ޕެންޝަން ފަންޑުގެ އެސެޓް 30 ބިލިއަން ރުފިޔާ ފަހަނައަޅައިފި

ދިވެހިރާއްޖޭގެ ރިޓަޔަރމަންޓް ޕެންޝަން ފަންޑުގެ ދަށުން މެނޭޖްކުރާ ޖުމްލަ އެސެޓްގެ އަގު 30.3 ބިލިއަން ރުފިޔާއަށް އަރައި، މިއަހަރު ފަންޑުގެ ސައިޒު 30 ބިލިއަން ރުފިޔާ ފަހަނައަޅައި ގޮސްފައިވާކަން ޕެންޝަން އެޑްމިނިސްޓްރޭޝަން އޮފީހުން ހާމަކޮށްފިއެވެ.

މިކަން ހާމަކުރެއްވީ ޕެންޝަން އޮފީހާއި ޔޫއެންޑީޕީ ގުޅިގެން ދުސިތް ޑީ2 ފޭދޫ މޯލްޑިވްސްގައި މިއަދު ފެށި 13 ވަނަ "މޯލްޑިވްސް ފައިނޭންސް ފޯރަމް" ހުޅުވުމުގެ ރަސްމިއްޔާތުގައި، އެ އޮފީހުގެ ޗީފް އެގްޒެކެޓިވް އޮފިސަރ ޔަޒްމީދު މުޙައްމަދު ދެއްވި ތަޤްރީރުގައެވެ.

ޕެންޝަން އޮފީހުގެ ޑޭޓާ ޕޯޓަލްގައި ޝާއިޢުކޮށްފައިވާ 2026 ސެޕްޓެމްބަރު 30 ގެ ތަފާސްހިސާބުތަކަށް ބަލާއިރު، ރާއްޖޭގެ އެންމެ ބޮޑު އިންސްޓިޓިއުޝަނަލް އިންވެސްޓަރގެ ގޮތުގައި އޮތް މި ފަންޑުގެ ރިޓަޔަރމަންޓް ޕެންޝަން ސްކީމް (އެމްއާރްޕީއެސް) ގައި މިހާރު 204,549 މީހުން ބައިވެރިވެފައިވެއެވެ.

ޔަޒްމީދު ވިދާޅުވީ، ރާއްޖޭގެ ރަށްތަކުގެ ގާތްގަނޑަކަށް %80 އަކީ ކަނޑުގެ ލޮނުގަނޑަށްވުރެ އެއް މީޓަރަށްވުރެ ތިރި ރަށްތަކަކަށް ވުމާއެކު، މޫސުމީ ބަދަލުތަކުގެ ސަބަބުން މަސްވެރިކަމާއި ފަތުރުވެރިކަން ފަދަ މައިގަނޑު ސިނާއަތްތަކަށް ކުރިމަތިވާ ހީނަރުކަމަކީ ޕެންޝަން ފަންޑަށް އޮތް ސީދާ މާލީ ހިރާހެއް ކަމަށެވެ. އެހެންކަމުން މެންބަރުންގެ މާލީ ރައްކާތެރިކަން ކަށަވަރުކުރުމަށްޓަކައި، ތިމާވެއްޓާއި ރައްޓެހި ދެމެހެއްޓެނިވި (ގްރީން) އިންވެސްޓްމަންޓްތަކަށް އަހައްމިއްޔަތުކަން ދޭންޖެހޭ ކަމަށް އޭނާ ފާހަގަކުރެއްވިއެވެ.

"ގްރީން އިންވެސްޓްމަންޓްގެ މާނައަކީ މާލީ އިންޒިބާތު ދޫކޮށްލުމެއް ނޫން،" ޔަޒްމީދު ވިދާޅުވިއެވެ. "ކޮންމެ އިންވެސްޓްމަންޓަކީވެސް ހަރުދަނާ ހިންގުމުގެ ނިޒާމެއްގެ ތެރެއިން، ހިރާސްތައް ވަޒަންކުރެވިފައިވާ، އަދި މާލީ ގޮތުން ފައިދާހުރި ކަމެއްކަން ސާބިތުވާ އިންވެސްޓްމަންޓަކަށް ވާންޖެހޭނެ."

މިއަހަރުގެ މޯލްޑިވްސް ފައިނޭންސް ފޯރަމް ކުރިއަށްދަނީ "ގްރީން ފައިނޭންސް: ރާއްޖޭގައި ދެމެހެއްޓެނިވި އިންވެސްޓްމަންޓާއި މާލީ ރައްކާތެރިކަން" މި މައުޟޫއުގެ ދަށުންނެވެ.