މިނިސްޓަރ ޑރ.އަބްދުالله މުއްޠަލިބުގެ ޕްރެސްއިން ތަރައްޤީގެ ހުލާސާއެއް!
38 މަޝްރޫއެއްގެ މަސައްކަތް ނިންމާލެވިއްޖެ
އިމާރާތް ކުރުމާއި ބިނާރާބެހޭ ވަޒީރު ޑރ.އަބްދުالله މުއްތަލިބަކީ ރައްޔިތުންގެ ލޮލަށް ފެންނާނަ އުމްރާނީ ތަރައްޤީގެ ބިނާތައް މަތިމައްޗަށް ނަގާ ކޮޅަށް ޖެހުމުގެ މަސްއޫލިއްޔަތާ ހަވާލުވެވަޑައިގެން ހުންނެވި ވަޒީރެވެ. އެމިނިސްޓްރީއާއި, އެމިނިސްޓަރުގެ ޕްރެސްކޮންފަރެއްސްތަކަށް އޮންނަ ސަމާލުކަންވެސް ބޮޑެވެ. އެއީ ތިމަންނާގެ ރަށާއި, ގައުމުގެ ބޮޑަތި މަޝްރޫއުތަކުގެ އަދާހަމަ އޮޅުން ފިލާނެތީއެވެ. ހޯމަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުންވެސް ވީ އެފަދަ ބައްދަލުވުމަކަށެވެ.
އެކަމަކު ނުސްވެރިންގެ ބައްދަލުވުމުގައި ވަރަށް މުހިއްމު އެއްކަމަށް ވަޒީރު ސާފްކޮށްދެއްވިއެވެ. ވިދާޅުވީ އެމިނިސްޓްރީއަކީ ބަޖެޓް ކަނޑައެޅި, ސަރުކާރުން ހަވާލުކުރައްވާ ނުވަތަ ބަޖެޓްކޮށްފައިވާ މަޝްރޫއުތައް އެބަޖެޓްގެ ތެރެއިން ހިންގާ ވުޒާރާއެއް ކަމެވެ. ބަޖެޓްގައި ހުންނަ ފައިސާ އެކި ކަންކަމަށް ބަހާ ނުވަތަ އަމިއްލަ އިސްނެގުމަށް މަބްރޫއުތައް ހިންގާ ވުޒާރާއެއް ނޫންކަމެވެ. އެއާއެކު ދެން ވިދާޅުވެ ހަނދާންކޮށްދެއްވީ ބަޖެޓްގައި ހުރި ތާށިކަމެވެ. މަޝްރުއުތައް ނިންމޭ ވަރަށް ބަޖެޓްގައި އެމަޝްރޫއުތަކަށް ފައިސާ ހިމަނާފައި ނެތުމުން މަޝްރޫއުތައް ކުރިއަށް ގެންދިއުމަށް ނުވަތަ ނިންމަން ކުރިމަތިވާ ގޮންޖެހުންތަކާއި ހުރަސްތަކެވެ. އެހާލަތުގައި އެކަންކަން ފުރިހަމަ ނުކުރެވޭނެ ކަމެވެ. އެއާއެކުވެސް ރައީސް ޑރ.މުހައްމަދު މުއިއްޒުގެ ރިޔާސީ މިދައުރުގައި ކުރިއެރުންތަކެއް ހޯދި ނަތީޖާތަކެއް ހާސިލްކުރެވިފައިވާކަމަށް ވިދާޅުވެ އަދަދުތަކެއް ސްކްރީނުން ދެއްކެވިއެވެ.
މިދައުރުގައި މިހާތަނަށް 38 މަޝްރޫއެއް މުޅިން ނިންމާލެވިއްޖެ ކަމަށް ވިދާޅުވިއެވެ. އޭގެތެރޭގައި ކުރިން ފަށާފައިވާ މަޝްރޫއުތައްވެސް ހިމެނެއެވެ. އޭގެ ތަދްސީލަސް ދަމުން ވިދާޅުވީ ފެނާއި ނަރުދަމާގެ 29 މަޝްރޫއަކާއި, ބަނދަރު ހެދުމުގެ 4 މަޝްރޫއަކާއި, ގޮނޑުދޮށް ހިމާޔަތް ކުރުމުގެ 3 މަޝްރޫއެއްގެ އިތުރުން ބިންހިއްކުމުގެ މަޝްރޫއަކާއި, މަގުހެދުމުގެ މަޝްރުއެއްވެސް ނިންމާލެވިއްޖެ ކަމަށެވެ. އެމަޝްރޫއުތައް ނިސްބަތްވާ ރަށްތައް ސްކްރީނުން ދެއްކެވިއެވެ.
https://www.facebook.com/share/v/9XjStRtnyHKxJk4j/
މީގެއިތުރުން ރައީސް ޑރ.މުހައްމަދު މުއިއްޒުގެ ރިޔާސީ ދައުރުގެ ފުރަތަމަ އަހަރު ހަމަވުމުގެ ކުރިން އިތުރު 21 މަޝްރޫއެއް ނިންމާލެވޭނެ ކަމުގެ ޔަގީންކަން ދެއްވިއެވެ. އޭގެފަހުން ދެން ތަފްސީލް ދެއްވީ ބިޔަބޮޑަތި މަޝްރޫއުތަކުގެ އަދާހަމައެވެ. އެގޮތުން އެންމެ ބޮޑު މަޝްރޫއަކީ ތިލަމާލެ ކަނެކްޓިވިޓީ ބްރިޖްގެ މަސައްކަތެވެ. އެމަޝްރޫއުގެ %45.82 ނިމިއްޖެ ކަމަށް ވިދާޅިއެވެ. އޭގެ ތަފްސީލަށް ވަޑައިގެން ވިދާޅުވީ ތަނބުތަކުގެ ޕައިލިންގ މަސައްކަތުގެ %79.5 ނިމިއްޖެ ކަމަށެވެ. އަދި ޕްރީކާސްޓްސް ސެގްމަންޓްސްގެ 43.5% އާއި ޕިއަރ ކޮމްޕްލެކްސްގެ %62.2 އާއި ޕައިލް ކެޕްގެ %67.8 މަސައްކަތް ނިމިފައިވާ ކަމަށް ވިދާޅުވިއެވެ. ނަމަވެސް ބައެއް މަސައްކަތްތަކުގެ ސްޕީޑް އެންމެ ރަނގަޅު ނޫންކަމަށް ވިދާޅުވިއެވެ. އޭގެ ސަބަބެއްކަމަށް މަސައްކަތް ކުރާ ފަރާތުން މޫސުމީ މައްސަލަތައް ނެގި ނަމަވެސް އެކަން ގަބޫލުނުކުރައްވާނެ ކަމަށް ވިދާޅުވިއެވެ. މާބޮޑު ތަނެއް ލަސްކަމަށް ނުފެނުނަސް, ބައެއްކަހަލަ ކްރިޓިކަލް މަސައްކަތްތައް ބޭނުންވާ ސްޕީޑްގައި ކުރިއަށް ނުދާކަމަށް ވަޒީރު ވިދާޅުވިއެވެ.
"ކޮންޓްރެކްޓަރާ އަޅުގަނޑުމެން ފާހަގަކޮށްފަވާނެ ކަނޑުގަދަވެގެން މިއަންނަ ކަމަކީ އެބޭފުޅުންނަށް މަސައްކަތް ލަސްކުރުމަށް ސަބަބެއްގެ ގޮތުގައި ދައްކަން އޮތް ފުރުސަތެއް ކަމަކަށް" ވަޒީރު ވިދާޅުވިއެވެ.
މީގެއިތުރުން ވަޒީރުގެ ޕްރެސްކޮންފަރެންސުން އެންމެ ބޮޑު ސަމާލުކަމެއް ހުއްޓުނު ވާހަކައަކީ މާލެއިން ރަސްމާލެއަށް އަޅަން ރައީސް ޑރ.މުހައްމަދު މުއިއްޒުގެ ތަސައްވަރުގައި އޮތް ކަނޑު އަޑީގެ ޓަނަލްގެ ވާހަކައެވެ. ވަޒީރު ވިދާޅުވީ އެއީ ރައީސް ޑރ.މުހައްމަދު މުއިއްޒުގެ ވަރަށް ބޮލްޑް ތަސައްވަރެއް ކަމަށެވެ. އެއީ ވަގުތު ނަގާނެ, ވިޜަންއެއް ކަމަށް ވިދާޅުވިއެވެ.
"އަޅުގަނޑު ދެކޭގޮތުގައި ރައީސުލްޖުމްހޫރިއްޔާ އެމްބިޝަން ކުރެއްވި ކަމަކީ ހަމަ ދިވެހި ގައުމަށް ޖުމްލަކޮށް ތަރައްޤީ ބޭނުންވާތީ އެމަނިކުފާނު ވަރަށްބޮޑަށް ބޭނުންފުޅު ވެގެން ކުރެއްވި ކަމެއް. އާދަޔާހިލާފް ކަމެއްގެ ވާހަކަ އެދައްކަވަނީ. އެހެންވީމަ އެކަމަށް މަސައްކަތް ކުރުމަކީ މިހާރު އަޅުގަނޑުމެންނަށް ކުރަން އޮތް ކަމެއް." ވަޒީރު ވިދާޅުވިއެވެ.
މީގެއިތުރުން ނޫސްވެރިންގެ ބައްދަލުވުމުގައި ވަޒީރު ވަނީ މާލެ ސިޓީ ކައުންސިލުން ޒިންމާ ފުރިހަމައަށް އަދާނުކުރައްވާ ކަމުގެ ތުހުމަތުވެސް ކުރައްވާފައެވެ. އެގޮތުން މާލޭގެ މަތުތައް މަރާމާތުކޮށް ބެލެހެއްޓުމުގެ މަސައްކަތް ނުކުރާ ކަމަށް ވިދާޅުވިއެވެ. މާލޭގައި އެންމެ ބޮޑަށް ފެންބޮޑުވާ މަގުތަކުގެ ފެންބޮޑުވުން ހައްލުކުރަން ވަގުތީ ހައްލެއް ސަރުކާރުން ހޯދީވެސް ސިޓީ ކައުންސިލުން އަޅާނުލުމުން ކަމަށް ވިދާޅުވިއެވެ. ވަޒީރު ވިދާޅުވީ މާލެ ސިޓީ ކައުންސިލަކީ ފައިނޭންޝިއަލީ ވެސް ޓެކްނިކަލީވެސް އެކަން ކުރެވޭ ވަރުގެ ޤާބިލް ތަނެއް ކަމަށެވެ. އެކަމަކު އެކަން ނުކުރުމުން ސަރުކާރުން ކުރަން ޖެހުނީ ކަމަށެވެ.
ރައްޔިތުންނަށް ދަތިވާ ކަންކަމުގައި ބަލަން ސަރުކާރަށް ނޯވެވޭނެ ކަމަށާއި, އެކަންކުރީވެސް އެއުސޫލުން ކަމަށް ވިދާޅުވިއެވެ. ވަޒީރުގެ އެންމެ ބޮޑު ކަންބޮޑުވުމަކީ ގިނައަދަދެއްގެ ބޮދަތި މަޝްރޫއުތައް އެމިނިސްޓްރީއާ މިދިޔަ ސަރުކާރުން ހަވާލުކުރި ނަމަވެސް, އެމަޝްރޫއުތައް ކުރިއަށް ގެންދެވޭނެ ބަޖެޓެއް ކަނޑައަޅާފައި ނެތުމެވެ. މުޅި ދައުލަތުގެ ބަޖެޓާ ނުބައްދަލު ޚަރަދެއް ހިނގާނެ މަޝްރޫއުތައް ހަވާލުކޮށްފައި ވުމެވެ. އަދި އެހާ ގިނަ އަދަދެއްގެ ބިލްތައް ފައިސާ ދައްކަން އެމިނިސްޓްރީއަށް ލިބިފައި ވުމެވެ. އެއާއެކުވެސް ވަޒީރު ގަބޫލުކުރައްވަނީ މަސައްކަތްތަކެއް ކުރެވިއްޖެ ކަމަށެވެ.
ރިއެކްޝަންސް
