މިއީ ޤާނޫނު އަސާސީއަށް ބަލާ ސަރުކާރެއް ނޫން- ޞާލިހު
މިހާރު މިއޮތީ ޤާނޫނު އަސާސީއަށް ބަލާ ސަރުކާރެއް ނޫން ކަމަށް ކުރީގެ ރައީސް އިބްރާހީމް މުޙައްމަދު ޞާލިހު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ ރޭ އެމްޑީޕީން ބޭއްވި ޖަލްސާއެއްގައެވެ. ކުރީގެ ރައީސް ޞާލުހު ވިދާޅުވީ ޤާނޫނު އަސާސީ އާއި ޤާނޫނު ތަކުގައި ލިޔެފައި އޮތް އެއްޗެއް ބަލަން މިސަރުކާރުން ބޭނުން ނުވާ ކަމަށެވެ.
މިސަރުކާރުން ގެންގުޅެނީ ފެނިވަޑައިގަތުމުން ފެނިވަޑައިގެންނެވި ގޮތަކަށް އަމަލުކުރުމުގެ އުސޫލެއް ކަމަށް ޞާލިހު ވިދާޅުވިއެވެ. ބާރު އޮތުމުން ބާރުތައް ޖަމާކުރައްވަމުން ގެންދަވަނީ ކަމަށް ޞާލިހު ވިދާޅުވިއެވެ. ޤާނޫނު އަސާސީގައި ބާރުތައް ވަކިކޮށްފަހުރި މިނިވަން މުއައްސަސާތައް ވެސް މުށުތެރެއަށްލާ ޖަމާކުރަމުން ގެންދަވާ ކުރީގެ ރައީސް ވިދާޅުވިއެވެ. އެގޮތުން އޭސީސީގެ ރައީސް އާއި އިލެކްޝަން ކޮމިޝަންގެ ރައީސްއަކީ ރައީސުލްޖުމްހޫރިއްޔާ ރުހި ގަބޫލުވާ މީހެއް ނޫންގޮތުގައި ނުހުރެވޭ ގޮތަށް ބަދަލު ގެންނަވާކަން ފާހަގަކުރެއްވިއެވެ. އަދި އިލެކްޝަން ކޮމިޝަންގެ މެމްބަރުންނާއި, އޭސީސީގެ މެމްބަރުން ވަކިކޮށް, އާމެމްބަރުން އައްޔަންކުރެއްވުމުގެ މަސައްކަތް ކުރައްވަމުންދާކަން ފާހަގަކުރެއްވިއެވެ. ވިދާޅުވީ އެއީ ބާރުތައް ޖަމާކުރުމަށް ކުރައްވާ ކަމެއް ކަމަށެވެ.
" ބޭނުމަކީ ކޮބައިތޯ. ބާރުތައް ޖަމާކޮށް, ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބު ފޭރިގަތުން. ނަމަނަމަ އަޅުގަނޑުމެން އެފުރުޞަތު ދީގެން ނުވާނެ." ޞާލިހު ވިދާޅުވިއެވެ.
ޞާލިހު ވިދާޅުވީ މިއަދު މިކަންކަމާ ދެކޮޅަށް ނުތެދުވެއްޖެނަމަ އެބާރުތައް ނަގަމުން ގޮސް 2028 ވަނަ އަހަރު އަންނައިރު އޮންނާނީ އެއްވެސް ކަމެއް ނުކުރެވޭ ހާލަތަށް އައިސްފައި ކަމަށެވެ. ރައްޔިތުންގެ މަޖިލިހަށް ބަޖެޓް ހުށަހެޅުއްވިއިރުވެސް ޤާނޫނު އަސާސީގައި އޮތް ހަމަޔާއި އުސޫލު ހިފަހައްޓާފައި ނުވާ ކަމަށް ވިދާޅުވިއެވެ.
ޞާލިހު ވިދާޅުވީ ބާރުތައް ދޫކޮށްލުމަކީ ޚުދުމުހުތާރު ވެރިންނަށް ކުރަން ދަތި އުނދަގޫ ކަމެއް ކަމަށެވެ. އެހެންނަމަވެސް ރައީސް ޑރ.މުހައްމަދު މުއިއްޒު ތަކުރާރުކޮށް ވިދާޅުވަމުން ގެންދަވަނީ އެމަނިކުފާނު ހުންނެވީ ރައްޔިތުންގެ ފަޅީގައި ކަމަށެވެ. އަދި އަމަލުކުރައްވަމުން ގެންދަވަނީ ޤާނޫނު އަސާސީއާ އެއްގޮތަށް ކަމަށެވެ.
ރިއެކްޝަންސް
