ފައިސާ އެއްކޮށް ދައްކާފައި ނުވާތީ 4000 ފްލެޓްގެ މަސައްކަތް ލަސްވި- އެފްޑިސީ
ފައިސާ އެއްކޮށް ދައްކާފައި ނުވާތީ 4000 ފްލެޓްގެ މަސައްކަތް ލަސްވި ކަމަށް ފަހި ދިރިއުޅުން ކޯޕަރޭޝަން (އެފްޑިސީ) ން ބުނެފިއެވެ.
'ޕީއެސްއެމް ނިއުސް' ގައި އެފްޑީސީގެ މެނޭޖިންގ ޑިރެކްޓަރ ހަމްދާން ޝަކީލް ވިދާޅުވީ މިސަރުކާރު ހަވާލުވިރިއު އެމަޝްރޫއަށް ދައްކަން ޖެހޭ ފައިސާ އެއްކޮށް ދައްކާފައި ނުވާ ކަމަށެވެ. ނަމަވެސް މިސަރުކާރު ހަވާލުވެ ފުރަތަމަ ހަ މަސް ދުވަހުގެ ތެރޭގައި 178 މިލިއަން ރުފިޔާ ދެއްކި ކަމަށް ވިދާޅުވިއެވެ. އޭނާ ވިދާޅުވީ ފައިސާ ނުދައްކާ އޮތުމަކީ މަސައްކަތް ލަސްވި ސަބަބެއް ކަމަށެވެ.
ފައިސާ ދެއްކުމާއެކު ކޮންޓްރެކްޓަރާ ދެމެދު އޮތް އެބަސްވުމަށްވެސް އިސްލާހުތަކެއް ގެނެސް މަސައްކަތް އަވަސްވާނެ މަގަށް ކަންކަން ބަދަލުކުރެއްވި ކަމަށް ހަމްދާން ވިދާޅުވިއެވެ. އޭގެ ނަތީޖާއެއް ގޮތުން މަސައްކަތް އަވަސްވެ, މިސަރުކާރުގެ ފުރަތަމަ އަށް މަސް ތެރޭގައި %32 ނިންމި ކަމަށް ވިދާޅުވިއެވެ. އޭނާ ވިދާޅުވީ މިދިޔަ ސަރުކާރު ނިމުނުއިރު އެމަޝްރޫއުން ނިމިފައިވަނީ %31 ކަމަށެވެ.
ހުޅުމާލޭގައި 4000 ފްލެޓް އަޅަނީ އިންޑިޔާގެ އެހީގައެވެ. އެމަޝްރޫއަށް ދިވެހި ސަރުކާރުން ދައްކަނީ %15 އެވެ. މިއީ 267 މިލިއަން ޑޮލަރުގެ މަޝްރޫއެކެވެ. މަޝްރޫއުގެ މަސައްކަތް އަމަލީ ގޮތުން ކުރަނީވެސް އިންޑިޔާގެ ކުންފުނިތަކުންނެވެ. ފްލެޓްތަކުގެ މަސައްކަތް ނިމޭނެ ކަމަށް މިހާރު ލަފާކުރަނީ އަންނަ އަހަރުގެ ޖުލައި މަހަށެވެ. ނަމަވެސް ބައެއް ފްލެޓްތައް މިހާރުވެސް ވަނީ ނިމިފައެވެ.
މިދިޔަ ސަރުކާރު ނިމުނުއިރު އެކި ޓަވަރުތަކުގެ މަސައްކަތް ހުރި އެކި މަރުހަލާގައެވެ. ނަމަވެސް 4000 ފްލެޓް ލިބޭ މީހުންގެ ދާއިމީ ލިސްޓެއް ގެޒެޓްކޮށް, އެއްބަސްވުންތަކުގައިވެސް ސޮއިކުރިއެވެ. އެކަމަކު އެކަމުގއި ކޮރަޕްޝަން އެކުލެވޭ ކަމަށާއި, ހައްގުނޫން ބަޔަކަށް ފްލެޓް ދީފައިވާ ކަމަށް އޭސީސީން ބުނުމުން, މިސަރުކާރުން ވަނީ ރީއިވެލުއޭޝަންގެ މަސައްކަތް ފަށާފައެވެ.
ރިއެކްޝަންސް
