުންދާނެ ކަމަށް ވަޒީރު އިހުސާން ވިދާޅުވިއެވެ.
ވަޒީރު ވަނީ ދައުލަތުގެ މުއައްސަސާތަކުގެ އިތުބާރު ގެއްލިދާނެފަދަ ކަންކަމުން ބަރީއަވެ ތިބުމަށް އިލްތިމާސް ކުރައްވާފައެވެ.
ރިއެކްޝަންސް
