ރައީސް މުއިއްޒުގެ ސަރުކާރަކީ ހާމަކަން ބޮޑު ސަރުކާރެއް- ޕީއެންސީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަކީ ހާމަކަން ބޮޑު ސަރުކާރެއް ކަމަށް އެމަނިކުފާނުގެ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން ބުނެފިއެވެ.
ހާމަކަން ބޮޑުކޮށް ރައްޔިތުންނަށް މައުލޫމާތު ފޯރުކޮށްދިން ކަމަށް ޕީއެންސީން ބުންޏެވެ. ބޮޑުވަމުން އައި ދައުލަތުގެ ޚަރަދުރައް ކުޑަކޮށް, ބަޖެޓް ޑެފިސިޓްވެސް ކޮންޓްރޯލް ކުރި ކަމަށް ޕީއެންސީން ބުންޏެވެ. އަދި މައުލޫމާތު ދިނުމަށް 70 އަށްވުރެ ގިނަ ނޫސްވެރިންގެ ބައްދަލުވުން ބާއްވަފައިވާ ކަމަށާއި, 700 އަށްވުރެ ގިނަފަހަރު ސަރުކާރުގެ ވަޒީރުން މީޑިޔާތަކަށް މައުލޫމާތު ދެއްވާފައިވާކަންވެސް ޕީއެންސީގެ ބަޔާނުގައި ފާހަގަކޮށްފައި ވެއެވެ. އަދި އެމުއްދަތުގައި އެއްވެސް މީޑިޔާއަކަށް ފިޔަވަޅު އަޅާ, ދަތިކުރުމަށްވެސް ސަރުކާރުން ކަމެއް ކޮށްފައި ނުވާކަމަށް ޕީއެންސީން ބުންޏެވެ.
ދިވެހިރާއްޖޭގެ ތާރީޚުގައި ކެބިނެޓްގެ ނިންމުންތައް އާއްމުކޮށް ފެންނާނެހެން މިސަރުކާރުން ޢާއްމުކުރަން ފެށިކަމަށްވެސް ބަޔާނުގައި ބުނެފައި ވެއެވެ.
ޕީއެންސީން ނެރުނު ބަޔާނެއްގައި ބުނީ ރައީސް ޑރ.މުހައްމަދު މުއިއްޒުގެ ސަރުކާރުގެ ފުރަތަމަ އަހަރު ހިންގާފައިވަނި ޒިންމާދާރުކަމާއެކު, ރައްޔިތުންގެ މާލިއްޔަތަށް އަމާނާތްތެރި ވެގެން ކަމަށެވެ.
ޕީއެންސީން ބުނީ މިސަރުކާރުން މައުލޫމާތު ހޯދާ ލިބިގަތުމުގެ ޤާނޫނުގެ ދަށުން ހުށަހެޅި ހުށަހެޅުންތަކަށްވެސް މިސަރުކާރުން އިހުމާލުވެފައި ނެތްކަން ތަފާސްހިސާބުތަކުން ފެންނަން އެބަހުރި ކަމަށެވެ. އެކަމަކު މިދިޔަ ސަރުކާރުގައި ކޯޓުން އަމުރު ކުރުމުންވެސް މައުލޫމާތު ނުދީ ހިފެހެއްޓިކަން ފާހަގަކޮށްފައި ވެއެވެ. އެސިޔާސަތު ނިމުމަކަށް ގެންނެވީ މިސަރުކާރުން ކަމަށް ޕީއެންސީން ބުންޏެވެ.
ޕީއެންސީން ބުނީ ގިނަ ރައްޔިތުންނަށް ފެންނަން ހުރި ސާފް ހަގީގަތްތައްވެސް އެމްޑީޕީން އޮޅުވާލަން މަސައްކަތް ކުރާކަމަށެވެ. އަދި އެކަން ޕީއެންސީން ވަނި ކުށްވެރިކޮށްފައެވެ.
ރިއެކްޝަންސް
