މަޖީދީމަގުގައި ހިނގި އެކްސިޑެންޓަކާ ގުޅިގެން މީހަކު ހޯދަން ފުލުހުން ވީޑިއޯއެއް އާންމުކޮށްފި
މާލޭގެ މަޖީދީމަގުގައި ހިނގި ނުރައްކާތެރި އެކްސިޑެންޓަކަށްފަހު މަޑުނުކޮށް ފިލައިގެން ދިޔަ މީހަކު ހޯދުމަށް ފުލުހުން އާންމުންގެ އެހީތެރިކަމަށް އެދިއްޖެއެވެ.
ފުލުހުން ބުނި ގޮތުގައި މާލެ ޓްރެފިކް އިންވެސްޓިގޭޝަނުން ތަހުގީގު ކުރަމުންދަނީ، މަޖީދީމަގު އަތަމާ ޕެލަސް ކައިރިން މަގު ހުރަސްކުރި އަންހެނެއްގެ ގައިގައި ސައިކަލަކުން ޖެހި އެކްސިޑެންޓްވުމުން، މަޑުނުކޮށް ފިލައިގެން ގޮސްފައިވާ މައްސަލައެކެވެ. މި މައްސަލައާ ގުޅިގެން ހޯދަން ބޭނުންވާ މީހާއަކީ ކާކުކަން މިހާތަނަށް ދެނެގަނެވިފައި ނުވާތީ، ފުލުހުން ވަނީ އެ މީހާ ފެންނަ ވީޑިއޯއެއް އާންމުކޮށްފައެވެ.
https://www.youtube.com/watch?v=UR1NZXEl5LQ
ފުލުހުން އެދިފައިވަނީ ވީޑިއޯއިން ފެންނަ މީހާއާ ބެހޭ އެއްވެސް މައުލޫމާތެއް ލިބިފައިވާނަމަ ނުވަތަ މި އެކްސިޑެންޓް ހިނގި މަންޒަރު ދުށް ފަރާތެއްވާނަމަ، އެ މައުލޫމާތެއް ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅުއްވައި ހިއްސާކޮށްދެއްވުމަށެވެ.
މީގެ އިތުރުން، މިފަދަ ކުށްތައް ކުރާ މީހުންނާއި ތަހުގީގަށް ބޭނުންވާ މީހުން ހޯދުމުގައި ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުން ފާހަގަކޮށް، ފުލުހުން ވަނީ އާންމުންނަށް ޝުކުރު އަދާކޮށްފައެވެ.
ރިއެކްޝަންސް
