އަމީނީ މަގު މަރާމާތުކުރުމުގެ ދެވަނަ ސެގްމަންޓުގެ މަސައްކަތް އެމްޓީސީސީން ފަށައިފި

މާލޭގެ އަމީނީ މަގު މަރާމާތުކުރުމަށް ކުރިއަށްގެންދާ މަޝްރޫޢުގެ ދަށުން، ދެވަނަ ސެގްމަންޓުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ފަށައިފިއެވެ. މި މަޝްރޫޢުގެ ފުރަތަމަ ސެގްމަންޓުގައި ތާރު އެޅުމުގެ މަސައްކަތް މިދިޔަ އަންގާރަ ދުވަހު ވަނީ ކާމިޔާބުކަމާއެކު ނިންމާލާފައެވެ.

ޒަމާނީ ފެންވަރަށް ތާރުއަޅައިގެން ތަރައްޤީކޮށްފައިވާ އަމީނީ މަގުގެ ތާރުފަށަލަ ހަލާކުވުމާ ގުޅިގެން، އެ ސަރަޙައްދު މަރާމާތުކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ މިއަހަރުގެ ޖޫން މަހުގެ ތެރޭގައެވެ. މި މަސައްކަތް ކުރިއަށް ގެންދަނީ އެކި ސެގްމަންޓްތަކަށް ބަހާލައިގެންނެވެ. އެގޮތުން، ސެގްމަންޓް 1 ގެ ދަށުން ޢިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލު ކައިރީގައި އޮންނަ ޕާކާ ހަމައަށް ތާރުއެޅުމުގެ މަސައްކަތް މިހާރު ވަނީ އެއްކޮށް ނިންމާލާފައެވެ.

ފުރަތަމަ ފިޔަވަހީގެ މަސައްކަތް ނިމުމާއެކު މިހާރު ފަށާފައިވަނީ ދެވަނަ ސެގްމަންޓުގެ މަސައްކަތެވެ. މި ސެގްމަންޓުގައި ހިމެނެނީ ޢިއްޒުއްދީން މަގުން ފެށިގެން ޣިޔާސުއްދީން އިންޓަނޭޝަނަލް ސްކޫލާ ހަމައަށް އޮތް ސަރަޙައްދު މަރާމާތުކުރުމެވެ.

އެމްޓީސީސީން މަޢުލޫމާތު ދެއްވި ގޮތުގައި، ފުރަތަމަ ފިޔަވަހީގެ ސަރަޙައްދުގައި މަގުމަތީގެ ނިޝާންތައް ކުރެހުމާއި، ޔުޓިލިޓީ ޖަންކްޝަންތައް އެއްވަރުކުރުމުގެ މަސައްކަތް މިހާރު ދަނީ ބާރަށް ކުރިއަށެވެ. އަދި ދެވަނަ ފިޔަވަހީގެ ދަށުން މިހާރު ކުރިއަށްދަނީ ބާވެ ހަލާކުވެފައިވާ ތާރުގަނޑު ނެގުމުގެ މަސައްކަތެވެ. މަގުގެ ފެންވަރު ރަނގަޅުކުރުމަށްޓަކައި އަލުން ތާރުއަޅާއިރު ދެ ފަށަލައަށް ތާރު އެޅުމަށް ވަނީ ހަމަޖެހިފައެވެ.

އަމީނީ މަގުގެ ތާރުގަނޑު މީގެކުރިން އަވަހަށް ހަލާކުވާން މެދުވެރިވި ސަބަބުތަކަށް ބަލާއިރު، ތާރު އެޅުމަށްފަހު އެކަށީގެންވާ ވަރަށް ނުހިކެނީސް އުޅަނދުތަކަށް މަގު ހުޅުވާލުން ހިމެނޭކަމަށް ފަންނީ މާހިރުން ފާހަގަކުރައްވައެވެ. މީގެއިތުރުން، އެ ސަރަޙައްދަކީ ބޮޑެތި ބަސްތައް ގިނައިން ދަތުރުކުރާ މަގަކަށް ވުމާއި، ރާއްޖޭގެ ހޫނުމިން މަތިވާ ދުވަސްވަރު ތާރުގަނޑަށް ކުރާ އަސަރުތަކުގެ ސަބަބުން ވެސް މަގު ހަލާކުވުމަށް މަގުފަހިވާކަން ފާހަގަކުރެވެއެވެ. އެމްޓީސީސީން ދަނީ އާންމުންނަށް ދަތިނުވާނޭހެން ވީހާވެސް އަވަހަށް މި މަޝްރޫޢުގެ މަސައްކަތްތައް ފުރިހަމަކުރުމަށް މަސައްކަތް ކުރަމުންނެވެ.