ޓްރަމްޕަށް ރައީސް މުއިއްޒު މަރުޙަބާ ވިދާޅުވެއްޖެ
އެމެރިކާގެ ރިޔާސީ އިންތިޙާބު ޑޮނަލްޑް ޓްރަމްޕް ކާމިޔާބުކުރެއްވުމާއެކު ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޓްރަމްޕަށް މަރުޙަބާ ވިދާޅުވެއްޖެއެވެ. މިހާތަނަށް ގުނާފައިވާ ވޯޓްގެ ނަތީޖާ ދައްކާގޮތުން 51.1 އިންސައްތަ އާއެކު އާންމު ވޯޓުންވެސް 5 މިލިއަން ވޯޓް އިތުރަށް, އިދިކޮޅު ކެނޑިޑޭޓް ކަމަލާ ހަރިސްގެ މައްޗަށް ޓްރަމްޕް ވަނީ ކުރި ހޯއްދަވާފައެވެ.
ޓްރަމްޕަށް މަރުޙާބާ ވިދާޅުވެ ރައީސް މުއިއްޒު އެކްސްގައި ކުރެއްވި ޕޯސްޓްގައި ވިދާޅުވީ ރާއްޖެއާއި އެމެރިކާ އާ ދެމެދު އޮންނަ ގުޅުމަކީ އިޙްތިރާމާއި ހެޔޮއެދުމުގެ މައްޗަށް ބިނާވެފައިވާ ހަރުދަނާ ގުޅުމެއް ކަމަށެވެ. އަދި ޓްރަމްޕްގެ ދައުރުގައި އެގުޅުން އިތުރަށް ބަދަހިވެގެން ދާނެކަމަށް އުއްމީދު ކުރައްވާ ކަމަށް ރައީސް ވިދާޅުވެފައި ވެއެވެ.
"ދެ ގައުމުގެ ގުޅުން ހަރުދަނާކޮށް, ދެގައުމަށް ކުރިމަތިވެފައިވާ ގޮންޖެހުންތަކަށް ޙައްލު ހޯދާ, ދުނިޔޭގެ ސުލްޙައާއި ތަނަވަސްކަމަށް މަސައްކަތް ކުރުމަށް އުއްމީދުކުރަން" ރައީސް މުއިއްޒު ވިދާޅުވިއެވެ.
78 އަހަރުގެ ޓްރަމްޕް އިންތިޚާބު ކާމިޔާބު ކުރެއްވީ ޖުމްލަ 279 އިލެކްޓޯރަކް ކޮލާޖް ވޯޓުންނެވެ. އެމެރިކާގެ ރިޔާސީ އިންތިޚާބު އޮންނަ ގޮތުން އިންތިޙާބު ކާމިޔާބު ކުރާ ކެންޑިޑޭޓަކު މަދުވެގެން 270 އިލެކްޓޯރަކް ކޮލާޖް ވޯޓް ހޯދަންޖެހޭނެއެވެ. އިދިކޮޅު ކެންޑިޑޭޓް ކަމަލާ ހަރިސް އަށް ކާމިޔާބު ކުރެއްވުނީ 223 އިލެކްޓޯރަލް ކޮލާޖް ވޯޓެވެ.
ޓްރަމްޕް އިންތިޚާބު ކާމިޔާބު ކުރެއްވިއިރު, ޤާނޫނު ހަދާ މަޖިލީހުގެ މަތިގޭގެ (ސެންޓް) އަގުލަބިއްޔަތުވެސް ޑިމޮކްރެޓުން ބަލިކޮށް ރިޕަބްލިކަންސް ވަނީ ނަގާފައެވެ. ހައުސް އޮފް ކޮމަންސްގެ އަގުލަބިއްޔަތު މިހާތަނަށް އަދި ސާފުވެފައެއް ނުވެއެވެ.
ރިއެކްޝަންސް
