ރާއްޖެއަށް ރަސްމީ ދަތުރުފުޅެއް ކުރެއްވުމަށް މޯދީ އަށް ދައުވަތު ދެއްވައިފި
ރާއްޖެއަށް ރަސްމީ ދަތުރުފުޅެއް ކުރެއްވުމަށް އިންޑިޔާގެ ބޮޑުވަޒީރު ނަރެންދުރަ މޯދީ އަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދައުވަތު ދެއްވައިފި އެވެ. ރައީސް މުއިއްޒު މިކަން އިއުލާނުކުރެއްވީ އިންޑިޔާއަށް މިހާރު ކުރައްވަމުން ގެންދަވާ ދަތުރުފުޅުގައި މޯދީއާ ބައްދަލުކުރެއްވުމަށްފަހު ދެއްވި ރަސްމީ ސްޓޭޓްމަންޓްގައެވެ.
ރައީސް ޑރ.މުހައްމަދު މުއިއްޒު ވިދާޅުވީ އިންޑިޔާއާއި ރާއްޖޭގެ ސިޔާސީ ގުޅުމަށް އަންނަ އަހަރު 60 އަހަރު ފުރުން ފާހަގަކުރާ މުނާސަބަތުގައި ރާއްޖެއަށް ރަސްމީ ދަތުރުފުޅެއް ކުރެއްވުމުގެ ދައުވަތު މޯދީއަށް ދެއްވާ ކަމަށެވެ. ރައީސް މުއިއްޒު ވިދާޅުވީ ދެގައުމުގެ ކުރިމަގަށް ފައިދާވާނެ ގޮތަށް ދެގައުމުގެ ގުޅުން ބަދަހިކަމާއެކު ކުރިއަށްދާނެ ކަމުގެ ޔަގީންކަން އެބައޮތް ކަމަށެވެ.
" ދެގައުމު ގުޅިގެން ދެގައުމުގެ ކުރިމަގަށް ފައިދާވާނެ ގޮތަށް މަސައްކަތް ކުރާނަން" ރައީސް ވިދާޅުވިއެވެ.
އިންޑިޔާ ކަނޑުގެ ސަލާމަތަށް އަބަދުވެސް މަސައްކަތް ކުރައްވާނެ ކަމުގެ ޔަގީންކަން ދެއްވަމުން ރައީސް މުއިއްޒު ވިދާޅުވީ އެކަމުގައިވެސް އެންމެ މުހިއްމު ބައިވެރިއަކީ އިންޑިޔާ ކަމަށެވެ.
ރައީސް މުއިއްޒު ވިދާޅުވީ ދެގައުމު ގުޅިގެން ދެގައުމަށް ފައިދާކުރަނިވި ދާއިރާތަކުން އަބަދުވެސް މަސައްކަތް ކުރައްވާނެ ކަމަށެވެ. އިންޑިޔާއަކީ ރާއްޖޭގެ ފަތުރުވެރިކަމުގެވެސް އެންމެ ބޮޑު އެއްބައިވެރިޔާކަން ރައީސް ފާހަގަކުރެއްވިއެވެ. އެންމެބޮޑު މާކެޓެއް އޮތް އެއް ގައުމަކީ އިންޑިޔާކަން ފާހަގަކުރައްވާ ރައީސް ވިދާޅުވީ އިންޑިޔާގެ ފަތުރުވެރިންނަށް ރާއްޖެ އަބަދުވެސް މަރުހަބާ ކިޔާނެ ކަމަށެވެ. ރާއްޖޭގެ ތަރައްޤީއާއި އިގްތިސާދުގައިވެސް އެންމެ ބޮޑު އެއް ބައިވެރިއަކީ އިންޑިޔާކަން ރައީސް ފާހަގަކުރެއްވިއެވެ.
ރިއެކްޝަންސް
