ކޮމިޝަންތައް ހަދައިގެން ސިޔާސީ ގޮތުން މިސަރުކާރުން އެއްވެސް ކަމެއް ނުކުރާނެ- ރައީސް
ކޮމިޝަންތައް ހަދައިގެން ސިޔާސީ ގޮތުން މިސަރުކާރުން އެއްވެސް ކަމެއް ނުކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. ޖުމްހޫރީ ދުވަހުގެ ޖަލްސާގައި ރައީސުލްޖުމްހޫރިއްޔާ މިފަދައިން ވިދާޅުވީ ކުރީގެ ދެ ރައީސުންނަށް ނުސީދާކޮށް ފާޑުވިދާޅުވަމުންނެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ ކުރިން ފެނުނު ގޮތަށް ބަދަލު ހިފުމުގެ ރޫހު މިހާރު ނުފެންނާނެ ކަމަށެވެ. ސިޔާސީ މީހަކަށްވީތީ, އެމަނިކުފާނުގެ ވާދަވެރިޔަކަށްވީތީ ހިފާ ހައްޔަރުކޮށް ގެންގޮސް ޖަލުގޮޅިއަށް ލާތަން މިދިޔަ އެއް އަހަރުގެ ތެރޭގައި ނުފެންނާނެ ކަމަށް ވިދާޅުވިއެވެ. އަދި ކުރިއަށް އޮތްތާނގައިވެސް އެކަން ނުފެންނާނެ ކަމަށް ވިދާޅުވިއެވެ.
" އެއީ އަޅުގަނޑު ގަބޫލުކުރާ ހަމަޔަކީ. މީގެކުރީގަ ކޮންމެސް ވަރަކަށް އެކަން އޮތީ އެގޮތަށް ފެނިފަ. އެކިގޮތްގޮތުން ފްރޭމް ކޮށްގެންވިޔަސް, ނޫނިއްޔާ އެހެންގޮތަކުން ވިޔަސް, އަނިޔާވެރިކަމާ އެކީގައި, ސިޔާސީ ވާދަވެރިން ގެންގޮސް ޖަލަށްލާ އަނިޔާކޮށްފަ ވަނީ" ރައީސް ވިދާޅުވިއވެެ.
ތަފްސީލަށް ވަޑައިގެން ރައީސް ވިދާޅުވީ ތިމާގެ މީހެއް ވިޔަސް, ރަށްޓެއްސެއް ވިޔަސް, ސިޔާސީ މީހެއް ވެއްޖިއްޔާ ދުރަށްލާ އެކަހެރި ކުރުމުގެ ޒަމާން ތާ އަބަދަށް ނިމުނީ މިވެރިކަން ފެށުނު ދުވަހުން ފެށިގެން ކަމަށް ރައީސް ވިދާޅުވިއެވެ.
ރައީސް ޔާމީނުގެ ވެރިކަމުގައި އެމަނިކުފާނުގެ ބޭބޭފުޅު ކުރީގެ ރައީސް މައުމޫން އަބްދުލްޤައްޔޫމް ޖަލަށް ލިއެވެ. އަދި އެހެން ސިޔާސީ ބޭފުޅުންވެސް ޖަލަށް ލިއެވެ. ރައީސް ޔާމީން ޖަލަށް ލެއްވީ މިދިޔަ އެމްޑީޕީގެ ވެރިކަމުގައެވެ. ރައީސް މުއިއްޒު އިޝާރާތް ކުރެއްވީ އެކަންކަމަށް ކަމަށް ބެލެވެއެވެ. ރައީސް މުއިއްޒު ވިދާޅުވީ ސިޔާސީ ގޮތުން ކަމެއް ނުކުރެއްވިޔަސް, ނުހައްގުން ކަމެއްކޮށް, ވައްކަން ކޮށް ހަދާފަ ވާނަމަ އެކަންކަން ބައްލަވާނެ ކަމަށެވެ. އަދި ރައްޔިތުންގެ ހައްގުތަކަށް އަރައިފި ނަމަ އެކަންވެސް ބައްލަވާނެ ކަމަށް ވިދާޅުވިއެވެ. ނަމަވެސް ރިޔާސީ ކޮމިޝަންތައް ނަހައްދަވާނެ ކަމަށާއި, އެކަންކަން ބައްލަވާނީ މިނިވަން މުއައްސަސާތަކާއި, ޝަރުއީ ނިޒާމްގެ ތެރެއިން ކަމަށް ރައީސް ވިދާޅިވިއެވެ.
ރިއެކްޝަންސް
