އޭޑީބީން ރާއްޖެއަށް 21.95 މިލިއަން ޑޮލަރުގެ އެހީ ދެނީ
އޭޝިޔަން ޑިވެލޮޕްމަންޓް ބޭންކް (އޭޑީބީ) އިން ރާއްޖެއަށް 21.95 މިލިއަން ޑޮލަރުގެ އެހީ ދޭން ނިންމައިފިއެވެ. އޭޑީބީން ރާއްޖެއަށް އެހީ ދެނީ މޫސުމަށް އަންނަ ބަދަލުތަކުން ލިބޭ ގެއްލުންތަކުން އަރައިގަތުމަށާއި, ކާބާތަކެތީގެ ރައްކާތެރިކަން ގާއިމް ކުރުމަށެވެ.
އޭޑީބީގެ އެހީގެ ތެރެއިން ލޯނުގެ ގޮތުގައި ދެނީ 4 މިލިއަނެވެ. އަނެއް 17.95 މިލިއަން ޑޮލަރު ދެނީ އެންމެ ފަގީރު އަދި ކުޑަކޮށް ތަރައްޤީވެފައިވާ ގައުމުތަކަށް ދިނުމަށް ކަނޑައަޅާފައިވާ ފައިސާގެ ތެރެއިންނެވެ.
އޭޑީބީން ވަނީ ރާއްޖެއަކީ ކަނޑުގެ ލޮނުގަޑަށްވުރެ އެންމެ މީޓަރެއް އުސްމިނުގައި ހުރި ރަށްތަކެއްގެ މައްޗަށް ބިނާވެފައިވާ ގައުމަކަށްވާތީ މޫސުމީ ގެއްލުންތައް ބޮޑުކަން ފާހަގަކުރައްވާފައެވެ. އެގޮތުން ރަށްގިރުމުގެ މައްސަލައާއި, ކަނޑުގެ ލޮނުގަނޑު އުފުލުމާއި, ތޫފާންތައް އިތުރުވުމަކީ ކުދި އާބާދީތަކުގެ ކާބޯތަކެތީގެ ރައްކާތެރިކަމަށް އޮތް ނުރައްކަލެއްގެ ގޮތުގައި ފާހަގަކުރެއްވިއެވެ.
އޭޑީބީން އެހީދޭން ނިންމިކަން ހާމަކޮށް ކުރެއްވި ޕޯސްޓް ޙިއްސާކުރައްވާ ތިމާވެއްޓާބެހޭ ވަޒީރު ތާރިގު އިބްރާހީމް ވިދާޅުވީ އޭޑީބީން 21.95 މިލިއަން ޑޮލަރުގެ އެހީގެ ޕެކޭޖެއް ހަމަޖެހުމަކީ ހިތްހަމަޖެހުމެއް ކަމަށެވެ. އެ އެހީން މޫސުމީ ބަދަލުތަކުން ލިބޭ ގެއްލުންތަކާ ދެކޮޅަށް މަސައްކަތްކޮށް, ކާބާތަކެތީގެ ރައްކާތެރިކަން ގާއިމްކުރުމަށް މަސައްކަތްތަކެއް ކުރެވޭނެކަން ވަޒީރު ފާހަގަކުރެއްވިއެވެ.
ރިއެކްޝަންސް
