ޑޮލަރު މާރުކުރުމުގައި ލުއިތަކެއް ލިބޭ ގޮތަށް ބިލެއް އެކުލަވާލައިފި
ރިސޯރޓްތަކަށް ލިބޭ ޑޮލަރު ބޭންކްތަކަށް މާރުކުރަން ލުއިތަކެއް ލިބޭ ގޮތަށް ބޭރުފައިސާއާ ބެހޭ ބިލެއް އެކުލަވާލާ ހިޔާލަށް ހުށަހަޅައިފި އެވެ. މިބިލްގައި ވާގޮތުން މިހާރު އެމްއެމްއޭއިން އެކުލަވާލާފައިވާ ޤަވާއިދަށްވުރެ ބޮޑު ލުއިތަކެއް ޓޫރިސްޓް ރިސޯރޓް/ ހޮޓާ ހިންގާ ފަރާތްތަކަށް ލިބެއެވެ.
ޤާނޫނުގެ ދަށުން ގެންނަ ބަދަލުތަކުގެ ތެރޭގައި 50 އެނދަށްވުރެ ގިނަ ވިޔަސް, މަދުވިޔަސް މީހުން ދިރިއުޅޭ ރަށްރަށުގައި ހިންގާ ޓީރިސްޓް ހޮޓާތައް ކެޓަގަރީ ބީ އަށް ބަދަލުކުރުމެވެ. ކެޓަގަރީ ބީގައި ހިމެނޭ ތަންތަނަށް އަންނަ ފަތުރުވެރިއެއްގެ ބޮލަކަށް މާރުކުރަން ޖެހެނީ 25 ޑޮލަރެވެ. ކުރިން އޮތީ 50 އެނދުން މަތިން ނަމަ ކެޓަގަރީ އޭގައެވެ. މިއީ އެމްއެމްއޭއިން އެކުލަވާލި ބިލްގައިވާ ގޮތެވެ.
ބިލްގައި ވާގޮތުން ރިސޯރޓް ނުވަތަ ގެސްޓް ހައުސްގައި 24 ގަޑިއިރު ހޭދަ ނުކުރާ ފަތުރުވެރިންނާއި, ކޮމްޕްލިމެންޓްރީ ޕެކޭޖްގެ ތެރެއިން އަންނަ ފަތުރުވެރިންގެ ބޮލަކަށށް ޑޮލަރު މާރުކުރާކަށް ނުޖެހޭނެއެވެ. އަދި ދެ އަހަރުން ދަށުގެ ކުޑަކުދިންނަށްވެސް ޑޮލަރު މާރުކުރާކަށް ނުޖެހޭނެއެވެ. މިއީ މިހާރު އެކުލަވާލާ އަންނަ އަހަރު ޖެނުއަރީ މަހުގެ ފުރަތަމަ ދުވަހު އަމަލުކުރަން ފަށާ އާ ޤަވާއިދުގައި ހިމެނޭ ފަތުރުވެރިކަމުގެ ދާއިރާގެ ފަރާތްތަކުގެ ކަންބޮޑުވުން ހުރި ކަންކަމެވެ.
ޢާއްމުންގެ ހިޔާލަށް ހުޅުވާލާފައިވާ ބިލްގެ ޑްރާފްޓްގައިވާ ގޮތުންވެސް ރިސޯރޓްތަކާއި, ހޮޓާތަކާއި, ޓޫރިސްޓް އުޅަނދު ތަކަށް އަންނަ ކޮންމެ ފަތުރުވެރިއެއްގެ ބޮލަށް (އިސްތިސްނާ ދީފައިވާ ފަރާތްތައް ފިޔަވާ) 500 ޑޮލަރު ރާއްޖޭގެ ބޭންކަކަށް މާރުކުރުން ލާޒިމް ވާނެއެވެ. އަދި ކެޓަގަރީ ބީގައި ހިމެނޭ ގެސްޓްހައުސްތަކުން ބޮލަކަށް 25 ޑޮލަރު މާރުކުރުން ލާޒިމް ވާނެއެވެ.
ބިލެއްގެ ޑްރާފްޓް ހިޔާލަށް ހުޅުވާލާފައި މިވަނީ މިހާރު އެކުލަވާލާފައިވާ ޤަވާއިދާ މެދު ޓޫރިޒަމް ދާއިރާގެ ފަރާތްތަކުން އިންތިހާއަށް ކަންބޮޑުވުން ފާޅުކުރަމުން ދަނިކޮށެވެ.
ރިއެކްޝަންސް
