ޣައްޒާ ހަނގުރާމަ ހުއްޓާލުމާ ގުޅޭ ޤަރާރު ފާސްކުރަން އދ ގެ ސަލާމަތީ މަޖިލީހުގައި ނެގި ވޯޓް އެމެރިކާއިން އަނެއްކާވެސް ވީޓޯ ކޮށްފި
މިއީ މިފަހަރު ހަނގުރާމަ ފެށިފަހުން ބައިޑެންގެ ސަރުކާރުން ޣައްޒާ ހަނގުރާމަ ހުއްޓާލުމާގުޅޭ ޤަރާރު ވީޓޯކުރި 4 ވަނަ ފަހަރު
'ޣައްޒާގައި ހިންގަމުންގެންދާ ހަނގުރާމަ އެއްވެސް ޝަރުތެއްނެތި, ވަގުތުން ވަގުތައް އަދި ދާއިމީކޮށް ހުއްޓާލުމަށް' ގޮވާލާ އދ ގެ ސަލާމަތީ މަޖިލީހަށް ހުށަހެޅި ޤަރާރު އަނެއްކާވެސް އެމެރިކާއިން ވީޓޯ ކޮށްފިއެވެ. މިއީ 2023 އޮކްޓޯބަރުގެ ފަހުން ހަނގުރާމަ ހުއްޓާލުމާ ގުޅޭގޮތުން އދ އަށް ހުށަހެޅި ގަރާރު އެމެރިކާއިން ވީޓޯކުރި 4 ވަނަ ފަހަރެވެ. އެމެރިކާއިން މި ޤަރާރު ވީޓޯ ކުރިއިރު އިޒްރާއިލްއިން ހުއްޓުމެއްނެތި ޣައްޒާގައި ހަމަލާތައް ދެމުންގެންދާތާ 13 މަހަށްވުރެ ގިނަ ދުވަސްވަނީ ވެފައެވެ.
ބުދަ ދުވަހު ސަލާމަތީ މަޖިލީހަށް ހުށަހެޅި ޤަރާރު އެމެރިކާއިން ވީޓޯ ކުރިއިރު ޤަރާރާ އެއްކޮޅަށް 14 ޤައުމަކުން ވޯޓް ދީފައިވެއެވެ. ޤަރާރުގައި ޣައްޒާގައި ހިފަހައްޓާފައިވާ އިޒްރާއިލްގެ މީހުން ދޫކޮށްލުމަށްވެސް ގޮވާލާފައިވެއެވެ. އެމެރިކާއިން ވަނީ ޝަރުތެއްނެތި ހަނގުރާމަ ހުއްޓާލުމަށް ގޮވާލާފައިވާ ވުމާ ދެކޮޅަށް އަޑުއުފުލާފައެވެ.
"އަހަރެންމެން އަހަރެމެންގެ ސްޓޭންޑް ސާފުކޮށްދިނިން މަޝްވަރާތަކުގަ. އަހަރެމެންބުނިން އެއްވެސް ޝަރުތެއްނެތި ހަމަލާތައް ހުއްޓާލުމަށް ބުނެފައިވާ ބުނުމަށް އަހަރެމެން އެއްބަހެއް ނުވާނަމޭ ރަހީނުން މިނިވަން ނުކުރާހާ ހިނދަކު" ނިއުޔޯކުގައި ކުރިއަށް ގެންދިޔަ ސެޝަންގައި އެމެރިކާއިން އދ ށް ކަނޑާއަޅާފައި ހުންނަވާ ސަފީރުގެ ނައިބު ރޮބަރޓް ވުޑް އާ ޙަވާލާދީ އަލް ޖަޒީރާގައި ރިޕޯޓްކޮށްފައިވެއެވެ. އެމެރިކާއިން އިތުރަށް ބުނެފައިވަނީ ރަހީނުން މިނިވަން ނުކުރަނީސް މި މައްސަލައަށް ދާއިމީ ހައްލެއް ނުލިބޭނެ ކަމަށާއި, މިކަމުން ޙާސިލްކުރަން ބޭނުންވާ ދެ މަޤުސަދު ވަނީ ގުޅި ލާމެހިފައި ކަމުގައެވެ. އެހެންކަމުން ޤަރާރަށް އެމެރިކާއަށް ތާއީދުކުރެވެން ނެތްކަމުގައި ސަފީރުގެ ނައިބު ވިދާޅުވެފައިވެއެވެ.
އެމެރިކާގެ ރައީސް ޖޯއި ބައިޑެންގެ ސަރުކާރުން ހަތަރުވަނަ ފަހަރަށް ހަނގުރާމަ ހުއްޓާލުމާ ގުޅޭ ޤަރާރު ވީޓޯކޮށްފައި ވާއިރު 2023 އޮކްޓޯބަރުން ފެށިގެން މިއަދާ ހަމައަށް އިޒްރާއިލްއިން 44,000 ފަލަޞްޠީނުގެ ރައްޔިތުން ވަނީ މަރާލާފައެވެ. އަދި މުޅި ޣައްޒާ ވަނީ އިންސާނީ ކާރިސާއަކަށް ބަދަލުވެފައެވެ. އެމެރިކާއިން އަސްކަރީ އެހީގެ ގޮތުގައި އަހަރަކު 3.8 ބިލިއަން އެމެރިކާ ޑޮލަރު ދެއެވެ. ނަމަވެސް ބައިޑެންގެ ސަރުކާރުން ވަނީ ފާއިތުވި 13 މަސް ދުވަހު އެކަނިވެސް 14 ބިލިއަން އެމެރިކާ ޑޮލަރުގެ އަސްކަރީ އެހީތެރިކަށް އިޒްރާއިލްއަށް ފޯރުކޮށްދީފައެވެ.
ރިއެކްޝަންސް
