އިންތިޚާބުން ބަލިވި އަލައިކާއަށް ޓޫރިޒަމް މިނިސްޓްރީގެ ސްޓޭޓް މިނިސްޓަރުކަން!

މާލެ ސިޓީ ކައުންސިލްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ރައީސްކަމުގެ މަޤާމަށް ސަރުކާރު ހިންގާ ޕީއެންސީގެ ޓިކެޓުގައި ވާދަކޮށް ނާކާމިޔާބުވި އާޝިޔަތު އަލައިކާ އަދުނާނު، މިނިސްޓްރީ އޮފް ޓޫރިޒަމްގެ ސްޓޭޓް މިނިސްޓަރުކަމުގެ މަޤާމަށް އައްޔަންކޮށްފިއެވެ.

މިދިޔަ ލޯކަލް ކައުންސިލް ބައި-އިލެކްޝަންގައި މާލެ ސިޓީގެ ޑަބްލިއުޑީސީގެ ރައީސްކަމަށް ވާދަކުރެއްވި އަލައިކާއަށް އެ އިންތިޚާބުގައި ކުރިމަތިވީ ނާކާމިޔާބީއެވެ. އެ މަޤާމަށް އިންތިޚާބުވީ އިދިކޮޅު އެމްޑީޕީގެ ކެންޑިޑޭޓް އައިޝަތު ރީޝާއެވެ. ރީޝާ އެ އިންތިޚާބު ކާމިޔާބު ކުރެއްވީ އަލައިކާގެ މައްޗަށް 3,181 ވޯޓުގެ ބޮޑު ތަފާތަކުން ކުރި ހޯއްދަވައިގެންނެވެ.

އަލައިކާ ޓޫރިޒަމް މިނިސްޓްރީގެ ސްޓޭޓް މިނިސްޓަރުކަމަށް އައްޔަންކޮށްފައިވާކަން "ދިވެހިޖީޕީޓީ" އަށް ކަށަވަރުވެފައިވީ ނަމަވެސް، މި އައްޔަންކުރުމާ ގުޅޭގޮތުން ސަރުކާރުން އަދި ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ.

މި އައްޔަންކުރުން އައިސްފައި މިވަނީ، ދާދިފަހުން ބޭއްވުނު ކައުންސިލް އިންތިޚާބުތަކުން ސަރުކާރަށް ލިބުނު ނާކާމިޔާބީއާ ގުޅިގެން ސަރުކާރުގެ އޮނިގަނޑަށް ބަދަލުތަކެއް ގެންނަމުންދާ ދަނޑިވަޅެއްގައެވެ. ޚާއްޞަކޮށް، އިޤްތިޞާދީ އިޞްލާޙީ ފިޔަވަޅުތަކުގެ ދަށުން ސިޔާސީ އިތުރު މަޤާމުތަކަށް މީހުން އައްޔަން ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން ވަނީ ވިދާޅުވެފައެވެ.

މީގެ އިތުރުން، ދައުލަތުގެ ޚަރަދުތައް ކުޑަކުރުމުގެ ފިޔަވަޅެއްގެ ގޮތުން، ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދު 33 އިންސައްތައަށް މަދުކުރުމަށް ފިނޭންސް މިނިސްޓަރު މޫސާ ޒަމީރު ވަނީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް އަންގަވާފައެވެ. މިފަދަ ހަރުދަނާ ފިޔަވަޅުތަކެއް އަޅަމުންދާ ދަނޑިވަޅެއްގައި ސިޔާސީ މަޤާމަކަށް އައު ބޭފުޅަކު އައްޔަންކުރުމުން ގިނަ ބައެއްގެ ސަމާލުކަން މިކަމަށް ވަނީ ހުއްޓިފައެވެ.