ސިވިލް ސަރވިސް ކޮމިޝަންގެ ރައީސް ހިމެނޭހެން 3 ކޮމިޝަނެއްގެ ބައެއް މެންބަރުން ވަކިކުރަނީ
މިނިވަން ތިން ކޮމިޝަނެއްގެ ބައެއް މެންބަރުން ވަކި ކުރުމުގެ މައްސަލަ ދިރާސާ ކުރުމަށް މިނިވަން މުވައްސަސާތަކާ ބެހޭ ކޮމެޓީއަށް ފޮނުވައިފިއެވެ.
މިގޮތުން މަގާމުން ވަކިކުރުމަށް ދިރާސާ ކުރުމަށް މިނިވަން މުވައްސަސާތަކާބެހޭ ކޮމެޓީއަށް ފޮނުވާފައިވަނީ އެންޓީ ކޮރަޕްޝަން ކޮމިޝަންގެ ނައިބުރައީސް އަބްދުއްސަލާމް އާއި އެކޮމިޝަންގެ މެންބަރު ތާޙާ މުޙައްމަދުގެ އިތުރުން ސިވިލް ސަރވިސް ކޮމިޝަންގެ ރައީސް މުޙައްމަދު ނާސީހު އާއި އިލެކްޝަންސް ކޮމިޝަންގެ ނައިބު ރައީސް އަލީ ނަޝާތުގެ އިތުރުން އިލެކްޝަންސް ކޮމިޝަންގެ މެންބަރު މުހައްމަދު އާސިފް އަދި ޑރ. މުޙައްމަދު ޒާހިރުއެވެ.
މި މައްސަލައާ ގުޅޭ ގޮތުން މިނިވަން މުއައްސަސާތަކާބެހޭ ކޮމެޓީގެ މުގައްރިރު، މާފުށީ ދާއިރާގެ މުގައްރިރު ހުސައިން ރިޒާ އާދަމް ފޮނުއްވި ސިޓީ ރައްޔިތުންގެ މަޖިލީހުގެ މިއަދުގެ ޖަލްސާއަށް ވަނީ އިއްވާފައެވެ.
ވަކިވަކިން ފޮނުއްވާފައިވާ ތިން ސިޓީގައި އެމެންބަރުން ވަކި ކުރާ ސަބަބު ވަނީ މަޖިލީހަށް އިއްވާފައެވެ.
ރައްޔިތުންގެ މަޖިލީހުގެ އަމީންއާމު މަޖިލީހަށް އިއްވި ސިޓީގައިވާ ގޮތުން އޭސީގެ ނައިބުރައީސް އަބްދުއްސަލާމް އަދި މެންބަރު ތާހާ މުހައްމަދު އޭސީގެ ގާނޫނުގެ 17 ވަނަ މާއްދާގެ ށ އާ ޚިލާފަށް އެތައް ކަމެއް ކޮށްފައިވާ ކަމަށް ތުހުމަތުކޮށް ދެ މައްސަލައެއް ހުށަހަޅާފައިވާ ކަމަށެވެ.
މީގެ އިތުރުން ސިވިލްސަރވިސް ކޮމިޝަންގެ ރައީސް ވަކި ކުރުމަށް ނިންމާފައިވަނީ އެކޮމިޝަންގެ ރައީސްގެ މަސްއޫލިއްޔަތުތަކާ ޚިލާފަށް އަމަލު ކޮށްފައިވުމުގެ އިތުރުން އެކޮމިޝަންގެ މެންބަރުގެ މަގާމާ އެކަށީގެން ނުވާފަދަ އަމަލުތަކެއް ކޮށްފައިވާ ކަމަށް ތުހުމަތުކުރެވޭ މައްސަލައަކާ ގުޅިގެން ކަމަށް ވެސް މިނިވަން މުއައްސަސާތަކާ ބެހޭ ކޮމެޓީން ފޮނުވި ސިޓީގައި ވަނީ ބަޔާން ކޮށްފައެވެ.
އިލެކްޝަންސް ކޮމިޝަންގެ ނައިބުރައީސް އަލީ ނަޝާތުގެ އިތުރުން ދެ މެންބަރުން ކަމަށްވާ މުހައްމަދު އާސިފްއާއި ޑރ މުހައްމަދު ޒާހިރު މަގާމުން ވަކި ކުރުމުގެ މައްސަލަ ކުރިއަށް ގެންދަނީ އެކޮމިޝަންގެ ގާނޫނުގައިވާ ސުލޫކީ މިންގަނޑާ ޚިލާފުވެފައިވާ ކަމަށް ތުހުމަތުކޮށް ހުށަހެޅިފައިވާ މައްސަލައަކާ ގުޅިގެން ކަމަށްވެސް މިނިވަން މުއައްސަސާތަކާ ބެހޭ ކޮމެޓީން ފޮނުވި ސިޓީގައި ވަނީ ބަޔާން ކޮށްފައެވެ.
މި ބޭފުޅުން ވަކި ކުރުމުގެ މަސައްލަ އެމައްސަލައާ ގުޅުން ހުރި ދާއިމީ ކޮމެޓީއަށް ފޮނުވާފައިވާކަން މަޖިލީހުގެ ރައީސް އަބްދުއްރަހީމް އަބްދުﷲ ވަނީ އިއުލާން ކުރައްވާފައެވެ.
ރިއެކްޝަންސް
