މީރާގެ ޑިޖިޓަލް ޓްރާންސްފޯމޭޝަން ރޯޑްމެޕަކީ ދައުލަތުގެ ޚިދުމަތްތައް ހަރުދަނާކުރުމަށް އެޅުނު މުހިންމު ފިޔަވަޅެއް: މިނިސްޓަރ ސައީދު

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން އެކުލަވާލި "ޑިޖިޓަލް ޓްރާންސްފޯމޭޝަން ރޯޑްމެޕް 2025-2034" އަކީ ދައުލަތުގެ ޚިދުމަތްތަކަކީ މިއަށްވުރެ ހަރުދަނާ، ފަސޭހައިން ލިބޭ އަދި އިޖާބަދޭ ޚިދުމަތްތަކަކަށް ހެދުމަށްޓަކައި އެޅުނު މުހިންމު ފިޔަވަޅެއް ކަމަށް މިނިސްޓަރ އޮފް އިކޮނަމިކް ޑިވަލަޕްމަންޓް، ޓްރާންސްޕޯޓް އެންޑް ޓްރޭޑް މުހައްމަދު ސައީދު ވިދާޅުވެއްޖެއެވެ.

މި ރޯޑްމެޕް ރަސްމީކޮށް އިފްތިތާހުކޮށްދެއްވުމަށްފަހު އެކްސްގައި ކުރެއްވި ޕޯސްޓެއްގައި މިނިސްޓަރ ސައީދު ވިދާޅުވީ، މިއީ ސަރުކާރުގެ ޑިޖިޓަލް ޓްރާންސްފޯމޭޝަން އެޖެންޑާ އަވަސްކުރުމަށް އެޅުނު ބާރެއް ކަމަށެވެ. މީރާގެ އަމާޒަކީ ކުރިއަށް އޮތް 10 އަހަރު ދުވަހުގެ ތެރޭގައި ޒަމާނީ ޓެކްނޮލޮޖީގެ އެހީގައި ޓެކްސް އިދާރާގެ ހިންގުން ހަރުދަނާކޮށް، ޓެކްސް ދައްކާ ފަރާތްތަކަށް އިތުބާރު ހުރި ލުއިފަސޭހަ ޚިދުމަތްތަކެއް ފޯރުކޮށްދިނުމެވެ.

މި މަޝްރޫޢުގެ ދަށުން ކުރިއަށް ގެންދާ އެންމެ މުހިންމު އެއް މަސައްކަތަކީ "އީ-އިންވޮއިސިން" ނިޒާމު ތައާރަފްކުރުމެވެ. މި ނިޒާމުގެ ސަބަބުން ވިޔަފާރިތަކުގެ އެކައުންޓިން ސޮފްޓްވެއާތަކާއި މީރާގެ ނިޒާމު ސީދާ ގުޅާލެވި، ޓެކްސް ބަޔާން ހުށަހެޅުމުގައި ދިމާވާ ކުށްތައް މަދުވެ، ވަގުތު ސަލާމަތްވާނެއެވެ. މީގެ އިތުރުން މީރާގެ ކޯ އީއާރުޕީ ސިސްޓަމް އަޕްގްރޭޑް ކުރުމާއި، އެހެން އިދާރާތަކާ ގުޅިފައިވާ މަރުކަޒީ ޑޭޓާ ރިޕޮސިޓަރީއެއް ގާއިމުކުރުންވެސް މި ރޯޑްމެޕްގައި ހިމެނެއެވެ.

މި ރޯޑްމެޕް ތަންފީޒުކުރުމަށް ހަމަޖެހިފައިވަނީ މައިގަނޑު ހަތަރު ފޭސްއަކަށް ބަހާލައިގެންނެވެ:

ފުރަތަމަ ފޭސް (2025-2026): އީއާރުޕީ އަޕްގްރޭޑް ކުރުމުގެ ޕްލޭނިން އަދި ގާނޫނީ އިސްލާހުތައް ގެނައުން.
ދެވަނަ ފޭސް (2027-2028): އީ-އިންވޮއިސިން ތައާރަފްކުރުމާއި ނިޒާމުތައް އޮޓޮމޭޓްކުރުން.
ތިންވަނަ ފޭސް (2029-2032): އާޓިފިޝަލް އިންޓެލިޖެންސް (އޭއައި) އަދި އެޑްވާންސް ޑޭޓާ އެނަލިޓިކްސް ބޭނުންކުރަން ފެށުން.
ހަތަރުވަނަ ފޭސް (2033-2034): ނިޒާމުތައް އިތުރަށް ހަރުދަނާކޮށް އާ އީޖާދުތަކަށް މަގުފަހިކުރުން.

މީރާއިން ބުނި ގޮތުގައި މި ބަދަލުތަކާއެކު މުވައްޒަފުންގެ ހުނަރު ތަރައްގީކުރުމަށާއި، ސައިބަރ ސެކިއުރިޓީ ވަރުގަދަކޮށް ޓެކްސް ދައްކާ ފަރާތްތަކުގެ މައުލޫމާތުގެ ރައްކާތެރިކަން ކަށަވަރުކުރުމަށް ޚާއްސަ އިސްކަމެއް ދެވޭނެއެވެ. މި މަޝްރޫޢަކީ ދެފުށް ފެންނަ، ޑޭޓާގެ މައްޗަށް ބިނާވެފައިވާ ޒަމާނީ ޓެކްސްގެ ނިޒާމެއް ގާއިމުކުރުމަށް ކުރެވޭ މުހިންމު މަސައްކަތެކެވެ.