ޑޮމެއިންގެ ހުއްދަތައް އާކުރަން 60 ދުވަސް ދެނީ
ޑޮމެއިންގެ ހުއްދަތައް ގަވާއިދަށް ފައްތައިގެން އާކުރަން 60 ދުވަހުގެ މުއްދަތެއް ދޭން ޓްރާންސްޕޯރޓް މިނިސްޓްރީން ނިންމައިފިއެވެ. ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯރޓް މިނިސްޓަރ މުޙައްމަދު އަމީނު ވިދާޅުވީ އެފުރުޞަތު ހުޅުވާލާނީ މިމަހުގެ 17 ވަނަ ދުވަހު ކަމަށެވެ. އެއީ މި ސަރުކާރަށް އެއް އަހަރު ފުރޭ ދުވަހެވެ.
މިނިސްޓަރ ގަބޫލުކުރައްވަނީ ބޮޑަތި މައްސަލަތަކެއްހުރި ޑޮމެންއިންގެ މައްސަލަ ހައްލުކޮށް ގަވާއިދުގެ ތެރެއަށް ފައްތަން ސަރުކާރަށް އަހަރެއް ފުރޭ ދުވަހު ހުޅުވާލެވުމަކީ ކާމިޔާބީއެއް ކަމަށެވެ. އަލުން ދޫކުރަނީ އަލަށް ސެކިއުރިޓީ ފީޗާރސްއާއެކު ފަރުމާކުރެވިފައިވާ ޑޮމެއިންގެ ރަޖިސްޓްރީ އެވެ.
" މިހާރު އޮތް އޮޅުންބޮޅުން ފިލުވޭނީ މިހާރު ހުރި ޑޮމެއިން ސެޓްފިކެޓުތަކުގެ ބަދަލުގައި މި ދެންނެވި ސެކިއުރިޓީ ފީޗާސް ޑޮކިއުމެންޓް އަރުވައިގެން." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޑޮމެއިންގެ މައްސަލަ ހައްލުކުރަނީ ޑޮމެއިން ޚިދުމަތް ދިނުމަށްޓަކާ ހަރުދަނާ އިދާރީ އުސޫލެއް އެކުލަވާލައިގެން ކަމަށެވެ. އަދި އައު ސިސްޓަމެއް ތަޢާރަފްކޮށް ޑޮމެއިންގެ ޑޭޓާބޭސް އެއް ވިއުގައަކުން ގުޅާލާނެ ކަމަށް ވިދާޅުވިއެވެ. ޑޮމެއިންގެ ވެރިފަރާތަށާއި, މިނިސްޓްރީ އަށާއި, ޤާނޫނުތައް ތަންފީޒުކުރާ ފުލުހުންނަށް އެއް ވިއުގައަކުން ފެންނާނެ އިންތިޒާމް ހަމަޖައްސަވާނެ ކަމަށް ވިދާޅުވިއެވެ. މިހާރު އެ ގޮތަށް ނިޒާމް ބައްޓަން ކުރެވި, ޑޮމެއިންގެ ވެރިފަރާތަށް އޮންލައިންކޮށް ބެލޭނެ ކަމަށް މިނިސްޓަރ އަމީން ވިދާޅުވިއެވެ.
މިނިސްޓަރ ވިދާޅުވީ މިކަން ހައްލުކުރަން އަހަރެއްގެ ތެރޭގައި މިފެށުނީ ފަހަތުގައި ވަރަށް ގިނަ މަސައްކަތްތަކެއް ކޮށްގެން ކަމަށެވެ. އަންނަ އަހަރު ޑޮމެއިން ވިއްކަން ފަށާނީ އޯޕަން ބިޑެއްގެ ތެރެއިން ކަމަށްވެސް ވަޒީރު ވިދާޅުވިއެވެ.
ރިއެކްޝަންސް
