އެޗްޑީސީން ބިޔަ 15 ޕްރޮޖެކްޓް އިފްތިތާހުކޮށްފި
ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބިޔަ 15 ޕްރޮޖެކްޓް އިފްތިތާހުކޮށްފިއެވެ. އެޕްރޮޖެކްޓްތައް އިފްތިތާހުކޮށްދެއްވީ އިކޮނޮމިކް މިނިސްޓަރ މުޙައްމަދު ސައީދު އެވެ.
އެޗްޑީސީން އިފްތިތާހުކުރި ބިޔަ ޕްރޮޖެކްޓްތަކުގެ ތެރޭގައި ރަސްމާލެ މަޝްރޫއުގެ އިތުރުން ބޯހިޔާވަހިކަމުގެ މަޝްރޫއުތަކެއް ހިމެނެއެވެ.
ރަސްމާލެ މަޝްރޫއުގެ އިތުރުން ހިމެނޭ ބޯހިޔާ ވަހިކަމުގެ މަޝްރޫއުތަކަކީ ސޯޝަލް ހައުސިންގެ މަޝްރޫއަކާއި, ރޯހައުސް އިމާރާތް ކުރުން ހިމެނެއެވެ. އަދި ބިންވެރިޔާ މަޝްރޫއުގެ ދަށުން ބިންލިބުނު ފަރާތްތަކަށް ޚާއްޞަ ޕްރީ ފެބް ގެތަކުގެ މަޝަރޫއެއްވެސް ހިމެނެއެވެ. ރޯ ހައުސް މަޝްރޫއުގެ ދަށުން ހުޅުމާލެ 2 ގައި 32 ޔުނިޓް އަދި ޕްރައިވެޓް ރޯހައުސްތައް އިމާރާތް ކުރުންވެސް ހިމެނެއެވެ. ޕްރައިވެޓް ރޯހައުސްތަކަކީ އެކްސްކްލޫސިވް ޕޫލް އާއި ކްލަބް ހައުސް ހިމެނޭ ރޯހައުސްތަކެއް ކަމަށް އެޗްޑީސީން ބުންޏެވެ. ސޯޝަލް ހައުސިންގެ ތެރެއިންވެސް 2100 ފްލެޓް ހުޅުމާލޭގައި އަޅާނެކަން އިފްތިތާހު ކުރި މަޝްރޫއުތަކުން އިނގެއެވެ.
އެޗްޑިސީން 'ޓްރާންސްފޯމިންގ ޓްމޯރޯ' ގެ ނަމުގައި ލޯންޗް ކުރި ޕްރޮޖެކްޓްތަކުގެ ތެރޭގައި އެޑްވެންޗަރ ޕާކާއި, ކޮމިއުނިޓީ ޕްރޮޖެކްޓް ތަކާއި, އެސްއޯއީ އޮފީސްތަކަށް ޚާއްޞަ އިމާރާތް އެޅުމުގެ މަޝްރޫއެއްވެސް ހިމެނެއެވެ. އުމުރުން ދުވަސްވީ މީހުންނަށް ޚާއްޞަ ކެއާ ފެސިލިޓީ މަރުކަޒުވެސް މަޝްރޫއުތަކުގެ ތެރޭގައި ހިމެނެއެވެ.
މީގެއިތުރުން ޕާކިންގ އިމާރާތާއި, ރޭސިންގ ޓްރެކާއި, ޑްރިފްޓް ޓްރެކް ފަދަ ޒުވާނުންނަށް ޚާއްޞަ ވަޞީލަތްތައް ޤާއިމް ކުރުންވެސް ހިމެނެއެވެ.
އެޗްޑީޗީގެ މެނޭޖިންގ ޑިރެކްޓަރ ފަޒުލް ރަޝީދު ވިދާޅުވީ މިއީ ދުރު ރާސްތާ ޕްލޭނެއްގެ ތެރެއިން ކުރަމުން އަންނަ މަސައްކަތްތަކެއް ކަމަށެވެ. އޭނާ ވިދާޅުވީ މިމަޝްރޫއުތަކާއެކު ގައުމުގެ އިގްތިޞާދަށް ތަރައްޤީގެ އާ ހަރުފަތްތަކަށް އުފުލި, ހުޅުމާލޭގެ ރައްޔިތުންގެ ދިރިއުޅުމަށް ފަސޭހަ ފުރުޞަތުތަކެއް ލިބިގެން ދާނެ ކަމަށެވެ. އިފްތިތާހުކުރެވުނު މަޝްރޫއުތަކަކީ އެޗްޑީސީގެ ކުރިއެރުމާއި, ހުޅުމާލޭގައި ދިރިއުޅޭ ރައްޔިތުންނަށް ފަސޭހަ ކުރުމާއެކު, ވިޔަފާރިވެރިންނަށް ފަހި ފުރުޞަތުތަކެއް ލިބޭނެ މަޝްރޫއުތަކެއް ކަމަށެވެ.
ރިއެކްޝަންސް
