ޓެކްސްތައް ބޮޑުކުރުމުގެ ބިލް ރައީސް ތަސްދީގުކުރައްވައިފި
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް 7 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު ތަޞްދީޤުކުރައްވައިފިއެވެ. މި ބިލަކީ މިދިޔަ ބްތރާސްފަތި ދުވަހު ރައްޔިތުންގެ މަޖިލިހުން ފާސްކުރެއްވި ބިލެކެވެ.
މި ބިލުގައި، ޓޫރިޒަމް ދާއިރާގެ މުދަލާއި ޚިދުމަތުން ނަގަމުން އަންނަ ޓެކްސް (ޓީ.ޖީ.އެސް.ޓީ) ރޭޓަށް ވަނީ ބަދަލުގެންނަވާފައެވެ. އެ ގޮތުން މިޓެކްސް ބޮޑުކޮށްފައި ވަނީ 16 އިންސައްތައިން 17 އިންސައްތަ އަށެވެ. 17 އިންސައްތައަށް ނަގަން ފަށާނީ އަންނަ އަހަރުގެ ޖުލައި މަހުގެ ފުރަތަމަ ދުވަހުން ފެށިގެންނެވެ.
ޓޫރިޒަމް ދާއިރާގެ މުވައްޒަފުންނަށް ޚާއްޞަކޮށްގެން ހިންގާ ފިހާރަތައް، ޓޫރިޒަމް މުދަލެއް ނުވަތަ ޚިދުމަތެއްގެ ގޮތުގައި ޝަރުޠު ހަމަވާ ޚިދުމަތްތަކުގެ ތެރެއިން ވަނީ އިސްތިސްނާކުރައްވާފައެވެ. މި އިޞްލާޙުގެ ދަށުން، މުވައްޒަފުންނަށް ޚާއްޞަކޮށްގެން ހިންގާ ކެފޭތައް ވެސް ވަނީ މި އިސްތިސްނާއަށް އިތުރުކުރައްވާފައެވެ.
މި ބިލު ފާސްވުމާ ގުޅިގެން މި ޤާނޫނުގެ ދަށުން އެކުލަވާލާފައިވާ ޤަވާއިދުތަކަށް ގެންނަންޖެހޭ އިޞްލާޙުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 30 (ތިރީސް) ދުވަހުގެ ތެރޭގައި އެކުލަވާލައި، ދިވެހިސަރުކާރުގެ ގެޒެޓުގައި ޝާއިޢުކުރަންވާނެކަމަށް ވެސް ބިލުގައި ބަޔާންކުރައްވާފައިވެއެވެ. ރައީސުލްޖުމްހޫރިއްޔާ، މި ބިލު މިއަދު ތަޞްދީޤުކުރެއްވުމާއެކު، މި ޤާނޫނު ދިވެހިސަރުކާރުގެ ގެޒެޓުގައި ޝާއިޢުކުރެވި ވަނީ ޢަމަލުކުރަން ފަށާފައެވެ.
ޓޫރިޒަމް ޤާނޫނަށް ސަރުކާރުން ހުށަހެޅި އިސްލާހު ރައްޔިތުންގެ މަޖިލިހުން ފާސްކުރުމާއެކު އަންނަ އަހަރުގެ ޖެނުއަރީން ފެށިގެން ގްރީން ޓެކްސް ވެސް ހަ ޑޮލަރުން ބާރަ ޑޮލަރަށް ބަދަލުވާނެއެވެ. އަދި 50 ކޮޓަރި އަށް ވުރެ މަދު ގެސްޓްހައުސްތަކުން ނަގަމުން އައި 3 ޑޮލަރުގެ ބަދަލުގައި ނަގާނީ ހަ ޑޮލަރެވެ.
އެއަޕޯރޓުން ފުރާ ފަސިންޖަރުންގެ ތެރެއިން އިކޮނޮމީ ކްލާހުން ދަތުރުކުރާ ދިވެހިން ފިޔަވާ އެހެން މީހުންގެ އަތުން ނަގާ ޓެކްސްވެސް ވަނީ ބޮޑުކޮށްފައެވެ. އެއައަށް އަމަލުކުރަން ފަށާނީ އަންނަ މަހުގެ ފުރަތަމަ ދުވަހުއެވެ.
ރިއެކްޝަންސް
