ޕާޓީ ބަދަލުކޮށްފިނަމަ ނުވަތަ ޕާޓީން ވަކިވެއްޖެ ނަމަ ގޮނޑި ގެއްލޭ އިސްލާހު މަޖިލިހުން ފާސްކޮށްފި
ޤާނޫނު އަސާސީގައި އެންޓި ޑިފެންޝަން މާއްދާތައް ހިމަނަން ހުށަހެޅި ބިލް ރައްޔިތުންގެ މަޖިލިހުން ފާސްކޮށްފިއެވެ. މުޅި މަޖިލިހުގެ ކޮމިޓީން ފާސްކުރި ގޮތަށް ބިލް މަޖިލިހުގެ ތަޅުމުން ފާސްކުރީ ޕީއެންސީންގެ ސުޕަރ މެޖޯރިޓީންނެވެ. ފާސްކުރަން 78 މެމްބަރުން ވޯޓް ދެއްވިއެވެ. ނުފެންނަ ކަމަށް ވޯތް ދެއްވީ 13 މެމްބަރުންނެވެ. ނުފެންނަ ކަމަށް ވޯޓްދެއްވީ އެމްޑީޕީ މެމްބަރުންގެ އިތުރުން އައްޑޫ މީދޫ ދާއިރާއަށް އިންތިޚާބުވި އަމިއްލަ މެމްބަރު އަބްދުއްރަހުމާން އެވެ.
މަޖިލިހުގެ ތަޅުމުގައި ގަލޮޅު ދެކުނު ދާއިރާގެ މެމްބަރު އިސްލާހުތަކެއް ހުށަހެޅުއްވިނަމަވެސް އެއިސްލާހުތައް ބަލައިގަންނަން ވޯޓްދެއްވީވެސް 13 މެމްބަރުންނެވެ. އެއިސްލާހުތަކުގައި މައިގަނޑު ގޮތެއްގައި ވަނީ މަޖިލިހުގެ މެމްބަރުކަމުން ވަކިކުރުމުގައި އެދާއިރާއެއްގެ ރައްޔިތުންގެ ވަކި އަޣަލިއްބަތެއް އޮތުމެވެ.
ހުޅުދޫ ދާއިރާގެ މެމްބަރު މުޙައްމަދު ޝާހިދު ޤާނޫނު އަސާސީ އިސްލާހުކުރެއްވުމަށް ހުށަހެޅުއްވި ބިލަކީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފިނަމަ މަޖިލިހުގެ ގޮނޑި ގެއްލޭ އިސްލާހު ހިމެނޭ ބިލެވެ. އަމިއްލަ މެމްބަރަކު ޕާޓީއަކަށް ސޮއިކުރި ނަމަވެސް މިއިސްލާހުގައިވާ ގޮތުން ގޮނޑި ގެއްލޭނެއެވެ.
މި ބިލް ތަޅުމަށް ހުށަހެޅީވެސް, ބަލައިގަތީވެސް, ކޮމިޓީއަށް ފޮނުވީވެސް, ކޮމިޓީން ފާސްކޮށް މަޖިލިހުން ފާސްކުރީވެސް މިއަދުއެވެ. އަވަހަށް މިއަދުން މިއަދަށް އެބިލް ފާސްކުރުމުންވެސް އިދިކޮޅު މެމްބަރުންގެ ކަންބޮޑުވުން ގެންދަނީ ފާޅުކުރަމުންނެވެ. ޤާނޫނު އަސާސިއަށް އެއިސްލާހު ގެންނާނީ މަޖިލިސް ސަރަހައްދުގައި އެމްޑީޕީން ދަނީ އަޑު އުފުލަމުންނެވެ. ޤާނޫނު އަސާސީއަށް ބަދަލުގެނެވޭ ވަރުގެ މެޖޯރިޓީއެއް ރައްޔިތުން ވަނީ ޕީއެންސީއަށް ދީފައެވެ.
ރިއެކްޝަންސް
