ޚިޔާރު ކުރަންވީ މޫސުމީ ބަދަލުގެ ރާސްތާ ނޫން, ދިރިއުޅުމަށް ބަދަލުތަކެއް ގެނައުމުގެ ރާސްތާ - ރައީސުލްޖުމްހޫރިއްޔާ
މޫސުމަށް އަންނަ ބަދަލުތަކުގެ ޙަޤީޤީ މިންގަނޑާ އެއްގޮތްވާ ގޮތުގެ މަތިން، ކްލައިމެޓް ފައިނޭންސިންގްގެ އައު ލަނޑުދަނޑިއެއް ކަނޑައެޅުން މުހިންމު ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. ރައީސުލްޖުމްހޫރިއްޔާ މިހެން ވިދާޅުވީ އެކުވެރި ދައުލަތްތަކުގެ ފްރޭމްވަރކް ކޮންވެންޝަން އޮން ކްލައިމެޓް ޗޭންޖު (ޔޫ.އެން.އެފް.ސީ.ސީ.ސީ)ގެ ކޮންފަރެންސް އޮފް ޕާޓީސްގެ 29 ވަނަ ސެޝަން (ކޮޕް29)ގެ ޕްލެނަރީގައި ރާއްޖޭގެ ޤައުމީ ބަޔާން އިއްވަވަމުންނެވެ.
ރައީސުލްޖުމްހޫރިއްޔާ ވިދާޅުވީ މި އެހީ ބޭނުން ވަނީ ބިލިއަނުން ނޫން ކަމަށާއި، އެހީ ބޭނުންވަނީ ޓްރިލިއަނުން ކަމަށެވެ. އެމަނިކުފާނު ވަނީ މޫސުމަށް އަންނަ ނޭދެވޭ ބަދަލުތަކުން އަރައިގަތުމަށާއި، މޫސުމަށް އަންނަ ބަދަލުތައް ކުޑަކުރުމަށާއި، ގެއްލުންތަކާއި ހިރާސްތަކަށް ޙައްލު ހޯދައިދިނުމަށް ދޭ ބައިނަލްއަޤްވާމީ މާލީ އެހީގެ ވަޢުދުތައް އިތުރުކުރެއްވުމަށް ގޮވާލައްވާފައެވެ.
ތަރައްޤީވަމުން އަންނަ ކުދި ޖަޒީރާ ޤައުމުތައް، ނުވަތަ ސްމޯލް އައިލެންޑް ޑިވެލޮޕިންގ ސްޓޭޓްސް (ސިޑްސް)އަށް ކުރިމަތިވެފައިވާ ތަފާތު ގޮންޖެހުންތަކުގެ މައްޗަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ ރާއްޖެއަކީ އާދަޔާ ޚިލާފު ހިތްވަރެއް ލިބިފައިވާ ޤައުމެއް ކަމަށެވެ. މީގެ އިތުރުން، އެކަށީގެންވާ މާލީ އެހީ ނުލިބުމުގެ ސަބަބުން ރާއްޖެފަދަ ކުދި ޖަޒީރާ ޤައުމުތަކުގެ އުންމީދުތަކަށް ހުރަސްއެޅޭކަން ފާހަގަކުރެއްވިއެވެ. ކްލައިމެޓް ފައިނޭންސްގެ އެންމެ ފަހުގެ އޮނިގަނޑުގައި، މިހާރު ބޭނުންވެފައިވާ ކަންކަމަށާއި، މުސްތަޤްބަލުގެ ވިލުންވެރިކަމަށް އިސްކަން ދިނުމަށް ރައީސުލްޖުމްހޫރިއްޔާ ގޮވާލެއްވިއެވެ. ރާއްޖޭގެ ތިމާވެއްޓާއި ކަނޑުތަކަކީ، ރާއްޖޭގެ ޘަޤާފީ ވަންތަކަމުގެ ތެރޭގައި ހިމެނޭ ބައެއްގެ ގޮތުގައި ސިފަކުރައްވަމުން ރައީސުލްޖުމްހޫރިއްޔާ ވަނީ، އެއީ އެގޮތަށް ގަބޫލުކުރަން ލާޒިމު އަދި އެގޮތުގައި ހިފަހައްޓަންޖެހޭ ކަމެއް ކަމަށްވެސް ވިދާޅުވިއެވެ.
އމޫސުމާ ގުޅުން ހުރި ކަންކަމުގައި ވަކާލާތު ކުރުމުގައި ރާއްޖެއިން އަދާކުރާ ދައުރުގެ މައްޗަށް އަލިއަޅުއްވާލައްވަމުން، އެމަނިކުފާނު ވިދާޅުވީ ހަކަތައިގެ އާ ސިޔާސަތާއި، ކާބޯތަކެތީގެ ކަށަވަރުކަމާއި، ބޯހިޔާވަހިކަމުގެ ފަހި މަސައްކަތްތަކާއި، އިޤްތިޞާދު ސިންދަފާތުކުރުމުގެ މަސައްކަތްތަކަކީ ދެމެހެއްޓެނިވި ގޮތެއްގައި ދިވެހިރާއްޖެއިން ކުރިއަށްގެންދަވާ ކަންތައްތަކެއް ކަމަށެވެ.
މީގެ އިތުރުން، 2040 ވަނަ އަހަރު އަންނައިރު މޫސުމީ ބަދަލުތަކަށް ވިލުންވެރި ރާއްޖެއެއް ބިނާ ކުރުމަށްޓަކައި، 20 އަހަރު ދުވަހުގެ ތަޞައްވުރެއްގެ ދެލިކޮޕީ، ދާދި އަވަހަށް އެކުލަވާލައި ހާމަކުރެވޭނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މޫސުމަށް އަންނަ ބަދަލުތަކާ، ދުނިޔޭގެ އެހެނިހެން ކަންކަމަށް ކުރާ ޚަރަދުތަކުގައި ހުރި ތަފާތުތައް ފާހަގަކުރައްވައި، މޫސުމީ ނޭދެވޭ ބަދަލުތަކަށް އަހުލުވެރިވުމަށް ކަނޑައަޅާފައިވާ މާލީ އެހީ ފޯރުކޮށްދިނުމަށް ކުރާ ޚަރަދުތަކަށް އިސްކަންދެއްވުމަށް ދުނިޔޭގެ ޤައުމުތަކުގެ ވެރިންގެ ކިބައިން ރައީސުލްޖުމްހޫރިއްޔާ އެދިވަޑައިގެންނެވިއެވެ. "މޫސުމީ ނޭދެވޭ ބަދަލުގެ ރާސްތާގެ ބަދަލުގައި، ދިރިއުޅުމަށް ބަދަލުތަކެއް ގެނައުމުގެ ރާސްތާ ޚިޔާރުކުރުމަށް" އެމަނިކުފާނު ގޮވާލައްވާފައެވެ.
ޔޫ.އެން.އެފް.ސީ.ސީ.ސީގެ ކޮޕް29 ގައި ބައިވެރިވެވަޑައިގަތުމަށް، ރައީސުލްޖުމްހޫރިއްޔާ އަޒަރްބައިޖާންގެ ބާކޫއަށް ވަޑައިގަތީ އިއްޔެ ހެނދުނުގެ ވަގުތެއްގައެވެ. ކޮޕް29ގެ މިއަހަރުގެ ޝިޢާރަކީ "އިން ސޮލިޑަރިޓީ ފޮ އަ ގްރީން ވޯލްޑް" އެވެ.
ރިއެކްޝަންސް
