ކުއްލި ނުރައްކަލެއް ދިމާވެދާނެ ކަމަށް އަބަދުވެސް ތިބެންވާނީ ހޭލާ- މައުމޫނު
ކުއްލި ނުރައްކަލެއް ދިމާވެދާނެ ކަމަށް އަބަދުވެސް ތިބެންވާނީ ހޭލާ ކަމަށް ކުރީގެ ރައީސް އަލްއުތާޛު މައުމޫނު ޢަބްދުލް ޤައްޔޫމް ވިދާޅުވެއްޖެ އެވެ. ނިޝާން ޣާޒީގެ ޢިއްޒަތުގެ ވެރިޔާ (ނޣޢވ)، ރައީސް އަލްއުސްތާޛު މައުމޫން ޢަބްދުލް ޤައްޔޫމް މިހެން ވިދާޅުވީ ނަޞްރުގެ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަ ދައްކަވަމުންނެވެ.
3 ނޮވެމްބަރުގެ އުދުވާން ކުރިމަތިވި އިރު ރާއްޖޭގެ ރައީސްކަމުގައި ހުންނެވި މައުމޫން ވިދާޅުވީ ދުނިޔޭގެ ސިޔާސީ އޮއިވަރުތައް ހިނގަމުންދާގޮތުން ރާއްޖެއަށް ކުއްލި ނުރައްކަލެއް ދިމާވުމަކީ ވެދާނޭ ކަމެއްކަމަށެވެ. އެހެންކަމުން ދިވެހިން އަބަދުވެސް ތިބެންވާނީ ހޭލާކަމަށް އެމަނިކުފާނު ވިދާޅުވިއެވެ. ކުރީގެ ރައީސް މައުމޫނު ވަނީ ދިވެހިރާއްޖޭގެ މިނިވަންކަމާއި ސިޔާދަތު ވަރުގަދަކުރައްވައި ދެމެހެއްޓެވުމަށްޓަކައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ސިޔާސަތައް ޝުކުރު އަދާކުރައްވާފައެވެ.
ކުރީގެ ރައީސް މައުމޫނު ވިދާޅުވީ އެއްވެސް ކަމެއްގެ ސަބަބުން ޤައުމީ ވަހުދަތަށް އުނިކަން އައިސްގެން ނުވާނޭކަމަށެވެ. ނުގުޑާ ފަދަ ޢަޒުމަކާއެކު ދިވެހިންގެ އެއްބައިވަންތަކަން ހިފަހައްޓަންވާނެކަމަށް ވިދާޅުވިއެވެ.
"ދުނިޔޭގެ ކަންތައްތައް ބަދަލުވަމުންދާގޮތުން ރާއްޖޭގެ ޤައުމީ މަސްރަޙަށް ބަދަލުތަކެއް އައި ނަމަވެސް، އަދި ޒަމާނާ އެކަށީގެންވާ ގޮތަކަށް ރާއްޖޭގެ ޤާނޫނުތަކާއި ޤަވާއިދުތައް ބަދަލުވަމުން ދިޔަ ނަމަވެސް، ރާއްޖޭގައި ސިޔާސީ ޕާޓިތަކެއް އުފެދި ހިނގަމުންދިޔަ ނަމަވެސް، މިއިން އެއްވެސް ކަމެއްގެ ސަބަބުން އަޅުގަނޑުމެންގެ ޤައުމީ ވަހުދަތަށް އެއްވެސް އުނިކަމެއް އައިސްގެން ނުވާނެ،" ރައީސް ވިދާޅުވިއެވެ.
ނަޞްރުގެ ދުވަހުން ޙާޞިލުކުރެވިދާނެ ޢިބުރަތްތަކަށް އަލިއަޅުއްވާލައްވަމުން އެމަނިކުފާނު ވިދާޅުވީ ޤައުމީ އުޞޫލުތަކަކީ ސިޔާސީ ކަންކަމަށްވުރެ އިސްކަންދޭންޖެހޭ ކަންތައްތަކެއް ކަމަށެވެ. އަދި ޤައުމުގެ ޢިއްޒަތާއި ޝަރަފަށްޓަކައި ފުރާނައިން ޤުރުބާންވުމަކީ ދިވެހިންގެ ތެރޭގައި ވަރަށް ފުނަށް، ބިންވަޅުނެގިފައިވާ ކަމެއްކަން ނަޞްރުގެ ދުވަހު އެނގިވަޑައިގެންނެވި ކަމަށް ވިދާޅުވިއެވެ.
ނަޞްރުގެ ދުވަހު ޝަހީދުވި ސިފައިން އެމަނިކުފާނު ސިފަކުރެއްވީ، ޤައުމުގެ މިނިވަންކަމާ ސިޔާދަތުގެ ދިފާޢުގައި އަދި ދިވެހިރާއްޖޭގެ ޢިއްޒަތާ ޝަރަފަށްޓަކައި މަރުވެދިޔަ ޤައުމީ އަބުޠާލުންގެ ގޮތުގައެވެ. އަދި އެ ދުވަހު ޤައުމަށް ލިބުނު ނަޞްރަކީ، މާތް ﷲ ގެ ހަޟްރަތުން ލިބުނު ނަޞްރެއްކަން ހަނދާންކުރަންޖެހޭކަމަށާއި، އަޅުގަނޑުމެންގެ އަމިއްލަ ސަލާމަތާއި ރައްކާތެރިކަމަށްޓަކައިވެސް އަޅުގަނޑުމެންގެ އީމާންކަން ވަރުގަދަކޮށް، މާތް ﷲ އަށް އޮންނަ ލޯބި އިތުރުކުރުމަށް އެމަނިކުފާނު އިލްތިމާސްކުރެއްވިއެވެ.
އޭރުވެސް، އަދި ފަހުންވެސް، ދިވެހި ސިޔާދަތައް ތާއީދުކުރާ، އެކުވެރި ޤައުމުތަކާއި، ބައިނަލްއަޤުވާމީ ޖަމާޢަތްތަކަށް ޝުކުރު ދަމަހައްޓަންޖެހޭ ކަމަށްވެސް ރައީސް އަލްއުސްތާޛު މައުމޫން ޢަބްދުލް ޤައްޔޫމް ވިދާޅުވިއެވެ. އަދި ނަޞްރުގެ ދުވަހު އެހީތެރިވެދިން ޤައުމުތަކާއި ޖަމިއްޔާތަކުގެ އަގު ވަޒަންކުރަންޖެހޭކަމުގައިވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ ދިވެހި ޤައުމު އިސްލާމްވީއްސުރެ، ދިވެހި ރާއްޖެ އޮތީ އިސްލާމީ އުއްމަތުގެ ރޫޙާނީ ވިންދު ޖަހާ ގުނަވަނެއްގެ ގޮތުގައިކަމަށެވެ. ފަލަސްތީނުގެ އުޚުއްވަތްތެރި ރައްޔިތުން، އަދި ވަކިން ޙާއްސަކޮށް ޣައްޒާގެ ރައްޔިތުން ތަހައްމަލުކުރަމުންދާ އިސްރާއިލުގެ ލާއިންސާނީ އަނިޔާ ކުށްވެރިކޮށް ފަލަސްތީނުގެ ޖިހާދަށް ތާއީދުކުރުމުގައި ދިވެހިން ދެމިތިބުމަށް އެމަނިކުފާނު ވަނީ ދިވެހިންނަށް އިލްތިމާސްކުރައްވާފައެވެ.
ރިއެކްޝަންސް
